श्री तुळजाभवानीदेवीच्या शाकंभरी नवरात्रोत्सवाची घटोत्थापनाने सांगता !

तुळजापूर (धाराशिव) – श्री क्षेत्र तुळजापूर येथील श्री तुळजाभवानीदेवीच्या ७ दिवसांच्या शाकंभरी नवरात्रोत्सवाची पारंपरिक धार्मिक विधींनुसार आणि घटोत्थापनाने भावपूर्ण सांगता करण्यात आली. २८ डिसेंबर या दिवशी घटस्थापनेने प्रारंभ झालेल्या या उत्सवात भाविकांनी मोठ्या संख्येने उपस्थित राहून देवीचे दर्शन घेतले. नवरात्रकाळात मंदिरात देवीची विशेष पूजा आणि विविध धार्मिक विधी भक्तीमय वातावरणात पार पडले. उत्सवाच्या सांगतादिनी दुपारी मंदिरात घटोत्थापनाचा विधी संपन्न झाला. या वेळी मंदिरातील होमामध्ये कोहळा आणि नारळ यांची पूर्णाहुती अर्पण करून उत्सवाची विधीवत् सांगता करण्यात आली. याप्रसंगी तहसीलदार तथा व्यवस्थापक (प्रशासन) माया माने, महंत, तसेच मंदिर संस्थानचे कर्मचारी आणि पुजारी मोठ्या संख्येने उपस्थित होते.