सनातन प्रभात > Post Type > बातम्या > राष्ट्रीय बातम्या > Janeu Removed During CET : सीईटी परीक्षेच्या वेळी विद्यार्थ्यांचे जानवे हेतूपुरस्सर काढल्याचे उघड !

Janeu Removed During CET : सीईटी परीक्षेच्या वेळी विद्यार्थ्यांचे जानवे हेतूपुरस्सर काढल्याचे उघड !

  • चौकशीत कृपानिधी महाविद्यालयातील अपप्रकार उघड !

  • कृपानिधी महाविद्यालयात यापुढे कोणतीही सरकारी परीक्षा न घेण्याची जिल्हाधिकार्‍यांची सरकारला शिफारस

बेंगळुरू (कर्नाटक) – शहरातील ‘सामाईक प्रवेश परीक्षा’ अर्थात् ‘सीईटी’च्या (‘कॉमन एन्ट्रन्स टेस्ट’च्या) परीक्षा केंद्रावर विद्यार्थ्यांचे जानवे काढायला लावल्याच्या प्रकरणी जिल्हाधिकारी के.ए. जगदीश यांनी सरकारला अहवाल सादर केला आहे. यात कृपानिधी महाविद्यालयातील अपप्रकार उघडकीस आला आहे. सीईटी परीक्षेत विद्यार्थ्यांचे जानवे हेतूपुरस्सर काढायला लावले गेले, असे चौकशीत निष्पन्न झाले आहे. या पार्श्वभूमीवर कृपानिधी महाविद्यलयाला यापुढे परीक्षा केंद्रांच्या सूचीतून वगळण्याची शिफारस या अहवालात करण्यात आली आहे. ‘पुढील वर्षापासून या महाविद्यालयामध्ये सीईटीसह कोणत्याही प्रकारच्या सरकारी परीक्षा घेऊ नयेत’, असा अहवाल जिल्हाधिकार्‍यांनी सरकारला दिला आहे.

१. या घटनेच्या प्रकरणी सरकारने आधीच कारवाई केली आहे. परीक्षा केंद्रावर अधिकार्‍यांना पाठवून सखोल चौकशी करण्यात आली असून कर्तव्यात कसूर करणार्‍या आणि विद्यार्थ्यांच्या भावना दुखावणार्‍या ३ कर्मचार्‍यांना निलंबित करण्यात आले आहे. अशा घटनांची पुनरावृत्ती होऊ नये, यासाठी ही कठोर कारवाई करण्यात आल्याचे जिल्हाधिकार्‍यांनी स्पष्ट केले आहे.

२. विशेष म्हणजे गेल्या वर्षीही याच महाविद्यालयामध्ये अशीच एक अनुचित घटना घडली होती, ही धक्कादायक गोष्टही चौकशीत उघडकीस आली आहे. ‘गेल्या वेळीही अशीच तक्रार आली होती. त्यामुळे सविस्तर चौकशी अहवालाच्या आधारे अशा केंद्रांवर परीक्षा घेतल्या जाऊ नयेत, असा अहवाल मी सरकारला सादर केला आहे, अशी माहिती जिल्हाधिकारी जगदीश यांनी दिली.

संपादकीय भूमिका

यासह संबंधितांविरुद्ध फौजदारी कारवाई करत त्यांना शिक्षा केली पाहिजे, तसेच महाविद्यालयाची अनुमती रहित केली पाहिजे !

नूतन लेख