‘कोल्हापूर गॅझेट’मध्ये नोंदी असणार्‍या सर्वांना ८ दिवसांत जातीचे प्रमाणपत्र द्या ! – मनोज जरांगे पाटील

कोल्हापूर – ‘कोल्हापूर गॅझेट’मध्ये जिल्ह्यात १ लाख ४० सहस्र कुणबी जातीच्या नोंदी आहेत. त्या सर्वांना राज्य सरकारने ८ दिवसांत जातीचे प्रमाणपत्र द्यावे. मी एकदाच सरकारला विनंती करत आहे. मराठ्यांवर अन्याय करण्याचा प्रयत्न झाला, तर त्याचे गंभीर परिणाम होतील, अशी चेतावणी मराठा आरक्षण आंदोलनाचे नेते मनोज जरांगे-पाटील यांनी दिली. ते कोल्हापूर येथे झालेल्या पत्रकार परिषदेत बोलत होते. या प्रसंगी काँग्रेसचे खासदार छत्रपती शाहू महाराज उपस्थित होते.

१. मुख्यमंत्र्यांनी ‘कोल्हापूर गॅझेट’ शिंदे समितीकडे द्यावे, तसेच मंत्रीमंडळ उपसमितीकडे द्यावे. त्यांनी संपूर्ण दस्ताऐवज पडताळून पहावेत आणि त्यानंतर ज्या नोंदी आढतील, त्या सर्वच मराठा समाजाला जात प्रमाणपत्र द्यावे.

२. जिल्ह्यात सापडलेल्या नोंदीपैकी ३५ ते ४० सहस्र जात प्रमाणपत्रे वाटप केली आहेत. हे प्रमाण अल्प असून उर्वरित प्रमाणपत्रे येणार्‍या ८ दिवसांत द्यावीत.

३. राज्य सरकारने केवळ ३० मोडीलिपी अभ्यासकांची नियुक्ती केली आहे. प्रत्येक जिल्ह्यासाठी ही संख्या पुरेशी नाही. या अभ्यासकांचे वेतन सरकार देत नाही. सरकारला वेतन देणे शक्य नसल्यास त्यांनी तसे सांगावे, आम्ही समाजासाठी म्हणून मोडीलिपी अभ्यासक नेमतो.