बदलापूर येथे बेकरीतील केकमध्ये उंदराची विष्ठा !

बदलापूर – येथे ‘अय्यंगार फ्रेश केक’ या बेकरीतील केकमध्ये उंदराची विष्ठा आढळली. नगरसेविका हर्षाली गायकवाड यांच्या संदर्भात हा प्रकार घडला. नगरसेविका गायकवाड याविषयी खडसावण्यासाठी दुकानात गेल्या, तेव्हा तेथे ठेवलेल्या खारींवर उंदीर फिरत असून केक बनवण्यासाठी वापरली जाणारी भांडी शौचालयाच्या भांड्यावर (कमोडच्या) ठेवल्याचे त्यांना दिसले. या वेळी तेथील कर्मचार्‍यांनी ही उंदराची विष्ठा नसून ‘चोकोचिप’ असल्याचे सांगितले; पण गायकवाड यांनी ‘हे केक पडताळणीसाठी पाठवते’, असे सांगितल्यावर कर्मचार्‍यांनी चूक मान्य केली. या बेकारीची अन्न आणि औषध प्रशासनाकडे तक्रार करण्याचा निर्णय नगरसेविकेने घेतला आहे. ‘नागरिकांच्या जिवाशी खेळणारी ही बेकरी बंद करावी’, अशी मागणी केली जात आहे.