ಇರಾನ್‌ನ ಆತ್ಮರಕ್ಷಣೆಗೆ ಅಣುಬಾಂಬ್ ತಯಾರಿಸುವುದು ಬಿಟ್ಟರೆ ಬೇರೆ ದಾರಿಯಿಲ್ಲ!

ತೆಹ್ರಾನ್ (ಇರಾನ್) – ಇರಾನ್ ಭವಿಷ್ಯದಲ್ಲಿ ತನ್ನ ವಿರೋಧಿಗಳೊಂದಿಗೆ ಗೌರವಯುತವಾಗಿ ಮತ್ತು ಪರಿಣಾಮಕಾರಿಯಾಗಿ ಮಾತುಕತೆ ನಡೆಸಬೇಕಾದರೆ, ಬಲವಾದ ಕಾರ್ಯತಂತ್ರದ ಸಾಮರ್ಥ್ಯ ಮತ್ತು ಪರಮಾಣು ನಿರೋಧಕ ಶಕ್ತಿ (ಅಣುಬಾಂಬ್) ಹೊಂದಿರುವುದು ಅತ್ಯಗತ್ಯ. ಇರಾನ್ ಇಂತಹ ಸಾಮರ್ಥ್ಯ ಹೊಂದಿದ್ದರೆ ಮಾತ್ರ ಶಾಶ್ವತ ಶಾಂತಿ ಮತ್ತು ಭದ್ರತೆ ಸಾಧಿಸಲು ಸಾಧ್ಯ. ಇದರಿಂದಾಗಿ ಶತ್ರು ರಾಷ್ಟ್ರಗಳು ಮಿಲಿಟರಿ ಕ್ರಮ ಕೈಗೊಳ್ಳುವ ಮುನ್ನ ಹಲವು ಬಾರಿ ಯೋಚಿಸುತ್ತವೆ ಎಂದು ಇರಾನ್‌ನ ಸರಕಾರಿ ಸುದ್ದಿ ಸಂಸ್ಥೆ ‘ಫಾರ್ಸ್ ನ್ಯೂಸ್’ ತನ್ನ ‘ಅಣುಬಾಂಬ್ ತಯಾರಿಸುವುದನ್ನು ಬಿಟ್ಟರೆ ಬೇರೆ ದಾರಿಯಿಲ್ಲ’ ಎಂಬ ಲೇಖನದಲ್ಲಿ ಹೇಳಿದೆ.
ಈ ಸುದ್ದಿ ಸಂಸ್ಥೆಯನ್ನು ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ಗೆ ಹತ್ತಿರವಿರುವ ಮಾಧ್ಯಮ ಸಂಸ್ಥೆ ಎಂದು ಪರಿಗಣಿಸಲಾಗಿದೆ. ಕೆಲವು ವಾರಗಳ ಹಿಂದಷ್ಟೇ ಇರಾನ್ ಮತ್ತು ಅಮೆರಿಕ ನಡುವೆ ನಡೆದ ಪ್ರಾಥಮಿಕ ಒಪ್ಪಂದದಲ್ಲಿ, ಇರಾನ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ಅಭಿವೃದ್ಧಿಪಡಿಸುವುದಿಲ್ಲ ಎಂದು ಭರವಸೆ ನೀಡಿತ್ತು. ಆದಾಗ್ಯೂ, ಈಗ ಇರಾನ್‌ನ ಸುದ್ದಿ ಸಂಸ್ಥೆಯು ಈ ಭರವಸೆಯನ್ನು ಬದಿಗಿಟ್ಟು ಇಂತಹದೊಂದು ಅಭಿಪ್ರಾಯ ವ್ಯಕ್ತಪಡಿಸಿದೆ. ಈ ಲೇಖನವನ್ನು ಇರಾನ್ ಸರಕಾರದ ಅಧಿಕೃತ ನೀತಿ ಎಂದು ಪರಿಗಣಿಸಲಾಗದಿದ್ದರೂ, ದೇಶದೊಳಗೆ ಪರಮಾಣು ನಿರೋಧಕ ಸಾಮರ್ಥ್ಯದ ಕುರಿತು ತೀವ್ರ ಚರ್ಚೆಗಳು ನಡೆಯುತ್ತಿರುವುದನ್ನು ಇದು ಬಹಿರಂಗಪಡಿಸುತ್ತದೆ.

ಚೀನಾದ ಉದಾಹರಣೆ ನೀಡಿ ವಾದ!

1970ರ ದಶಕದ ಚೀನಾ-ಅಮೆರಿಕ ಸಂಬಂಧಗಳ ಬಗ್ಗೆ ಕೂಡ ಈ ಲೇಖನದಲ್ಲಿ ಉಲ್ಲೇಖ ಮಾಡಲಾಗಿದೆ. ಅಮೆರಿಕ ಕೂಡ ಒಂದು ಕಾಲದಲ್ಲಿ ಚೀನಾದ ಮೇಲೆ ಅಣುಬಾಂಬ್ ದಾಳಿ ಮಾಡುವುದಾಗಿ ಬೆದರಿಕೆ ಹಾಕಿತ್ತು; ಆದರೆ ಚೀನಾ ಪರಮಾಣು ಶಸ್ತ್ರಾಸ್ತ್ರಗಳನ್ನು ಅಭಿವೃದ್ಧಿಪಡಿಸಿದ ನಂತರವೇ ಉಭಯ ದೇಶಗಳ ನಡುವೆ ಗಂಭೀರ ಮಾತುಕತೆಗಳು ಆರಂಭವಾಗಲು ಸಾಧ್ಯವಾಯಿತು ಎಂದು ಹೇಳಲಾಗಿದೆ. ಕಾರ್ಯತಂತ್ರದ ಶಕ್ತಿ ಪಡೆದ ನಂತರವೇ ಚೀನಾ ಅಮೆರಿಕದೊಂದಿಗೆ ಸಮಾನ ಮಟ್ಟದಲ್ಲಿ ಮಾತುಕತೆ ನಡೆಸಲು ಸಾಧ್ಯವಾಯಿತು. ಆದ್ದರಿಂದ ಇರಾನ್ ಕೂಡ ಇದೇ ಹಾದಿಯಲ್ಲಿ ನಡೆಯುವ ಅಗತ್ಯವಿದೆ. ಪರಮಾಣು ನಿರೋಧಕ ಸಾಮರ್ಥ್ಯದ ಉದ್ದೇಶ ಯುದ್ಧವನ್ನು ಪ್ರಾರಂಭಿಸುವುದಲ್ಲ, ಬದಲಿಗೆ ಅಮೆರಿಕ ಮತ್ತು ಇಸ್ರೇಲ್‌ನಂತಹ ಪರಮಾಣು ಸಶಸ್ತ್ರ ರಾಷ್ಟ್ರಗಳೊಂದಿಗೆ ಶಕ್ತಿಯ ಸಮತೋಲನವನ್ನು ಸ್ಥಾಪಿಸುವುದಾಗಿದೆ. ಈ ಮೂಲಕ ಸಂಭಾವ್ಯ ಸಂಘರ್ಷಗಳನ್ನು ಸೀಮಿತಗೊಳಿಸಬಹುದು ಮತ್ತು ದೊಡ್ಡ ಯುದ್ಧದ ಸಾಧ್ಯತೆಯನ್ನು ಕಡಿಮೆ ಮಾಡಬಹುದು.