ಅಮೆರಿಕ-ಬಾಂಗ್ಲಾದೇಶ ನಡುವೆ ದಕ್ಷಿಣ ಏಷ್ಯಾದ ಮೊದಲ ಪರಸ್ಪರ ವ್ಯಾಪಾರ ಒಪ್ಪಂದ!

ವಾಷಿಂಗ್ಟನ್ (ಅಮೆರಿಕ) – ಅಮೆರಿಕ ಮತ್ತು ಬಾಂಗ್ಲಾದೇಶಗಳು ಪರಸ್ಪರ ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕಿವೆ. ಅಮೆರಿಕವು ಬಾಂಗ್ಲಾದೇಶದ ರಫ್ತಿನ ಮೇಲಿನ ಪರಸ್ಪರ ಸುಂಕವನ್ನು ಶೇಕಡಾ ೨೦ ರಿಂದ ಶೇಕಡಾ ೧೯ ಕ್ಕೆ ಇಳಿಸಿದೆ. ಬಾಂಗ್ಲಾದೇಶದ ಮಧ್ಯಂತರ ಸರಕಾರದ ಮುಖ್ಯ ಸಲಹೆಗಾರ ಮಹಮ್ಮದ್ ಯೂನಸ್ ಅವರು ಹೇಳಿಕೆಯೊಂದರಲ್ಲಿ, ‘ಅಮೆರಿಕದ ಹತ್ತಿ ಮತ್ತು ಮಾನವ ನಿರ್ಮಿತ ನೂಲುಗಳನ್ನು ಬಳಸುವ ಬಾಂಗ್ಲಾದೇಶದ ಜವಳಿ ಉದ್ಯಮಗಳಿಗೆ ಅಮೆರಿಕವು ಒಂದು ವ್ಯವಸ್ಥೆಯನ್ನು ಸ್ಥಾಪಿಸುತ್ತದೆ’ ಎಂಬ ಬದ್ಧತೆಯನ್ನು ತೋರಿಸಿದೆ ಎಂದು ತಿಳಿಸಿದ್ದಾರೆ. ಇದರಿಂದಾಗಿ ಅಮೆರಿಕದ ಮಾರುಕಟ್ಟೆಯಲ್ಲಿ ನಮ್ಮ ಉತ್ಪನ್ನಗಳ ಮೇಲೆ ಶೂನ್ಯ ಸುಂಕ ಅನ್ವಯವಾಗಲಿದೆ ಎಂದಿದ್ದಾರೆ.

ಮತ್ತೊಂದೆಡೆ ‘ವೈಟ್ ಹೌಸ್’ ಪ್ರಕಾರ, ಬಾಂಗ್ಲಾದೇಶವು ಅಮೆರಿಕದ ರಫ್ತುಗಳಿಗೆ, ವಿಶೇಷವಾಗಿ ಸೋಯಾಬೀನ್, ಮೆಕ್ಕೆಜೋಳ, ನಾಗರಿಕ ವಿಮಾನಗಳು ಮತ್ತು ವಾಹನಗಳಿಗಾಗಿ ತನ್ನ ಮಾರುಕಟ್ಟೆಯನ್ನು ಮುಕ್ತಗೊಳಿಸಲು ಸಹಕರಿಸಲಿದೆ. ಬಾಂಗ್ಲಾದೇಶದೊಂದಿಗೆ ಪರಸ್ಪರ ಪೂರಕ ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕಿರುವುದು, ದಕ್ಷಿಣ ಏಷ್ಯಾದಲ್ಲಿಯೇ ಮೊದಲ ಉದಾಹರಣೆಯಾಗಿದೆ ಎಂದು ಅಮೆರಿಕದ ರಾಯಭಾರಿ ಜೇಮಿಸನ್ ಗ್ರೀರ್ ಹೇಳಿದ್ದಾರೆ.