कर्जतमध्ये ‘स्मार्ट मीटर’विरोधात आंदोलन करणार !

कर्जत – महावितरण कार्यालयाकडून कर्जत तालुक्यात ग्राहकांची अनुमती किंवा संमती न घेता बळजोरीने स्मार्ट मीटर बसवण्याचे काम चालू आहे. या कृतीविरोधात ठाकरे गटाने आक्रमक भूमिका घेतली. तालुकाप्रमुख बाजीराव दळवी यांच्या नेतृत्वाखाली त्यांच्या शिष्टमंडळाने महावितरणचे उपअभियंता चंद्रकांत केंद्रे यांची भेट घेऊन त्यांना अधिकृत निवेदन दिले. ‘ग्राहकांच्या इच्छेविरुद्ध स्मार्ट मीटर बसवण्याची सक्ती तात्काळ थांबवावी, तसेच स्मार्ट मीटरचा लाभ आणि तोटे यांविषयी सर्वसामान्यांमध्ये जनजागृती करून खुली चर्चा आयोजित केली जावी. महावितरणने या मागण्यांचा सकारात्मक विचार करून त्वरित योग्य ती कार्यवाही करावी, अन्यथा प्रशासनाविरोधात रस्त्यावर उतरून तीव्र आंदोलन छेडले जाईल’, अशी चेतावणी निवेदनातून देण्यात आली.