ರಾಜಸ್ಥಾನ : ವಾಸ್ತವಕ್ಕಿಂತ ಹೆಚ್ಚು ಗೋವುಗಳಿವೆ ಎಂದು ಹೇಳಿ ಕೋಟ್ಯಂತರ ರೂಪಾಯಿಗಳ ಸರಕಾರಿ ಅನುದಾನ ಲೂಟಿ !

ಜೈಪುರ (ರಾಜಸ್ಥಾನ) – ಇಲ್ಲಿನ ೩೮ ಗೋಶಾಲೆಗಳು ತಮ್ಮ ಬಳಿ ವಾಸ್ತವಕ್ಕಿಂತ ಹೆಚ್ಚು ಗೋವುಗಳಿವೆ  ಎಂದು ಹೇಳಿ ಕೋಟ್ಯಂತರ ರೂಪಾಯಿಗಳ ಸರಕಾರಿ ಅನುದಾನವನ್ನು ದುರುಪಯೋಗಪಡಿಸಿಕೊಂಡ ಆಘಾತಕಾರಿ ಘಟನೆಯು ರಾಜ್ಯದ ಮಹಾಲೇಖಪಾಲರ ವರದಿಯಲ್ಲಿ ಬಹಿರಂಗಗೊಂಡಿದೆ.

ಈ ವರದಿಯ ಪ್ರಕಾರ :

೧. ಕೆಲವು ಗೋಶಾಲೆಗಳಿಗೆ ಮೃತಪಟ್ಟ ಅಥವಾ ಅನುದಾನದ ಕಾಲಾವಧಿಯಲ್ಲಿ ಅಸ್ತಿತ್ವದಲ್ಲೇ ಇಲ್ಲದ ಗೋವುಗಳ ಹೆಸರಿನಲ್ಲಿಯೂ ಕೂಡ ಅನುದಾನ ನೀಡಲಾಗಿದೆ.

೨. ದೈನಂದಿನ ಗೋವಂಶ ದಾಖಲಾತಿ ಪುಸ್ತಕ ಮತ್ತು ‘ಭಾರತ ಪಶುಧನ’ ಜಾಲತಾಣದಲ್ಲಿನ ಮಾಹಿತಿಯ ನಡುವೆ ದೊಡ್ಡ ವ್ಯತ್ಯಾಸ ಕಂಡುಬಂದಿದೆ. ಅಧಿಕಾರಿಗಳು ಯೋಗ್ಯ ಪರಿಶೀಲನೆ ನಡೆಸದೆ ಅನುದಾನ ಮಂಜೂರು ಮಾಡಿರುವುದು ವರದಿಯಲ್ಲಿ ದಾಖಲಾಗಿದೆ.

೩. ಈ ೩೮ ಗೋಶಾಲೆಗಳು ತಮ್ಮ ಅರ್ಜಿಯಲ್ಲಿ ವಾಸ್ತವಿಕ ಸಂಖ್ಯೆಗಿಂತ ೧ ಲಕ್ಷ ೩೧,೦೦೦ ಅಧಿಕ ಗೋವುಗಳಿವೆ ಎಂದು ಹೇಳಿದ್ದವು. ದೊಡ್ಡ ಗೋವುಗಳಿಗೆ ಪ್ರತಿದಿನ ೪೦ ರೂಪಾಯಿ ಮತ್ತು ಸಣ್ಣ ಕರುಗಳಿಗೆ ೨೦ ರೂಪಾಯಿಗಳ ಲೆಕ್ಕದಲ್ಲಿ ಹೆಚ್ಚುವರಿ ಹಣ ವಿತರಿಸಲಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ದೊಡ್ಡ ಗೋಶಾಲೆಗಳ ಮೇಲಿರುವ ಆರೋಪಗಳು

ವರದಿಯಲ್ಲಿ ಜೈಪುರದ ‘ಪಿಂಜರಾಪೋಲ್ ಗೋಶಾಲೆ’ಗೆ ೧ ಕೋಟಿ ೮೧ ಲಕ್ಷ ರೂಪಾಯಿ, ಹಾಗೆಯೇ ‘ಹಿಂಗೋನಿಯಾ ಗೋಶಾಲೆ’ಗೆ ೧ ಕೋಟಿ ೪೧ ಲಕ್ಷ ರೂಪಾಯಿ ಹೆಚ್ಚುವರಿ ಅನುದಾನ ದೊರೆತಿರುವುದು ಉಲ್ಲೇಖವಾಗಿದೆ. ಇದರೊಂದಿಗೆ ಡಿಗ್ ಜಿಲ್ಲೆಯ ‘ಶ್ರೀ ಬ್ರಜ ಕಾಮದ ಸುರಭಿ ವನ ಶೋಧ ಸಂಸ್ಥಾನ ಗೋಶಾಲೆ’ಗೆ ೧೬ ಕೋಟಿ ೩೬ ಲಕ್ಷ ರೂಪಾಯಿ ಮತ್ತು ಜಾಲೋರ್‌ ನ ಪಥಮೇಡಾ ದ ‘ಶ್ರೀ ಗೋಪಾಲ ಗೋವರ್ಧನ ಗೋಶಾಲೆ’ಗೆ ೧೦ ಕೋಟಿ ೯೫ ಲಕ್ಷ ರೂಪಾಯಿ ಹೆಚ್ಚುವರಿ ಹಣ ನೀಡಿರುವುದಾಗಿ ವರದಿಯಲ್ಲಿ ತಿಳಿಸಲಾಗಿದೆ.

ವಸೂಲಿ ಮಾಡಲು ಆದೇಶ

ಮಹಾಲೇಖಪಾಲರ ಈ ವರದಿಯ ನಂತರ ಗೋಪಾಲನ ಇಲಾಖೆಯು ಸಂಬಂಧಪಟ್ಟ ೩೮ ಗೋಶಾಲೆಗಳಿಂದ ೫೭ ಕೋಟಿ.೩೬ ಲಕ್ಷ್ಮ ರೂಪಾಯಿಗಳನ್ನು ವಸೂಲಿ ಮಾಡಲು ಆದೇಶಿಸಿದೆ. ಆದಾಗ್ಯೂ, ಈಗಾಗಲೇ ಮೂರು ಬಾರಿ ನೋಟಿಸ್ ನೀಡಿದ್ದರೂ ಕೂಡ ಇನ್ನು ದೊಡ್ಡ ಮೊತ್ತದ ಹಣ ಮರಳಿ ಬಂದಿಲ್ಲ ಎಂದು ಹೇಳಲಾಗಿದೆ.