ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಇರಾನ್‌ನ ಗುಪ್ತ ಮಿತ್ರ!

ವಾಷಿಂಗ್ಟನ್ (ಅಮೆರಿಕ) – ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಜನರಲ್ ಅಸಿಮ್ ಮುನೀರ್ ಅವರು ಇರಾನ್ ಸೇನೆಯ ಮುಖ್ಯಸ್ಥರೊಂದಿಗೆ ಗುಪ್ತ ಸಂಬಂಧ ಹೊಂದಿದ್ದಾರೆ ಎಂಬ ಮಾಹಿತಿ ಅಮೆರಿಕದ ಗುಪ್ತಚರ ಇಲಾಖೆಗೆ ಲಭ್ಯವಾಗಿದೆ. ಜನರಲ್ ಮುನೀರ್ ಅವರು ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವೆ *’ಗುಪ್ತ ಸಂಧಾನಕಾರ’*ನಾಗಿ ಕೆಲಸ ಮಾಡುತ್ತಿರುವುದರಿಂದ ಈ ಸಂಬಂಧವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಲಾಗಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಸತತವಾಗಿ ಜನರಲ್ ಮುನೀರ್ ಅವರನ್ನು ಶ್ಲಾಘಿಸುತ್ತಿರುವ ಬೆನ್ನಲ್ಲೇ ಈ ಮಾಹಿತಿ ಹೊರಬಂದಿದ್ದು, ಈಗ ಟ್ರಂಪ್ ಅವರು ಯಾವ ನಿರ್ಧಾರ ತೆಗೆದುಕೊಳ್ಳುತ್ತಾರೆ ಎಂಬ ಚರ್ಚೆ ಆರಂಭವಾಗಿದೆ.

೧. ಅಮೆರಿಕದ ‘ಫಾಕ್ಸ್ ನ್ಯೂಸ್’ ವಾಹಿನಿ ನೀಡಿರುವ ವರದಿಯ ಪ್ರಕಾರ, ಅಧಿಕಾರಿಗಳು ಮತ್ತು ಪ್ರಾದೇಶಿಕ ವಿಶ್ಲೇಷಕರು ಈ ಸಂಬಂಧವನ್ನು ಒಂದು ‘ಅಪಾಯದ ಮುನ್ಸೂಚನೆ’ ಎಂದು ನೋಡುತ್ತಿದ್ದಾರೆ. ವಿಶೇಷವಾಗಿ ಇರಾನ್‌ನ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ (IRGC) ನ ಹಿರಿಯ ನಾಯಕರೊಂದಿಗೆ ಮುನೀರ್ ಅವರಿಗಿರುವ ಹಳೆಯ ನಿಕಟ ಸಂಬಂಧವು, ಸಂಧಾನಕಾರನಾಗಿ ಅವರ ಪಾತ್ರವನ್ನು ಮತ್ತಷ್ಟು ಸಂಕೀರ್ಣಗೊಳಿಸುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

೨. ಈ ಸಂಬಂಧಗಳಿಂದಾಗಿ ಅಮೆರಿಕದ ಅಧಿಕಾರಿಗಳು ಮುನೀರ್ ಅವರ ರಾಜತಾಂತ್ರಿಕ ಉಪಯುಕ್ತತೆಯ ಬಗ್ಗೆ ಎಚ್ಚರಿಕೆಯ ನಿಲುವು ತಳೆದಿದ್ದಾರೆ. ಅಮೆರಿಕ ಮತ್ತು ಇರಾನ್ ಎರಡೂ ಕಡೆಗಳಲ್ಲಿ ಮುನೀರ್ ಅವರಿಗೆ ನೇರ ಪ್ರವೇಶವಿರುವುದು ಕಾರ್ಯತಂತ್ರದ ದೃಷ್ಟಿಯಿಂದ ಅಪಾಯವನ್ನುಂಟುಮಾಡಬಹುದೆಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

೩. ವಿಮರ್ಶಕರು ಇಸ್ಲಾಮಾಬಾದ್ ಅನ್ನು ಪದೇ ಪದೇ ‘ಅವಿಶ್ವಾಸಾರ್ಹ ಪಾಲುದಾರ’ ಎಂದು ಕರೆದಿದ್ದಾರೆ. ಪಾಕಿಸ್ತಾನವು ಅಮೆರಿಕದಿಂದ ದೊಡ್ಡ ಆರ್ಥಿಕ ಮತ್ತು ಮಿಲಿಟರಿ ಸಹಾಯವನ್ನು ಪಡೆಯಿತು ಮತ್ತು ಅದೇ ಸಮಯದಲ್ಲಿ ತಾಲಿಬಾನ್‌ಗೆ ಸಂಬಂಧಿಸಿದ ಗುಂಪುಗಳಿಗೆ ಆಶ್ರಯ ಕೂಡ ನೀಡಿತು.