अनुभूतींच्या माध्यमातून साधकांना आनंद देणारे परात्पर गुरु डॉ. आठवले !
१. परात्पर गुरु डॉ. आठवले यांच्या जन्मोत्सवाच्या दिवशी लहान मुलाला अकस्मात् उलट्या होणे आणि गुरुदेवांना प्रार्थना करणे
‘जन्मोत्सवाच्या दिवशी मी सकाळपासून पुष्कळ आनंदित होते. ‘आज परात्पर गुरु डॉ. आठवले सूक्ष्मातून येणार आहेत’, असे मला वाटत होते. माझा ४ वर्षांचा मुलगा चांगल्या स्थितीत होता; मात्र सकाळी ९ वाजल्यापासून अकस्मात् त्याला उलट्या चालू झाल्या. मी त्याच्या उलट्या स्वच्छ करून हैराण झाले होते. मी परात्पर गुरु डॉक्टरांना शरण जाऊन प्रार्थना केली, ‘हे गुरुदेवा माझ्या आनंदात कुणी विष घातले ? मी काय करू ? या आपत्काळात मुलाला रुग्णालयात घेऊन जायलाही मला भय वाटत आहे.’
२. ‘परात्पर गुरुदेवांनी मुलाच्या डोक्यावर हात ठेवला आहे’, असा भाव ठेवल्यावर मुलाचा त्रास दूर होणे
दुपारी २ वाजता परात्पर गुरु डॉ. आठवले यांच्या जन्मोत्सवाचा कार्यक्रम चालू झाला. तेव्हा मी परात्पर गुरुदेवांना प्रार्थना केली, ‘हे गुरुदेवा आपणच यावे.’ अश्वत्थाम्याने ब्रह्मास्त्र सोडल्याने अभिमन्यूची पत्नी उत्तरेचा बाळ गर्भातच मृत झाल्यावर भगवान श्रीकृष्णाने त्याच्यावर हात ठेवून त्याला जीवन दिले.
त्याप्रमाणे ‘परात्पर गुरुदेवांनी माझ्या मुलाच्या डोक्यावर हात ठेवला आहे’, असा भाव मी ठेवला. तेव्हा त्यांनी हात ठेवताच माझ्या मुलाचे सर्व त्रास दूर झाले आणि तो झोपी गेला. थोड्या वेळानंतर तो उठला आणि अगदी चांगला झाला. त्याला पाहून असे वाटतच नव्हते की, याने सकाळपासून ७ वेळा उलट्या केल्या आहेत आणि तो रुग्णाईत होता. परात्पर गुरुदेवांच्या चरणी कृतज्ञता व्यक्त केल्यावर पुष्कळ भावजागृती झाली. कृतज्ञता गुरुदेव !’
– सौ. रीभा मिश्रा, नागपूर
|