माधव खट्टर यांना जामीन संमत

माधव खट्टर यांना कह्यात घेण्याची कृती पूर्णपणे अन्यायकारक ! – माधव खट्टर यांचे अधिवक्ता अमेय प्रभुदेसाई 

माधव खट्टर यांचे अधिवक्ता अमेय प्रभुदेसाई म्हणाले, ‘‘माधव खट्टर यांना गुन्हे अन्वेषण विभागाने कह्यात घेण्याची कृती पूर्णपणे अन्यायकारक आहे. माधव खट्टर यांचे वय १८ वर्षे आहे. एखाद्याला कह्यात घ्यायचे असेल, तर त्यासाठी नियमांचे पालन करणे अत्यावश्यक असते. अशा प्रकरणी सर्वाेच्च न्यायालय अथवा अन्य न्यायालये यांनी वेळोवेळी महत्त्वपूर्ण निवाडे दिलेले आहेत. ज्या गुन्ह्यामध्ये ७ वर्षांखालील कारावासाची शिक्षा असते, अशा प्रकरणी कह्यात घेतल्या जाणार्‍या व्यक्तीला भारतीय न्याय संहितेचे कलम ३५ ‘ब’नुसार पूर्व नोटीस देणे बंधनकारक असते. या प्रकरणी कायद्याला बगल देऊन माधव खट्टर यांना कह्यात घेण्यात आले आहे. विशेष करून संशयित १८ वर्षांचा असेल अशा प्रकरणीही असे होणे अपेक्षित नव्हते. त्यामुळे या प्रकरणी माधव खट्टर यांना कह्यात घेण्याची कृती पूर्णपणे अन्यायकारक आहे.’’

माधव खट्टर यांना अन्यायपूर्वक कह्यात घेणार्‍या पोलीस अधिकार्‍याच्या विरोधात हानीभरपाईचा दावा करणार ! – अधिवक्ता संजीव पुनाळेकर, राष्ट्रीय सचिव, हिंदु विधिज्ञ परिषद

माधव खट्टर यांची जामिनावर सुटका झाल्याच्या प्रकरणी हिंदु विधिज्ञ परिषदचे राष्ट्रीय सचिव अधिवक्ता संजीव पुनाळेकर म्हणाले, ‘‘हिंदुत्वनिष्ठ गौतम खट्टर यांनी धार्मिक भावना दुखावल्याचा आरोप आहे. या प्रकरणी गोवा पोलिसांच्या कह्यात असलेले श्री. गौतम खट्टर यांचे लहान बंधू माधव खट्टर यांची २८ एप्रिल या दिवशी पणजी येथील न्यायालयाने जामिनावर सुटका केली आहे. अधिवक्ता नागेश जोशी आणि अधिवक्ता अमेय प्रभुदेसाई यांनी या प्रकरणी न्यायालयात युक्तीवाद केला, तर मुंबई येथून अधिवक्ता घन:श्याम उपाध्याय यांनी या प्रकरणाची संपूर्ण धुरा सांभाळली. अधिवक्ता योगेश देशपांडे यांनी या प्रकरणी साहाय्य केले. या प्रकरणी गौतम खट्टर यांची योग्य बाजू न्यायालयासमोर मांडणार्‍या संबंधित सर्व अधिवक्त्यांचे मी अभिनंदन करतो. या प्रकरणी ज्या पोलीस अधिकार्‍याने माधव खट्टर यांना अन्यायपूर्ण कह्यात घेतले, त्याच्या विरोधात न्यायालयात हानीभरपाई देण्याविषयी याचिका प्रविष्ट (दाखल) केली जाणार आहे, तसेच संबंधित पोलीस अधिकार्‍यावर कारवाई करण्याची मागणी करण्यात येणार आहे.’’

गौतम खट्टर यांनाही लवकरच जामीन मिळणार !

अधिवक्ता संजीव पुनाळेकर पुढे म्हणाले, ‘‘वास्को येथील एका सार्वजनिक कार्यक्रमात धार्मिक भावना दुखावल्याचे कथित वक्तव्य केल्याच्या प्रकरणी गौतम खट्टर यांचीही लवकरच जामिनावर सुटका होणार होणार आहे आणि या प्रकरणी त्यांना न्याय मिळणार आहे. यामुळे हिंदु राष्ट्राचा गजर होणार आहे.’’