ನನ್ನ ಸರಕಾರದ ಪತನಕ್ಕೆ ಅಮೇರಿಕಾ ಹೊಣೆ ! – ಶೇಖ್ ಹಸೀನಾ ಆರೋಪ

ಬಾಂಗ್ಲಾದೇಶದ ಒಂದು ದ್ವೀಪ ನೀಡದಿದ್ದಕ್ಕೆ ಅಮೇರಿಕಾದಿಂದ ಸಂಚು !

ನವದೆಹಲಿ – ತಮ್ಮ ಸರಕಾರದ ಪತನದ ಹಿಂದೆ ಅಮೇರಿಕಾದ ಕೈವಾಡವಿದೆ ಎಂದು ಶೇಖ್ ಹಸೀನಾ ಆರೋಪಿಸಿದ್ದಾರೆ. ಶೇಖ್ ಹಸೀನಾ ಅವರ ಆಪ್ತರು ಆಂಗ್ಲ ಪತ್ರಿಕೆಯೊಂದಕ್ಕೆ ಕಳುಹಿಸಿದ ಸಂದೇಶದಲ್ಲಿ ಈ ಆರೋಪ ಮಾಡಲಾಗಿದೆ. ಬಾಂಗ್ಲಾದೇಶದಿಂದ ಸೇಂಟ್ ಮಾರ್ಟಿನ್ ದ್ವೀಪವನ್ನು ಪಡೆದು ಅಲ್ಲಿ ತನ್ನ ನೌಕಾ ಮತ್ತು ಸೇನಾ ನೆಲೆಯನ್ನು ಸ್ಥಾಪಿಸುವ ಯೋಜನೆಯನ್ನು ಅಮೇರಿಕಾ ಹೊಂದಿತ್ತು. ಈ ನೆಲೆಯನ್ನು ಸ್ಥಾಪಿಸುವ ಮೂಲಕ, ಬಂಗಾಳ ಕೊಲ್ಲಿಯಲ್ಲಿ ತನ್ನ ಪ್ರಭಾವವನ್ನು ಹೆಚ್ಚಿಸಲು ಅಮೇರಿಕಾಗೆ ಸಾಧ್ಯವಾಗುತ್ತಿತ್ತು; ಆದರೆ ಶೇಖ್ ಹಸೀನಾ ಈ ದ್ವೀಪವನ್ನು ನೀಡಲು ನಿರಾಕರಿಸಿದ್ದರು. ಈ ಹಿನ್ನೆಲೆಯಲ್ಲಿ ಕೆಲ ತಿಂಗಳ ಹಿಂದೆ ಶೇಖ್ ಹಸೀನಾ ‘ನನ್ನ ಬಳಿಗೆ ಓರ್ವ ಬಿಳಿ ವ್ಯಕ್ತಿ ಬಂದಿದ್ದ’ ಎಂದು ಹೇಳಿಕೆ ನೀಡಿದ್ದರು. ಆ ‘ಬಿಳಿ ವ್ಯಕ್ತಿ’ ಅಂದರೆ ಅಮೇರಿಕಾ ಎಂಬುದು ಈಗ ತಿಳಿದುಬಂದಿದೆ.

ಕಟ್ಟರವಾದಿಗಳ ರಾಜಕೀಯಕ್ಕೆ ಬಲಿಯಾಗಬೇಡಿ ! – ನಾಗರಿಕರಿಗೆ ಶೇಖ್ ಹಸೀನಾ ಮನವಿ

ಶೇಖ್ ಹಸೀನಾ ಅವರು ಬಾಂಗ್ಲಾದೇಶದ ನಾಗರಿಕರಿಗೆ ಮನವಿ ಮಾಡುತ್ತಾ, ಬಾಂಗ್ಲಾದೇಶದಲ್ಲಿ ಮೃತ ದೇಹಗಳನ್ನು ನೋಡಲು ನನಗೆ ಇಷ್ಟವಿರಲಿಲ್ಲ; ಹಾಗಾಗಿ ನಾನು ರಾಜೀನಾಮೆ ನೀಡಿದೆ. ಕೆಲವರು ವಿದ್ಯಾರ್ಥಿಗಳ ಮೃತ ದೇಹಗಳ ಮೇಲೆ ಕಾಲನ್ನಿಟ್ಟಾದರೂ ಅಧಿಕಾರಕ್ಕೆ ಬರಲು ಬಯಸಿದ್ದರು; ಆದರೆ ನಾನು ಹಾಗೆ ಆಗಲು ಬಿಡಲಿಲ್ಲ. ನಾನು ಪ್ರಧಾನಿ ಹುದ್ದೆಗೆ ರಾಜೀನಾಮೆ ನೀಡಿದ್ದೇನೆ. ಸೇಂಟ್ ಮಾರ್ಟಿನ್ ದ್ವೀಪವನ್ನು ಪಡೆಯಲು ಅಮೇರಿಕಾ ಪ್ರಯತ್ನಿಸುತ್ತಿದೆ. ನಾನು ಆ ದ್ವೀಪದ ಸಾರ್ವಭೌಮತ್ವವನ್ನು ಬಿಟ್ಟುಕೊಟ್ಟಿದ್ದರೆ, ಅಮೇರಿಕಾ ಬಂಗಾಳಕೊಲ್ಲಿಯಲ್ಲಿ ತನ್ನ ಅಧಿಪತ್ಯವನ್ನು ಸುಲಭವಾಗಿ ಸ್ಥಾಪಿಸಬಹುದಿತ್ತು; ಆದರೆ ನಾನು ಹಾಗೆ ಆಗಲು ಬಿಡಲಿಲ್ಲ. ಕೆಲವು ಕಟ್ಟರವಾದಿಗಳು ನಿಮ್ಮನ್ನು ದಾರಿತಪ್ಪಿಸಲು ಪ್ರಯತ್ನಿಸುತ್ತಿದ್ದಾರೆ ಅವರ ಈ ಕುತಂತ್ರಕ್ಕೆ ಬಲಿಯಾಗಬೇಡಿ, ಎಂದು ನಾನು ನನ್ನ ದೇಶದ ಜನರನ್ನು ವಿನಂತಿಸುತ್ತೇನೆ ಎಂದು ಹೇಳಿದರು.