गायनाचा सराव करतांना पुणे येथील कु. मधुरा चतुर्भुज यांना आलेल्या अनुभती

१. एका गायनप्रकाराचा सराव करतांना वृंदावनात श्रीकृष्णाच्या बासरीचा नाद ऐकू येणे, परात्पर गुरु डॉ. आठवले यांचा हसरा तोंडवळा दिसून आनंद जाणवणे आणि सूक्ष्मातून त्यांना तुळशीचा हार घातल्यावर भावजागृती होणे

कु. मधुरा चतुर्भुज‘२.३.२०२१ या दिवशी स्वरांचा (अलंकारांचा) सराव करतांना मला बासरीचे सूर ऐकू येऊन राधा त्या सुरांसमवेत नृत्य करतांना दिसली. याच प्रकारे श्रीकृष्णाच्या बासरीचा नाद ऐकतांना ‘मी वृंदावनात आले आहे’, असे मला दिसले. त्या वेळी मला परात्पर गुरु डॉ. आठवले यांचा हसरा तोंडवळा दिसला. त्यांनी सूक्ष्मातून माझ्या डोक्यावर हात ठेवला असून माझ्या सहस्रारचक्रात चैतन्यरूपी लहरी जाणवल्या. माझे मन शांत आणि एकाग्र होऊन मला वेगळीच आनंदावस्था अनुभवायला मिळाली. त्यानंतर मला तुळस दिसली आणि त्या तुळशीचा हार मी परात्पर गुरु डॉक्टरांना घातला. तेव्हा ‘ते पुष्कळ आनंदी झाले आहेत’, असे मला दिसले आणि माझी भावजागृती झाली.

२. ‘स्वर हवेत तरंगत आहेत’, असे दिसणे आणि सात स्वर एकरूप होऊन पिवळा गोळा होणे अन् त्यामधून सर्वत्र चैतन्य पसरणे

६.३.२०२१ या दिवशी गायनाच्या सरावाच्या वेळी स्वर म्हणतांना ‘स्वर हवेत तरंगत आहेत’, असे दिसले. ‘सात स्वर एकरूप झाले. त्यांचा पिवळा गोळा तयार होऊन त्यामधून सर्वत्र चैतन्य पसरत आहे’, असे जाणवले, तसेच मनातले विचार न्यून होऊन नामजप चालू झाला.’

– कु. मधुरा चतुर्भुज, पुणे (१३.३.२०२१)

येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार साधकांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक
सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे ‘सूक्ष्म’. साधनेत प्रगती केेलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत.
सूक्ष्मातील दिसणे, ऐकू येणे इत्यादी (पंच सूक्ष्मज्ञानेंद्रियांनी ज्ञानप्राप्ती होणे) : काही साधकांची अंतर्दृष्टी जागृत होते, म्हणजे त्यांना डोळ्यांना न दिसणारे दिसते, तर काही जणांना सूक्ष्मातील नाद किंवा शब्द ऐकू येतात.