कराड (जिल्हा सातारा) येथील सासवे कुटुंबातील ३ सख्ख्या बहिणींचा दुर्दैवी मृत्यू

अन्नातून विषबाधा झाल्याची शक्यता

सातारा, १९ डिसेंबर (वार्ता.) – कराड तालुक्यातील सैदापूर येथील ‘मिलिटरी होस्टेल’जवळ सासवे कुटुंबीय वास्तव्यास आहे. याच कुटुंबातील ३ सख्ख्या बहिणींचा १८ डिसेंबरच्या पहाटे उलट्या आणि जुलाब होऊन दुर्दैवी मृत्यू झाला. १७ डिसेंबरला रात्री एकत्र भोजन करून सर्वजण झोपी गेले; मात्र मध्यरात्री १.३० वाजता आई आणि मुलींना उलट्या अन् जुलाबाचा त्रास होऊ लागला. यातील मुलींना त्रास असह्य झाल्याने त्यांना कृष्णा रुग्णालयात नेण्यात आले; मात्र तोपर्यंत तीनही मुलींचा मृत्यू झाला होता. याप्रकरणी पोलिसांनी अन्नातून विषबाधा झाली असल्याचा प्राथमिक तर्क व्यक्त केला आहे.