कर्मचार्‍यांची कसून चौकशी चालू, एकाचे निलंबन; वेतनवाढीवरही टांगती तलवार !

नागपूर जिल्‍हा परिषदेतील ‘सुरक्षा ठेव घोटाळा’ प्रकरण

नागपूर – दीड वर्षापूर्वी येथील जिल्‍हा परिषदेत झालेल्‍या सुरक्षा ठेव घोटाळा प्रकरणी काही दोषी कर्मचार्‍यांना पदावनत करण्‍यात येणार असून काहींची वेतनवाढ थांबवण्‍यात येणार आहे. या संदर्भात आतापर्यंत एका कर्मचार्‍याचे निलंबन झाले असून घोटाळ्‍याची चौकशी चालू आहे. जिल्‍हा परिषदेत उघडकीस आलेल्‍या घोटाळ्‍यात ग्रामीण पाणीपुरवठा, बांधकाम आणि लघुसिंचन विभागांतील १० कर्मचार्‍यांवर प्राथमिक चौकशीत ठपका ठेवण्‍यात आला आहे. यामुळे जिल्‍हा परिषदेच्‍या व्‍याजाची ६९ लाख रुपयांची हानी झाली आहे, असे चौकशी समितीने अहवालात म्‍हटले होते.

१. एका कर्मचार्‍याला निलंबित करण्‍यात आल्‍यानंतर त्‍यांनी न्‍यायालयात याचिका प्रविष्‍ट केली आहे. १० कंत्राटदारांनाही दोषी धरण्‍यात आले.

२. तत्‍कालीन मुख्‍य कार्यकारी अधिकारी योगेश कुंभेजकर यांनी दोषींकडून आर्थिक हानी वसूल करण्‍याचे आदेश दिले होते. त्‍या वेळी विभागप्रमुखांनी ही रक्‍कम कंत्राटदारांकडून वसूल करण्‍याचे आदेश काढले; परंतु कंत्राटदारांनी ते भरण्‍यास नकार दिला.

३. या प्रकरणी १० कंत्राटदारांविरुद्ध गुन्‍हे नोंद करण्‍यात आले, तर काही कंत्राटदारांना काळ्‍या सूचीत टाकण्‍याची प्रक्रिया चालू करण्‍यात आली आहे.

४. निवृत्त कर्मचार्‍यांच्‍या निवृत्ती वेतनातून काही टक्‍के रक्‍कम कपात करण्‍यात येईल. सर्व कर्मचार्‍यांना याविषयी नोटीसही बजावण्‍यात आली आहे.