विजय सरदेसाई यांनी सभागृहाची विनाअट क्षमा मागितली

पणजी, १० मार्च (वार्ता.) – विधानसभा अधिवेशनाच्या पहिल्याच दिवशी ६ मार्चला मिराबाग येथील बंधारा प्रकल्पाच्या विरोधात ४ आंदोलकांनी सभागृहाच्या प्रेक्षक दालनातून फलक दाखवून निषेध केला होता. या प्रकरणी गोवा फॉरवर्डचे नेते आमदार विजय सरदेसाई यांनी सभागृहाची विनाअट क्षमा मागितली. आमदार सरदेसाई यांनी २४ घंट्यांच्या आत सभागृहाची क्षमा मागावी, असे निर्देश सभापती गणेश गावकर यांनी ९ मार्च या दिवशी सभागृहात दिले होते.

१० मार्च या दिवशी याविषयी विजय सरदेसाई म्हणाले, ‘‘मला सभापतींविषयी पूर्ण आदर आहे. गेली १४ वर्षे मी सत्तेत आणि विरोधी बाकांवर बसून काम केले आहे. मंत्री आणि उपमुख्यमंत्री म्हणूनही उत्तरदायित्व सांभाळले आहे. त्यामुळे सभागृहाचे काम मला चांगले समजते. लोकप्रतिनिधी म्हणून गोमंतकियांचे प्रश्न मांडणे, हे माझे कर्तव्य आहे. नागरिकांना विधानसभेच्या प्रेक्षक दालनामध्ये उपस्थित रहाण्यासाठी प्रवेशपत्र देण्याचा आमदारांना अधिकार असतो. ६ मार्चला झालेली घटना योग्य नव्हती. आंदोलन करणार्‍यांच्या वर्तनाविषयी मला आधी कल्पना असती, तर त्यांना मी प्रवेशपत्र दिले नसते. ज्यांना प्रवेशपत्र दिले त्यांच्या वर्तनावर माझे नियंत्रण नाही. जर प्रवेशपत्र दिलेल्या व्यक्तींच्या वर्तनाचे उत्तरदायित्व आमदारांवर टाकायचे असेल, तर त्याविषयी सभागृहात चर्चा करून स्वतंत्र नियम किंवा कायदा करावा लागेल. मी आंदोलकांना प्रवृत्त केल्याचे चौकशीत समोर आलेले नाही.’’