बकर्‍याचा ‘व्हर्च्युअल’ (आभासी) बळी देऊन बकरी ईद साजरी करण्याचा सल्ला द्या !

नेरळ (जिल्हा रायगड) – हिंदु सणांच्या वेळी, उदा. होळीच्या सणात पर्यावरणाचे रक्षण करून होळी साजरी करावी, कोरडी होळी साजरी करावी, दिवाळीत फटाके फोडू नयेत, असे सल्ले तथाकथित पर्यावरणवाद्यांकडून दिले जातात. जे हिंदूंना ज्ञान शिकवतात, त्यांनी आता मुसलमानांना संगणकावर बकर्‍याचे छायाचित्र ठेवून त्याचा ‘व्हर्च्युअली’ बळी देऊन बकरी ईद साजरी करण्याचा सल्ला द्यावा, असे उघड आव्हान भाजप नेते आणि मंत्री नितेश राणे यांनी दिले आहे. नेरळ येथे आयोजित एका कार्यक्रमात ते बोलत होते. मंत्री नितेश राणे यांनी या वेळी हिंदूंच्या सणांवर होणार्‍या दुटप्पी टीकेवर प्रहार केला.

या वेळी त्यांनी स्वातंत्र्यवीर सावरकर यांच्या विधानाचे स्मरण करून देत हिंदूंमधील फितुरीवरही बोट ठेवले. ते म्हणाले,  ‘‘स्वातंत्र्यवीर सावरकर यांनी म्हटले होते की, हिंदूंना मुसलमानांपासून नाही, तर खुद्द हिंदूंपासूनच अधिक धोका आहे. आपलेच काही लोक निरुपयोगी आहेत.’’

तथाकथित पर्यावरणवाद्यांमध्ये धाडस आहे का ? – नितेश राणे

मंत्री नितेश राणे पुढे म्हणाले, ‘‘या पर्यावरणवाद्यांमध्ये मुसलमानांना ‘व्हर्च्युअल’ बळी देण्याचा सल्ला देण्याचे धाडस आहे का ? त्यांनी एकदा असा सल्ला देऊन बघावा, मग ते कुठे फिरतांना दिसतात ते संपूर्ण देश बघेल.’’