२० डिसेंबर या दिवशी श्री तुळजाभवानीदेवीच्या मंचकी निद्रेस प्रारंभ !

तुळजापूर – महाराष्ट्राची कुलस्वामिनी असलेल्या श्री तुळजाभवानीदेवीची मंचकी निद्रा २० डिसेंबर या दिवशी चालू होत आहे. त्या निमित्ताने सायंकाळची अभिषेक पूजा सायंकाळी ७ पर्यंत पूर्ण होईल. त्यानंतर मेण काढणे आणि इतर धार्मिक विधी रात्री ७.३० पर्यंत पूर्ण होऊन रात्री ७.३० ते ८ पर्यंत देवीची मंचकी निद्रा हा धार्मिक विधी पार पडेल.

२८ डिसेंबरपासून देवीच्या शाकंभरी नवरात्रास प्रारंभ !

२० ते २८ डिसेंबर या कालावधीत देवीची निद्रा संपल्यावर २८ डिसेंबर या दिवशी पहाटे देवीची सिंहासनावर प्रतिष्ठापना होईल. यानंतर दुपारी १२ वाजता घटस्थापना होईल. २९ डिसेंबर या दिवशी देवीची रथ अलंकार महापूजा, ३० डिसेंबर या दिवशी देवीची मुरली अलंकार महापूजा, ३१ डिसेंबर या दिवशी जलरात्रा, शेषशाही अलंकार महापूजा, १ जानेवारी या दिवशी भवानी तलवार अलंकार महापूजा, अग्निस्थापना-शतचंडी होमास प्रारंभ, २ जानेवारी या दिवशी देवीची महिषासूरमर्दिनी अलंकार महापूजा. ३ जानेवारी या दिवशी शाकंभरी पौर्णिमेच्या निमित्ताने देवीची नित्योपचार महापूजा, दुपारी १२ वाजता पूर्णाहुती, घटोत्थापन, रात्री छबीना आणि जोगवा, ४ जानेवारी या दिवशी अन्नप्रसाद महाप्रसादाने नवरात्रीची समाप्ती होईल.