सातारा येथील बनावट ‘कॉल सेंटर’च्या माध्यमातून अमेरिकेतील नागरिकांची फसवणूक !

सातारा, २५ मे (वार्ता.) – ऑनलाईन पद्धतीने अमेरिकेतील नागरिकांना फसवून डॉलरमध्ये पैसे उकळणार्‍या बनावट ‘कॉल सेंटर’वर (ग्राहकांना ऑनलाईन सेवा पुरवणार्‍या विभागावर) सातारा पोलिसांनी धाड घातली. स्थानिक गुन्हे अन्वेषण शाखा आणि कोरेगाव पोलीस यांनी संयुक्तपणे ही मोहीम राबवली. कोरेगाव-रहिमतपूर रस्त्यावरील सुभाषनगर येथील एका अपार्टमेंटमधून सातारा, मुंबई, नवी मुंबई, ठाणे, रायगड, राजस्थान येथून १७ संशयितांना कह्यात घेतले आहे. या कारवाईमध्ये ३५ लाख ३४ सहस्र रुपयांचा मुद्देमाल शासनाधीन करण्यात आला आहे. यामध्ये रोख रक्कम, भ्रमणसंगणक, भ्रमणभाष आणि अमेरिकन नागरिकांच्या माहितीचा समावेश आहे. जिल्हा पोलीस अधीक्षक निखिल पिंगळे यांनी पत्रकार परिषदेत माहिती दिली.