श्री तुळजाभवानीदेवीची रथअलंकार महापूजा भक्तीमय वातावरणात झाली !

तुळजापूर – श्री तुळजाभवानीदेवीच्या शाकंभरी नवरात्र महोत्सवांतर्गत २९ डिसेंबर या दिवशी रथअलंकार महापूजा भक्तीभावात साजरी झाली. भगवान श्री सूर्यनारायणांनी देवीस त्रिलोक भ्रमणासाठी आपला रथ अर्पण केल्याच्या स्मरणार्थ ही विशेष पूजा करण्यात येते. या पूजेनिमित्त श्री तुळजाभवानीदेवीचे भावपूर्ण दर्शन भाविकांना लाभले.

देवीच्या एका हातात चाबूक, तर दुसर्‍या हातात घोड्यांचा लगाम धारण केलेला अलंकार विशेष आकर्षण ठरला. देवीचे तेजस्वी आणि ऐश्वर्यपूर्ण स्वरूप अधिक खुलून दिसत होते. मंदिर परिसरात भक्तांनी मोठ्या संख्येने उपस्थित राहून दर्शनाचा लाभ घेतला. संपूर्ण परिसर ‘आई तुळजाभवानी’च्या जयघोषाने दुमदुमून गेला.