Corporate Jihad: ಮತಾಂತರಕ್ಕೆ ನಿರಾಕರಿಸಿದ್ದಕ್ಕಾಗಿ ‘ವಿಪ್ರೋ’ದ ಹಿಂದೂ ಮಹಿಳಾ ಉದ್ಯೋಗಿಯನ್ನು ಕೆಲಸದಿಂದ ವಜಾ !

ಪುಣೆ, ಜೂನ್ ೩ (ವಾರ್ತೆ) – ನಾಸಿಕ್‌ನ ‘ಟಿ.ಸಿ.ಎಸ್.’ನಲ್ಲಿ ನಡೆದ ಆಘಾತಕಾರಿ ಘಟನೆಯ ನಂತರ, ಮುಂಬಯಿನ ಸ್ಟೇಟ್ ಬ್ಯಾಂಕ್‌ನಲ್ಲಿನ ಲವ್ ಜಿಹಾದ್ ಪ್ರಕರಣ ಬೆಳಕಿಗೆ ಬಂದಿತ್ತು. ಈಗ ಪುಣೆಯ ‘ವಿಪ್ರೋ’ ಎಂಬ ಪ್ರತಿಷ್ಠಿತ ಸಂಸ್ಥೆಯಲ್ಲೂ ‘ಕಾರ್ಪೊರೇಟ್ ಜಿಹಾದ್’ ಮತ್ತು ಧಾರ್ಮಿಕ ಕಿರುಕುಳದ ಅತ್ಯಂತ ಗಂಭೀರ ಪ್ರಕರಣ ಮುನ್ನೆಲೆಗೆ ಬಂದಿದೆ. ಈ ಸಂಬಂಧ ಹಿಂಜವಡಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಸಂಬಂಧಪಟ್ಟ ಸಂತ್ರಸ್ತ ಹಿಂದೂ ಮಹಿಳೆಯು ಹಿಂದೂ ಜನಜಾಗೃತಿ ಸಮಿತಿ ಹಮ್ಮಿಕೊಂಡಿದ್ದ ಪತ್ರಿಕಾಗೋಷ್ಠಿಯಲ್ಲಿ ಖುದ್ದಾಗಿ ಉಪಸ್ಥಿತರಿದ್ದು, ಧೈರ್ಯದಿಂದ ಈ ಪ್ರಕರಣವನ್ನು ಬಹಿರಂಗಪಡಿಸಿದರು.

ಸಮಿತಿಯು ಈ ಆಕ್ರೋಶಕಾರಿ ಘಟನೆಯನ್ನು ತೀವ್ರವಾಗಿ ಖಂಡಿಸಿದೆ. “ಈ ಪ್ರಕರಣದಲ್ಲಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಅವರು ತಕ್ಷಣ ಗಮನಹರಿಸಿ ಇಡೀ ಪ್ರಕರಣದ ಉನ್ನತ ಮಟ್ಟದ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು” ಎಂದು ಸಮಿತಿಯ ಮಹಾರಾಷ್ಟ್ರ ಮತ್ತು ಛತ್ತೀಸ್‌ಗಢ ರಾಜ್ಯಗಳ ಸಂಘಟಕ ಶ್ರೀ. ಸುನಿಲ್ ಘನವಟ್ ಮತ್ತು ಸಂತ್ರಸ್ತ ಮಹಿಳೆ ಪತ್ರಿಕಾಗೋಷ್ಠಿಯಲ್ಲಿ ಆಗ್ರಹಿಸಿದರು.

ಪುಣೆಯ ‘ಶ್ರಮಿಕ್ ಪತ್ರಕಾರ್ ಭವನ’ದಲ್ಲಿ ನಡೆದ ಈ ಪತ್ರಿಕಾಗೋಷ್ಠಿಯಲ್ಲಿ ಸಂತ್ರಸ್ತ ಹಿಂದೂ ಮಹಿಳೆ (‘ವಿಪ್ರೋ’ದ ಮಾಜಿ ಉದ್ಯೋಗಿ), ಹಿಂದೂ ಜನಜಾಗೃತಿ ಸಮಿತಿಯ ಪುಣೆ ಜಿಲ್ಲಾ ಸಂಯೋಜಕ ಶ್ರೀ. ಪರಾಗ್ ಗೋಖಲೆ, ‘ರಾಷ್ಟ್ರಭಕ್ತ ಅಧಿವಕ್ತಾ ಸಮಿತಿ’ಯ ನ್ಯಾಯವಾದಿ ವಿವೇಕ್ ಭೋಸಲೆ, ನ್ಯಾಯವಾದಿ ಗೋಪಾಲ್ ತೇಲಂಗ್ ಮತ್ತು ರಣರಾಗಿಣಿ ಶಾಖೆಯ ಕು. ಕ್ರಾಂತಿ ಪೇಟ್ಕರ್ ಉಪಸ್ಥಿತರಿದ್ದರು.

ಏನಿದು ಪ್ರಕರಣ?

‘ವಿಪ್ರೋ’ದಲ್ಲಿ ಕೆಲಸ ಮಾಡುತ್ತಿದ್ದಾಗ ಸಂತ್ರಸ್ತೆಯ ಮೇಲೆ ಇಸ್ಲಾಂ ಧರ್ಮವನ್ನು ಸ್ವೀಕರಿಸಲು ಮತ್ತು ಮುಸ್ಲಿಂ ವ್ಯಕ್ತಿಯೊಂದಿಗೆ ದೈಹಿಕ ಸಂಬಂಧ ಹೊಂದಲು ತೀವ್ರ ಮಾನಸಿಕ ಒತ್ತಡ ಹೇರಲಾಗಿತ್ತು. ಈ ಧರ್ಮವಿರೋಧಿ ಮತ್ತು ಅನೈತಿಕ ಕೃತ್ಯವನ್ನು ಅವಳು ಕಡ್ಡಾಯವಾಗಿ ನಿರಾಕರಿಸಿ ಕಂಪನಿ ಆಡಳಿತ ಮಂಡಳಿಗೆ ದೂರು ನೀಡಿದ್ದಳು; ಆದರೆ ಆಡಳಿತ ಮಂಡಳಿಯು ಆರೋಪಿಯ ವಿರುದ್ಧ ಕ್ರಮ ಕೈಗೊಳ್ಳುವ ಬದಲಿಗೆ ಸಂತ್ರಸ್ತೆಯನ್ನೇ ಕೆಲಸದಿಂದ ವಜಾಗೊಳಿಸಿದೆ.

ಕಾರ್ಪೊರೇಟ್ ವಲಯದಲ್ಲಿ ಹಿಂದೂ ಮಹಿಳೆಯರ ಸುರಕ್ಷತೆ ಮತ್ತು ಕಂಪನಿ ಆಡಳಿತದ ಪಾರದರ್ಶಕತೆ ಪ್ರಶ್ನಾರ್ಹವಾಗಿದೆ! – ಸಂತ್ರಸ್ತೆ

ತಾನು ‘ವಿಪ್ರೋ’ದಲ್ಲಿ ಪ್ರಾಮಾಣಿಕವಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾಗ, ತನ್ನ ‘ಟೀಮ್’ (ತಂಡ) ನಲ್ಲಿದ್ದ ಶಾಹಿನಾ ರಫೀಕ್ ಎಂಬ ಮಹಿಳಾ ಸಹೋದ್ಯೋಗಿ ತನ್ನ ವೈಯಕ್ತಿಕ ಜೀವನದಲ್ಲಿ ಉದ್ದೇಶಪೂರ್ವಕವಾಗಿ ಅತಿಯಾದ ಹಸ್ತಕ್ಷೇಪ ಮಾಡಲು ಪ್ರಾರಂಭಿಸಿದಳು. ಶಾಹಿನಾ ತನಗೆ ಪರಿಚಯವಿರುವ ‘ಶೇಖ್’ ಎಂಬ ಮುಸ್ಲಿಂ ವ್ಯಕ್ತಿಯೊಂದಿಗೆ ದೈಹಿಕ ಸಂಬಂಧ ಹೊಂದುವಂತೆ, ಹಾಗೂ ತನ್ನ ಮೂಲ ಹಿಂದೂ ಧರ್ಮವನ್ನು ಬಿಟ್ಟು ಇಸ್ಲಾಂ ಧರ್ಮವನ್ನು ಸ್ವೀಕರಿಸುವಂತೆ ತುಂಬಾ ಒತ್ತಾಯಿಸುತ್ತಿದ್ದಳು. “ನೀನು ಇಸ್ಲಾಂ ಧರ್ಮವನ್ನು ಸ್ವೀಕರಿಸಿ ಮುಸ್ಲಿಂ ವ್ಯಕ್ತಿಯೊಂದಿಗೆ ಇದ್ದರೆ, ದುಬೈನಲ್ಲಿ ಐಷಾರಾಮಿ ಮತ್ತು ಶಾಂತಿಯುತ ಜೀವನ ನಡೆಸಬಹುದು” ಎಂದು ನಿರಂತರವಾಗಿ ಆಮಿಷ ಒಡ್ಡಲಾಗುತ್ತಿತ್ತು, ಎಂದು ಸಂತ್ರಸ್ತ ಹಿಂದೂ ಮಹಿಳೆ ತಿಳಿಸಿದರು. ಸತತ ಧಾರ್ಮಿಕ ಮತ್ತು ಮಾನಸಿಕ ಕಿರುಕುಳದಿಂದ ಬೇಸತ್ತ ಸಂತ್ರಸ್ತೆ ಶಾಹಿನಾಳೊಂದಿಗೆ ಮಾತನಾಡುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿ, ಕೇವಲ ಕಚೇರಿಯ ಕೆಲಸಕ್ಕೆ ಮಾತ್ರ ಸೀಮಿತ ಸಂಪರ್ಕವನ್ನು ಹೊಂದಿದ್ದಳು.

ಸಂತ್ರಸ್ತೆಯ ಪ್ರಕಾರ, ಈ ಹೆಚ್ಚುತ್ತಿರುವ ತೊಂದರೆ ಮತ್ತು ಕಿರುಕುಳದ ಬಗ್ಗೆ ಅವಳು ಕಂಪನಿಯ ಹಿರಿಯ ಅಧಿಕಾರಿಗಳಿಗೆ ಅಧಿಕೃತವಾಗಿ ದೂರು ನೀಡಿದ್ದಳು; ಆದರೆ ‘ವಿಪ್ರೋ’ ಆಡಳಿತವು ಶಾಹಿನಾ ರಫೀಕ್ ವಿರುದ್ಧ ಯಾವುದೇ ದಂಡನಾತ್ಮಕ ಅಥವಾ ತಡೆಗಟ್ಟುವ ಕ್ರಮಗಳನ್ನು ತೆಗೆದುಕೊಳ್ಳಲಿಲ್ಲ. ಬದಲಾಗಿ ಶಾಹಿನಾ ಸೇಡಿನ ಬುದ್ಧಿಯಿಂದ ಸಂತ್ರಸ್ತೆಯ ಸಂಭಾಷಣೆಯನ್ನು ರಹಸ್ಯವಾಗಿ ಮತ್ತು ಸತ್ಯವನ್ನು ತಿರುಚಿ ಧ್ವನಿಮುದ್ರಣ (ಆಡಿಯೋ ರೆಕಾರ್ಡಿಂಗ್) ಮಾಡಿ ಸುಳ್ಳು ದೂರು ನೀಡಿದಳು. ಈ ಇಡೀ ಪ್ರಕರಣದಲ್ಲಿ ಹಿರಿಯ ಅಧಿಕಾರಿಗಳು ಶಾಹಿನಾಳನ್ನು ಬಹಿರಂಗವಾಗಿ ಬೆಂಬಲಿಸಿ ಆಕೆಯ ವಿರುದ್ಧ ಕ್ರಮ ಕೈಗೊಳ್ಳಲು ನಿರಾಕರಿಸಿದರು. ಅಲ್ಲದೆ ‘ವಿಪ್ರೋ’ದ ಹೆಚ್.ಆರ್. (ಮಾನವ ಸಂಪನ್ಮೂಲ ಇಲಾಖೆ) ಮತ್ತು ಆಡಳಿತ ಸಮಿತಿಯು ಸಂತ್ರಸ್ತೆಯ ವಾದ, ಆಕೆಯ ಹಳೆಯ ದೂರು ಮತ್ತು ಪುರಾವೆಗಳನ್ನು ಸಂಪೂರ್ಣವಾಗಿ ತಿರಸ್ಕರಿಸಿ ಏಕಪಕ್ಷೀಯ ಕ್ರಮ ಕೈಗೊಂಡಿದೆ.

ಸಂತ್ರಸ್ತೆಯ ಒಪ್ಪಿಗೆಯಿಲ್ಲದೆ ಬಲವಂತವಾಗಿ ಆಕೆಯ ‘ಲ್ಯಾಪ್‌ಟಾಪ್’ನಿಂದ ರಾಜೀನಾಮೆ ಸಲ್ಲಿಕೆ!

ಆಗಸ್ಟ್ ೨೦೨೫ ರ ಕೊನೆಯಲ್ಲಿ, ಹೆಚ್.ಆರ್. ಪ್ರತಿನಿಧಿ ಪ್ರಶಾಂತ್ ಜಿ.ಆರ್. ಅವರು ಸಂತ್ರಸ್ತೆಯನ್ನು ‘ಮೈಕ್ರೋಸಾಫ್ಟ್ ಟೀಮ್ಸ್’ ಸಭೆಗೆ ಕರೆದರು. ಆ ಸಭೆಯ ಸಮಯದಲ್ಲಿ ‘ಟೆಕ್ನಿಕಲ್ ಟ್ರಿಕ್ಸ್’ (ತಾಂತ್ರಿಕ ತಂತ್ರಗಳನ್ನು) ಬಳಸಿ ಸಂತ್ರಸ್ತೆಯ ‘ಲ್ಯಾಪ್‌ಟಾಪ್’ನ ‘ಸ್ಕ್ರೀನ್ ಕಂಟ್ರೋಲ್’ ಅನ್ನು ತಮ್ಮ ಸುಪರ್ದಿಗೆ ತೆಗೆದುಕೊಂಡು, ಅವಳಿಗೆ ಯಾವುದೇ ಮುನ್ಸೂಚನೆ ನೀಡದೆ, ಆಕೆಯ ಒಪ್ಪಿಗೆಯಿಲ್ಲದೆ ಬಲವಂತವಾಗಿ ರಾಜೀನಾಮೆ ಸಲ್ಲಿಸುವಂತೆ ಮಾಡಿದರು.

ಬಲವಂತವಾಗಿ ರಾಜೀನಾಮೆ ಬರೆಸಿಕೊಳ್ಳುವುದು ಕಾರ್ಮಿಕ ಕಾಯ್ದೆಗಳ ನೇರ ಉಲ್ಲಂಘನೆ! – ನ್ಯಾಯವಾದಿ ವಿವೇಕ್ ಭೋಸಲೆ

ಯಾವುದೇ ಮುನ್ಸೂಚನೆ ಇಲ್ಲದೆ, ನೈಸರ್ಗಿಕ ನ್ಯಾಯದ ತತ್ವಗಳನ್ನು ಗಾಳಿಗೆ ತೂರಿ ಮತ್ತು ತನಿಖೆಯ ನಂತರ ತನ್ನ ಅಭಿಪ್ರಾಯವನ್ನು ಮಂಡಿಸಲು ಕಾನೂನುಬದ್ಧ ಅವಕಾಶವನ್ನು ನೀಡದೆ ಬಲವಂತವಾಗಿ ರಾಜೀನಾಮೆ ಪಡೆದುಕೊಳ್ಳುವುದು ಭಾರತೀಯ ಶ್ರಮ ಮತ್ತು ಕಾರ್ಮಿಕ ಕಾಯ್ದೆಗಳ ನೇರ ಉಲ್ಲಂಘನೆಯಾಗಿದೆ ಎಂದು ನ್ಯಾಯವಾದಿ ಭೋಸಲೆ ಈ ಸಂದರ್ಭದಲ್ಲಿ ಹೇಳಿದರು.