मुंबई येथे ८०७ लिटरहून अधिक भेसळयुक्त दूध जप्त !

अन्न आणि औषध प्रशासन अन् पोलीस यांची संयुक्त कारवाई !

मुंबई – सीलबंद दूधाच्या साठ्यात पाण्याची भेसळ करणारे धारावी येथील मोठे जाळे पोलीस, तसेच अन्न आणि औषध प्रशासन (एफ्.डी.ए.) यांच्या अधिकार्‍यांनी उघडकीस आणले आहे. १५ सप्टेंबर या दिवशी पहाटे अधिकार्‍यांनी धारावी येथील ए.के. गोपालनगर आणि इंदिरानगर येथे धाडी घालून तब्बल ८०७ लिटरचा ४५ सहस्र ८५२ रुपयांचा भेसळयुक्त दुधाचा साठा नष्ट केला. या कारवाईत धारावी येथील शाहूनगर पोलीस ठाण्यात ‘एफ्.डी.ए.’ने ६ आरोपींच्या विरोधात गुन्हा नोंद केला आहे.

सेदूल खेरिंग, कोमरवेल्ली बोबली, वेंकटा याल्गाबोएना, नससिंह राज्य, जहांगिली अनंताह आणि नागेश रांगमलिया, अशी गुन्हे नोंद केलेल्यांची नावे आहेत. मध्यरात्रीच्या वेळी धारावी येथे अमोल, गोकुळ आणि गुडमॉर्निंग अशा प्रसिद्ध दूध आस्थापनांतील दुधाच्या पिशव्या फोडल्या जायच्या आणि त्यात पाणीमिश्रित दूध भरले जायचे. हा प्रकार ‘एफ्.डी.ए.’च्या अधिकार्‍यांनी पोलिसांच्या साहाय्याने रंगेहात पकडला. सकाळी ८ वाजेपर्यंत ही कारवाई चालू होती.