कणकवली शहरात अज्ञाताने लावलेल्या आगीत २ दुचाकी जळल्या, तर एका दुचाकीची अंशतः हानी

अशी विकृत मानसिकता असलेल्यांना शोधून कठोर शिक्षा होणे आवश्यक !

कणकवली – शहरातील नागवे रोड येथील संजय ढेकणे यांच्या घराजवळ रस्त्यालगत उभ्या करण्यात आलेल्या ३ दुचाकी जाळण्याचा प्रयत्न ९ डिसेंबरला पहाटे अज्ञाताने केला. यामध्ये २ दुचाकी जळून खाक झाल्या, तर १ दुचाकी वाचवण्यात स्थानिकांना यश आले.

गाड्यांना लागलेल्या आगीने ढेकणे यांना जाग आली. त्यांनी पाणी मारून आग विझवण्याचा प्रयत्न केला; मात्र तोपर्यंत २ दुचाकी जळून खाक झाल्या, तर एक दुचाकी वाचवण्यात यश आले.

यापूर्वीही कणकवली शहरात गाड्यांना आग लावण्याच्या घटना घडलेल्या आहेत. त्यामुळे असे प्रकार नेमके कोण आणि कशासाठी करतो ? असा प्रश्‍न निर्माण होत आहे. या प्रकारामुळे शहरवासियांमध्ये भीतीचे वातावरण निर्माण झाले आहे.