संतश्रेष्ठ श्री ज्ञानेश्वर महाराज पालखी सोहळ्यासाठी प्रशासन सिद्ध !

सातारा, १२ जुलै (वार्ता.) – संतश्रेष्ठ श्री ज्ञानेश्वर महाराज पालखी सोहळा सातारा जिल्ह्यातून १५ ते १९ जुलै या कालावधीत मार्गक्रमण करणार आहे. या पार्श्वभूमीवर वारकर्‍यांना उत्तम सुविधा पुरवण्यासाठी आणि सोहळा शांततेत पार पाडण्यासाठी पालकमंत्री शंभूराज देसाई यांनी पाडेगाव येथील दत्त घाट अन् लोणंद येथील पालखीतळाला भेट देऊन पूर्वसिद्धतेचा आढावा घेतला. या वेळी जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलीस अधीक्षक निखिल पिंगळे यांच्यासह विविध विभागांचे अधिकारी उपस्थित होते.

या वर्षीच्या पालखी सोहळ्यासाठी मोठ्या प्रमाणावर पिण्याच्या टँकरची, तसेच शौचालयांची व्यवस्था करण्यात येणार आहे. प्रत्येक दिंडी प्रमुखांशी संपर्क साधण्यासाठी समन्वयकांची नियुक्ती केली आहे. त्यांच्या माध्यमातून अडीअडचणी तात्काळ सोडवल्या जातील, तसेच सोहळ्यात सुसज्ज रुग्णवाहिकाही सिद्ध रहाणार आहेत. पालखी सोहळा भक्तीमय आणि सुरक्षित वातावरणात मार्गस्थ करण्यासाठी सातारा जिल्हा प्रशासन सिद्ध झाले आहे. यासाठी विविध विभागांच्या बैठका घेऊन संबंधितांना योग्य ते निर्देश देण्यात आले आहेत, असे जिल्हाधिकारी संतोष पाटील यांनी सांगितले.