अयोध्या येथे गोव्यातील श्रीरामभक्तांसाठी होणार ‘गोवा राम निवास’ !

पणजी, २१ मार्च (वार्ता.) – अयोध्या येथे ‘गोवा राम निवास’ बांधण्यासाठी गोवा सरकारने २३ कोटी ५७ लाख रुपये खर्चून ३ सहस्र ८०१ चौरस मीटर भूखंड संपादित केला आहे. या ठिकाणी श्री रामलल्लाच्या दर्शनासाठी गोव्यातील श्रीरामभक्तांची सोय होणार आहे, अशी माहिती मुख्यमंत्री डॉ. प्रमोद सावंत यांनी दिली.

ते पुढे म्हणाले, ‘‘पंतप्रधान नरेंद्र मोदी यांच्या दूरदर्शी नेतृत्वाखाली अयोध्या येथे श्रीराममंदिराचे स्वप्न साकार झाले आहे. यामुळे आपला आध्यात्मिक आणि सांस्कृतिक वारसा पुन्हा जागृत झाला आहे. अयोध्या येथे ‘गोवा राम निवास’ उभारण्यासाठी उत्तरप्रदेशचे मुख्यमंत्री योगी आदित्यनाथ, उत्तरप्रदेश आवास एवम् विकास परिषद आणि उत्तरप्रदेश सरकार यांनी चालना दिली. यामुळे परशुरामभूमी गोवा आणि अयोध्या यांच्यातील आध्यात्मिक बंध अधिक भक्कम होणार आहे. संपूर्ण भारतात भक्ती, संस्कृती आणि एकता वृद्धींगत करण्यासाठी हे आणखी एक पाऊल आहे.’’