यमाई तलाव आणि शेजारील जागा गोशाळेसाठी देण्यास तीव्र विरोध !

पंढरपूर – येथील ऐतिहासिक यमाई तलाव आणि त्याशेजारील जागा ‘श्री विठ्ठल-रुक्मिणी मंदिरे समिती’च्या गोशाळेच्या विस्तारासाठी देऊ नये, अशी मागणी ‘यमाई तलाव बचाव समिती’ने केली आहे. ही जागा गोशाळेसाठी दिल्यास जनआंदोलन करण्याची चेतावणी देण्यात आली आहे. याविषयी पंढरपूर नगर परिषदेचे उपनगराध्यक्ष महादेव धोत्रे, माजी नगराध्यक्ष आणि नगरसेवक लक्ष्मणराव शिरसट, गटनेते सुजितकुमार सर्वगोड, नगरसेवक अधिवक्ता सुनील वाळूजकर, अमोल डोके, अधिवक्ता गुरुदास अभ्यंकर, धर्मराज घोडके, सौरभ थिटे, इब्राहिम बोहरी, शरद माने, मालोजी शेंबडे, गणेश शिंदे नाईक आदींनी जिल्हाधिकारी कार्तिकीयन एस्. यांना निवेदन दिले आहे.

निवेदनात म्हटले आहे की, यमाई तलाव हा वर्ष १८८२ पूर्वीचा ऐतिहासिक तलाव असून इंग्रज काळापासून पंढरपूर शहराच्या पाणीपुरवठ्यासाठी महत्त्वाचा आहे. सध्या या तलावाचा विकास ‘राज्य सरोवर संवर्धन योजने’तून करण्यात आला असून तो पर्यटनस्थळ म्हणूनही विकसित झाला आहे. तसेच येथे चालण्याचा मार्ग, तुळशीवृंदावन (बगीचा) आणि पक्षी निरीक्षणासाठी निरीक्षण मनोरा (वॉच टॉवर) यांसारख्या सुविधा उपलब्ध आहेत.

या परिसरात मोठ्या प्रमाणावर नागरिक व्यायाम, फिरणे आणि विरंगुळ्यासाठी येत असल्याने ही जागा गोशाळेसाठी देणे अयोग्य असल्याचे समितीचे म्हणणे आहे.