ರಸ್ತೆಯಲ್ಲಿ ರಾಶಿ ಮೊಳೆಗಳನ್ನು ಎಸೆದು ಟೈರ್‌ಗಳನ್ನು ಪಂಕ್ಚರ್ ಮಾಡಿ ವ್ಯಾಪಾರ ಹೆಚ್ಚಿಸುವ ಪ್ರಯತ್ನವನ್ನು ವಿಫಲಗೊಳಿಸಿದ ಟ್ರಾಫಿಕ್ ಪೊಲೀಸ್ !

ಬೆಂಗಳೂರಿನಲ್ಲಿ ನಡೆದ ಘಟನೆ

ಬೆಂಗಳೂರು – ರಸ್ತೆಯ ಮಧ್ಯದಲ್ಲಿ ಮೊಳೆಗಳನ್ನು ಎಸೆದು ವಾಹನಗಳ ಟೈರ್‌ಗಳನ್ನು ಪಂಕ್ಚರ್ ಮಾಡಲಾಗುತ್ತದೆ ಎಂಬ ವದಂತಿ ಈಗಾಗಲೇ ಇತ್ತು. ಇದೀಗ ಬೆಂಗಳೂರು ನಗರದ ಜಾಲಹಳ್ಳಿಯ ಕುವೆಂಪು ವೃತ್ತದ ಸುರಂಗಮಾರ್ಗದಲ್ಲಿ ಒಂದೇ ಕಡೆ ರಾಶಿ ಮೊಳೆಗಳು ಪತ್ತೆಯಾಗಿದ್ದು, ಸ್ವತಃ ಟ್ರಾಫಿಕ್ ಪೊಲೀಸ್ ನವರೇ ಈ ಮೊಳೆಗಳನ್ನು ತೆಗೆದು ಸ್ವಚ್ಛಗೊಳಿಸುವ ಅಭಿಯಾನ ನಡೆಸಿದ್ದಾರೆ. ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಈ ಸ್ಥಳಗಳಲ್ಲಿ ಇನ್ನೂ ಮೊಳೆಗಳು ಇರಬಹುದು; ಹೀಗಾಗಿ ಜನರು ಜಾಗೃತರಾಗಬೇಕು ಎಂದು ಪೊಲೀಸರು ಮನವಿ ಮಾಡಿದ್ದಾರೆ. ಅಲ್ಲದೆ, ಸಮೀಪದ ಪಂಕ್ಚರ್ ತೆಗೆಯುವ ಕಾರ್ಮಿಕರು ಹೆಚ್ಚಿನ ವ್ಯಾಪಾರವನ್ನು ಸೃಷ್ಟಿಸಲು ಮೊಳೆಗಳನ್ನು ಎಸೆದಿರುವ ಸಾಧ್ಯತೆಯ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.