देशातील पहिल्या ठाणे-बोरिवली दुहेरी भुयारी प्रकल्पाच्या ‘टनेल बोरिंग’च्या कामाचा शुभारंभ !

मुंबई – ठाणे ते बोरिवली दुहेरी भुयारी मार्ग प्रकल्पासाठीच्या ‘टनेल बोरिंग’ यंत्राचा शुभारंभ ७ एप्रिल या दिवशी मुख्यमंत्री देवेंद्र फडणवीस यांच्या हस्ते झाला. या वेळी उपमुख्यमंत्री एकनाथ शिंदे, उपमुख्यमंत्री सुनेत्रा पवार, परिवहनमंत्री प्रताप सरनाईक उपस्थित होते. हा देशातील पहिला दुहेरी भुयारी प्रकल्प असून या मार्गाची लांबी ११.८४ किलोमीटर आहे.

यातील ५.७५ भाग बोरिवलीमध्ये, तर ६.९ किलोमीटर मार्ग ठाणे जिल्ह्यात आहे. यांतील प्रत्येक बोगद्यामध्ये २ मार्ग वाहतुकीसाठी, तर १ मार्ग आपत्कालीन मार्ग असेल. अशा प्रकारे येणारे आणि जाणारे अशा दोन्ही बोगद्यांमध्ये मिळून ६ मार्गिका असणार आहेत. ‘मुंबई महानगर प्रदेश विकास प्राधिकरणा’द्वारे (‘एम्.एम्.आर्.डी.’द्वारे) हे काम चालू असून या प्रकल्पासाठी १६ सहस्र ६०० कोटी रुपये इतका व्यय लागणार आहे. या मार्गामुळे बोरिवली ते ठाणे हा २ ते अडीच घंट्यांचा प्रवास १५ मिनिटांत होईल. या मार्गामुळे २३ किलोमीटरचे अंतर १२ किलोमीटर इतके होणार आहे. मे २०२८ पर्यंत या मार्गाचे काम पूर्ण होईल. या मार्गात भुयार निर्माण करण्यासाठी वापरण्यात येणारे टनेल १३.३४ मीटर व्यास इतके मोठे आहे. भविष्यात हा मार्ग नाशिक, कल्याण आणि नवी मुंबई यांकडे जाणार्‍या मार्गांनाही जोडला जाणार आहे. या भुयारी मार्गामुळे बोरिवली (पश्चिम), बोईसर, घोडबंदर येथील गर्दी न्यून होईल.