Pharmacy Answer Sheet : उत्तरप्रदेशात ‘फार्मसी’ पदवी परीक्षेत रामनाम आणि क्रिकेटपटूंची नावे लिहिणारे ४ विद्यार्थी उत्तीर्ण !

उत्तरपत्रिका पडताळणारे २ प्राध्यापक निलंबित !

जौनपूर (उत्तरप्रदेश) – येथील वीर बहादूर सिंह पूर्वांचल विद्यापिठाच्या ‘फार्मसी’ पदवी परीक्षेत ४ विद्यार्थ्यांनी उत्तरपत्रिकेमध्ये ‘जय श्रीराम’ आणि विराट कोहली, रोहित शर्मा अन् हार्दिक पंड्या या क्रिकेटपटूंची नावे लिहिली. विशेष म्हणजे या विद्यार्थ्यांना उत्तीर्णदेखील करण्यात आले. या प्रकरणी विद्यापीठ प्रशासनाने २ प्राध्यापकांवर निलंबनाची कारवाई केली. विद्यापिठाचे माजी विद्यार्थी दिव्यांशू सिंह यांनी माहितीच्या अधिकारात विचारलेल्या माहितीतून ही गोष्ट उघडकीस आली.

सदोष उत्तरपत्रिका तपासणीविषयी दिव्यांशू यांनी राजभवनाकडे लेखी तक्रार केली. त्यानंतर राजभवनाने २१ सप्टेंबर २०२३ या दिवशी चौकशीचा आदेश दिला. विद्यापीठ प्रशासनाने चौकशी समिती नियुक्त केली. या चौकशीत २ प्राध्यापकांना दोषी ठरवण्यात आले. त्यानुसार डॉ. आशुतोष गप्ता आणि डॉ. विनय वर्मा यांना निलंबित करण्यात आले आहे, असे विद्यापिठाच्या कुलगुरु डॉ. वंदना सिंह यांनी सांगितले.