‘ಆತ್ಮಾಹುತಿ ದಾಳಿಕೋರರ ಸಂಖ್ಯೆ ಬಹಿರಂಗಪಡಿಸಿದರೆ ತಲ್ಲಣ ಸೃಷ್ಟಿಯಾಗಬಹುದಂತೆ !’ Terrorist Masood Threatens

ಜೈಶ್-ಎ-ಮಹಮ್ಮದ್ ಮುಖ್ಯಸ್ಥ ಮಸೂದ ಅಜಹರ್ ನ ಧ್ವನಿಸಂದೇಶ

ಇಸ್ಲಾಮಾಬಾದ (ಪಾಕಿಸ್ತಾನ) – ಪಾಕಿಸ್ತಾನ ಮೂಲದ ಭಯೋತ್ಪಾದಕ ಸಂಘಟನೆ ಜೈಶ್-ಎ-ಮಹಮ್ಮದ್ ನ ಮುಖ್ಯಸ್ಥ ಮೌಲಾನಾ ಮಸೂದ್ ಅಜಹರ್ ನ ಧ್ವನಿಸಂದೇಶವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಆದರೆ ‘ಈ ಸಂದೇಶವು ನಿಖರವಾಗಿ ಯಾವಾಗ ಮತ್ತು ಎಲ್ಲಿ ಪ್ರಸಾರವಾಯಿತು ?’ ಎಂಬುದು ದೃಢಪಟ್ಟಿಲ್ಲ. ಈ ಸಂದೇಶದಲ್ಲಿ ಮಸೂದ್ ಅಜಹರ್ ತನ್ನ ಸಂಘಟನೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಆತ್ಮಾಹುತಿ ದಾಳಿಕೋರರಿದ್ದಾರೆ ಎಂದು ಪ್ರತಿಪಾದಿಸುತ್ತಿದ್ದಾನೆ. ಮಸೂದ್ ಅಜಹರ್ ಪ್ರಕಾರ, ಈ ಭಯೋತ್ಪಾದಕರು ಯಾವಾಗಲೂ ದಾಳಿಗೆ ಸಿದ್ಧರಾಗಿರುತ್ತಾರೆ. ಈ ಜನರು ೧-೨ ಅಥವಾ ೧೦೦ ಅಲ್ಲ, ಸಾವಿರವೂ ಅಲ್ಲ, ಅವರ ಒಟ್ಟು ಸಂಖ್ಯೆಯನ್ನು ಹೇಳಿದರೆ ಜಗತ್ತಿನಾದ್ಯಂತ ಮಾಧ್ಯಮಗಳಲ್ಲಿ ತಲ್ಲಣ ಮೂಡುತ್ತದೆ. ನಮ್ಮ ಜನರು ಯಾವುದೇ ಭೌತಿಕ ಬೇಡಿಕೆಗಳನ್ನು ಇಡುವುದಿಲ್ಲ. ಅವರಿಗೆ ವಾಹನ, ಹಣ, ಮಕ್ಕಳ ಶಿಕ್ಷಣ, ಸಾಲ ತೀರಿಸುವುದು, ದೂರದರ್ಶನ ಅಥವಾ ಯುರೋಪ್, ಅಮೆರಿಕಾದ ವೀಸಾ (ಒಂದು ದೇಶವನ್ನು ಪ್ರವೇಶಿಸಲು ಅಥವಾ ಅಲ್ಲಿಂದ ಪ್ರಯಾಣಿಸಲು ನೀಡುವ ಅನುಮತಿ ಪತ್ರ) ಇವುಗಳಲ್ಲಿ ಯಾವುದೂ ಬೇಡ. ಅವರಿಗೆ ಕೇವಲ ಹುತಾತ್ಮರಾಗುವುದು ಮಾತ್ರ ಬೇಕಿದೆ ಎಂದು ಅವನು ಹೇಳಿದ್ದಾನೆ.

ಭೀತಿಯಿಂದ ಮಸೂದ್ ಸಂದೇಶ ನೀಡುತ್ತಿದ್ದಾನೆ ! – ರಕ್ಷಣಾ ತಜ್ಞರು

ರಕ್ಷಣಾ ತಜ್ಞರ ಪ್ರಕಾರ, ಈ ಸಂದೇಶವು ಮಸೂದ್ ಅಜಹರ್ ನ ಭಯವನ್ನು ತೋರಿಸುತ್ತದೆ. ‘ಆಪರೇಷನ್ ಸಿಂದೂರ’ ಅಡಿಯಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಜೈಶ್-ಎ-ಮೊಹಮ್ಮದ್ ನ ಅನೇಕ ಅಡಗುತಾಣಗಳು ನಾಶವಾಗಿದ್ದವು. ಈ ಕಾರ್ಯಾಚರಣೆಯಲ್ಲಿ ಮಸೂದ್ ಅಜಹರ್ ಕುಟುಂಬದ ಸುಮಾರು ೧೦ ಸದಸ್ಯರು ಹತರಾಗಿದ್ದಾರೆ ಎಂಬ ಸುದ್ದಿಗಳೂ ಹೊರಬಂದಿದ್ದವು. ಬಹವಲ್ಪುರದಲ್ಲಿನ ಅವನ ಅಡಗುತಾಣದ ಮೇಲೆ ಭೀಕರ ಸ್ಫೋಟ ನಡೆದಿತ್ತು ಮತ್ತು ಅವನು ಕೂದಲೆಳೆ ಅಂತರದಲ್ಲಿ ಬದುಕುಳಿದಿದ್ದನು. ಅದಾದ ನಂತರ ಅವನು ಸಾರ್ವಜನಿಕ ಜೀವನದಿಂದ ನಾಪತ್ತೆಯಾಗಿದ್ದಾನೆ ಎಂದು ಹೇಳಲಾಗುತ್ತಿದೆ. ಅವನು ಯಾವುದೋ ರಹಸ್ಯ ಸ್ಥಳದಲ್ಲಿ ಕುಳಿತು ಇಂತಹ ಧ್ವನಿಸಂದೇಶಗಳನ್ನು ಪ್ರಸಾರ ಮಾಡುತ್ತಿರುತ್ತಾನೆ. ಇದರ ಹಿಂದಿನ ಉದ್ದೇಶ ಭಯವನ್ನು ಹರಡುವುದು, ತನ್ನ ಬೆಂಬಲಿಗರ ಮನೋಬಲವನ್ನು ಹೆಚ್ಚಿಸುವುದು ಮತ್ತು ತನ್ನ ದುರ್ಬಲ ಸ್ಥಿತಿಯನ್ನು ಮರೆಮಾಚುವುದೇ ಆಗಿದೆ ಎಂದು ನಂಬಲಾಗಿದೆ. ಭಾರತೀಯ ಭದ್ರತಾ ಸಂಸ್ಥೆಗಳು ಇಂತಹ ಹೇಳಿಕೆಗಳ ಮೇಲೆ ನಿರಂತರ ನಿಗಾ ಇಟ್ಟಿದ್ದು, ಯಾವುದೇ ಸಂಭವನೀಯ ಅಪಾಯವನ್ನು ಎದುರಿಸಲು ಸನ್ನದ್ಧವಾಗಿವೆ.