वाळूच्या अवैध वाहतुकीच्या प्रकरणी जिल्हा प्रशासनाची एका रात्रीत १५ वाहनांवर कारवाई

सिंधुदुर्गनगरी (जि.मा.का.) – सिंधुदुर्ग जिल्ह्यात वाळूच्या अवैध वाहतुकीच्या विरोधातील तक्रारींची गंभीर नोंद घेऊन जिल्हाधिकारी तृप्ती धोडमिसे यांच्या नेतृत्वाखाली महसूल विभागाच्या पथकाने १७ एप्रिलच्या रात्री विविध तालुक्यांत संयुक्त पथके सिद्ध करून वाळूची अवैध वाहतूक करणार्‍या वाहनांवर अनेक ठिकाणी कारवाई केली. या वेळी वाळूची वाहतूक करणारी १५ वाहने कह्यात घेण्यात आली. अचानक झालेल्या या कारवाईमुळे वाळूची अवैध वाहतूक करणार्‍यांनी वाहनातील वाळू अन्यत्र टाकून पलायन केले.

या कारवाईच्या वेळी आचरा–कणकवली मार्गावर २ वाहने, देवली-परूळे मार्गावर ३ वाहने, कुंभारमाठ येथे ३ वाहने, तोंडवली येथे ३ वाहने आणि कुडाळ परिसरात ४ वाहने, अशी एकूण १५ वाहने कह्यात घेतली. ही सर्व वाहने संबंधित तहसील कार्यालयांच्या आवारात ठेवण्यात आली आहेत.