ಫ್ರಾನ್ಸ್‌ ನಲ್ಲಿ ಬಿಸಿಲ ಬೇಗೆ; 4 ದಿನಗಳಲ್ಲಿ 1 ಸಾವಿರಕ್ಕೂ ಹೆಚ್ಚು ಜನರ ಸಾವು : France Heatwave

ಪ್ಯಾರಿಸ್ (ಫ್ರಾನ್ಸ್) – ಯುರೋಪ್‌ ನಲ್ಲಿ ಪ್ರಸ್ತುತ ತೀವ್ರವಾದ ಉಷ್ಣಗಾಳಿ ಆವರಿಸಿದೆ. ಕೇವಲ ಫ್ರಾನ್ಸ್‌ ನಲ್ಲೇ ಬಿಸಿಲ ಬೇಗೆಯಿಂದಾಗಿ 1 ಸಾವಿರಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ. ಈ ಸಾವುಗಳು ಜೂನ್ 24 ರಿಂದ ಜೂನ್ 27 ರ ನಡುವಿನ 4 ದಿನಗಳಲ್ಲಿ ಸಂಭವಿಸಿವೆ ಎಂದು ಆರೋಗ್ಯ ಸಂಸ್ಥೆ ತಿಳಿಸಿದ್ದರೂ, ಸರಕಾರದಿಂದ ಯಾವುದೇ ಅಧಿಕೃತ ಅಂಕಿ-ಅಂಶಗಳನ್ನು ನೀಡಿಲ್ಲ. ಸರಕಾರದ ಪ್ರಕಾರ ಮೃತರ ಪೈಕಿ ಶೇ. 85 ರಷ್ಟು ಜನ ವೃದ್ಧರಾಗಿದ್ದಾರೆ. ಹೆಚ್ಚಿನ ಸಾವುಗಳು ಮನೆಗಳ ಒಳಗಡೆಯೇ ಸಂಭವಿಸಿವೆ. ಅದರಲ್ಲೂ ವಿಶೇಷವಾಗಿ ರಾಜಧಾನಿ ಪ್ಯಾರಿಸ್ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಇಂತಹ ಪ್ರಕರಣಗಳು ಹೆಚ್ಚಾಗಿ ವರದಿಯಾಗಿವೆ. ತಾಪಮಾನದ ತೀವ್ರತೆಯಿಂದಾಗಿ ರಸ್ತೆಯ ಮೇಲಿನ ಡಾಂಬರು ಕರಗಲಾರಂಭಿಸಿದೆ, ಸಿಗ್ನಲ್ ವ್ಯವಸ್ಥೆಯ ಮೇಲಿನ ಪ್ಲಾಸ್ಟಿಕ್ ಕರಗಿದೆ. ಅಷ್ಟೇ ಅಲ್ಲದೆ, ಟ್ರಾಮ್ ಗಾಡಿಗಳ ಹಳಿಗಳು ಶಾಖದ ಕಾರಣದಿಂದಾಗಿ ಅಂಕು ಡೊಂಕಾಗಿವೆ. ಈ ಪರಿಸ್ಥಿತಿಯಿಂದಾಗಿ ಕಾಡುಗಳಲ್ಲಿ ಬೆಂಕಿ ಕಾಣಿಸಿಕೊಳ್ಳುತ್ತಿದೆ.

ಯುರೋಪ್‌ ನ ಜರ್ಮನಿ, ಸ್ಪೇನ್, ಬ್ರಿಟನ್, ಡೆನ್ಮಾರ್ಕ್, ಇಟಲಿ ಮತ್ತು ಸ್ವಿಟ್ಜರ್ಲ್ಯಾಂಡ್ ಸೇರಿದಂತೆ 16 ದೇಶಗಳಲ್ಲಿ ತಾಪಮಾನವು ದಶಕಗಳ ಹಿಂದಿನ ದಾಖಲೆಗಳನ್ನು ಮುರಿದಿದೆ. ಜೂನ್ 28 ರಂದು ಯುರೋಪ್‌ ನ ಸುಮಾರು 19 ಕೋಟಿ 10 ಲಕ್ಷ ಜನರು 40 ಡಿಗ್ರಿ ಸೆಲ್ಸಿಯಸ್ ಅಥವಾ ಅದಕ್ಕಿಂತ ಹೆಚ್ಚಿನ ತಾಪಮಾನವನ್ನು ಎದುರಿಸಬೇಕಾಗಿ ಬಂತು. ಯುರೋಪ್‌ ನ ತಾಪಮಾನವು ಪ್ರಪಂಚದ ಸರಾಸರಿ ತಾಪಮಾನಕ್ಕಿಂತ ಹೆಚ್ಚಿನ ವೇಗದಲ್ಲಿ ಹೆಚ್ಚುತ್ತಿದೆ ಎಂದು ವಿಜ್ಞಾನಿಗಳು ಹೇಳುತ್ತಿದ್ದಾರೆ. ಭವಿಷ್ಯದಲ್ಲಿ ಇಂತಹ ಉಷ್ಣಗಾಳಿಗಳು ಇನ್ನೂ ಹೆಚ್ಚಿನ ಬಾರಿ ಬರಲಿವೆ ಮತ್ತು ದೀರ್ಘಕಾಲದವರೆಗೆ ಇರಲಿವೆ.

ಎಸಿ ಖರೀದಿಯ ಮೇಲೆ ನಿರ್ಬಂಧಗಳು !

ಜೀವಹಿಂಡುವ ಈ ಬಿಸಿಲಿನಿಂದ ಬಚಾವಾಗಲು ಯುರೋಪ್‌ ನ ಜನರು ಅಷ್ಟು ಸುಲಭವಾಗಿ ಹವಾನಿಯಂತ್ರಣ ಯಂತ್ರವನ್ನು (ಏರ್ ಕಂಡೀಷನರ್ – ಎಸಿ) ಖರೀದಿಸಲು ಸಾಧ್ಯವಿಲ್ಲ. ಯುರೋಪ್‌ ನಲ್ಲಿನ ಕಟ್ಟುನಿಟ್ಟಾದ ಸರಕಾರಿ ನಿಯಮಗಳು, ಕಠಿಣ ಕಾಯ್ದೆಗಳು ಮತ್ತು ಗಗನಕ್ಕೇರಿರುವ ಬೆಲೆಗಳಿಂದಾಗಿ ಅಲ್ಲಿ ಎಸಿ ಖರೀದಿಸುವುದು ಒಂದು ಸವಾಲಾಗಿ ಮಾರ್ಪಟ್ಟಿದೆ. 2024 ರಲ್ಲಿ ಜಾರಿಗೆ ಬಂದ ಯುರೋಪಿಯನ್ ಯೂನಿಯನ್‌ ನ ಪರಿಷ್ಕೃತ ‘ಎಫ್-ಗ್ಯಾಸ್ ರೆಗ್ಯುಲೇಶನ್’ ಕಾಯ್ದೆಯ ಪ್ರಕಾರ, ಜಾಗತಿಕ ತಾಪಮಾನವನ್ನು ಹೆಚ್ಚಿಸುವ ಅನಿಲಗಳ ಮೇಲೆ ಭಾರಿ ತೆರಿಗೆಯನ್ನು ವಿಧಿಸಲಾಗುತ್ತದೆ ಅಥವಾ ಅವುಗಳ ಮೇಲೆ ನಿಷೇಧ ಹೇರಲಾಗುತ್ತದೆ. ಯುರೋಪಿಯನ್ ಯೂನಿಯನ್ 2050 ರ ವೇಳೆಗೆ ಸಂಬಂಧಿತ ಅನಿಲಗಳನ್ನು ಶೇ. 95 ರಷ್ಟು ಕಡಿಮೆ ಮಾಡುವ ಗುರಿಯನ್ನು ಹೊಂದಿದೆ. ಈ ಕಾರಣದಿಂದಾಗಿ ಮಾರುಕಟ್ಟೆಯಲ್ಲಿ ಹಳೆಯ ಮತ್ತು ಅಗ್ಗದ ಹವಾನಿಯಂತ್ರಣ ಯಂತ್ರಗಳು ಸಿಗುವುದು ನಿಂತುಹೋಗಿದೆ. ಹೊಸ ಮತ್ತು ಪರಿಸರಸ್ನೇಹಿಯಾದ ಹವಾನಿಯಂತ್ರಣ ಯಂತ್ರಗಳು ಮಾರುಕಟ್ಟೆಗೆ ಬರುತ್ತಿವೆಯಾದರೂ, ಅವುಗಳ ಪೂರೈಕೆ ಕಡಿಮೆಯಿದ್ದು ಬೇಡಿಕೆ ಹೆಚ್ಚಾಗಿರುವುದರಿಂದ ಅವುಗಳ ಬೆಲೆಗಳು ಗಗನಕ್ಕೇರಿವೆ. ನಿಯಮಗಳು ಕೇವಲ ಅನಿಲಗಳಿಗಷ್ಟೇ ಸೀಮಿತವಾಗಿಲ್ಲ. ಲಂಡನ್‌ ನಂತಹ ನಗರಗಳಲ್ಲಿ ಒಂದು ವೇಳೆ ಮನೆಯ ಹೊರಗೆ ಹವಾನಿಯಂತ್ರಣ ಯಂತ್ರದ ‘ಕಂಪ್ರೆಸರ್’ ಅಥವಾ ‘ಔಟ್‌ಡೋರ್ ಯೂನಿಟ್’ ಅಳವಡಿಸಬೇಕಾದರೆ, ನೀವು ಸ್ಥಳೀಯ ಮಹಾನಗರ ಪಾಲಿಕೆಯ ಅನುಮತಿಯನ್ನು ಪಡೆಯಬೇಕಾಗಬಹುದು. ಐತಿಹಾಸಿಕ ಕಟ್ಟಡಗಳು ಅಥವಾ ಸಂರಕ್ಷಿತ ಪ್ರದೇಶಗಳಲ್ಲಿ, ಹೊರಗೆ ಅಳವಡಿಸುವ ಎಸಿಯು ಕಟ್ಟಡದ ಸೌಂದರ್ಯವನ್ನು ಹಾಳುಮಾಡುತ್ತದೆ ಎಂಬ ಒಂದೇ ಕಾರಣಕ್ಕೆ ಅರ್ಜಿಯನ್ನು ತಿರಸ್ಕರಿಸಲಾಗುತ್ತದೆ. ಇದಲ್ಲದೆ, ಹವಾನಿಯಂತ್ರಣ ಯಂತ್ರದ ಶಬ್ದದಿಂದಾಗಿ ನೆರೆಹೊರೆಯವರಿಗೆ ತೊಂದರೆಯಾಗುತ್ತಿದ್ದರೆ, ಆಡಳಿತವು ಸಂಬಂಧಪಟ್ಟವರಿಗೆ ಅದನ್ನು ತೆಗೆದುಹಾಕಲು ಅಥವಾ ಶಬ್ದವನ್ನು ಕಡಿಮೆ ಮಾಡಲು ಆದೇಶಿಸಬಹುದು.

ಯುರೋಪ್‌ ನಲ್ಲಿ ಯಾವಾಗಲೂ ಹವಾಮಾನವು ಅತ್ಯಂತ ತಂಪಾಗಿರುತ್ತದೆ. ಅಲ್ಲಿನ ಮನೆಗಳ ನಿರ್ಮಾಣವನ್ನು ಚಳಿಗಾಲದ ತೀವ್ರ ಚಳಿಯಿಂದ ರಕ್ಷಿಸಿಕೊಳ್ಳುವ ದೃಷ್ಟಿಕೋನದಿಂದ ಮಾಡಲಾಗಿರುತ್ತದೆ. ಮನೆಗಳ ಗೋಡೆಗಳು ದಪ್ಪಗಿರುತ್ತವೆ ಮತ್ತು ಅಲ್ಲಿ ‘ಸೆಂಟ್ರಲೈಸ್ಡ್ ಹೀಟಿಂಗ್ ಸಿಸ್ಟಮ್’ ಇರುತ್ತದೆ, ಇದರಿಂದಾಗಿ ಒಳಗಿನ ಶಾಖವು ಹಾಗೇ ಉಳಿಯುತ್ತದೆ. ಅಲ್ಲಿ ತಾಪಮಾನವು 26 ಡಿಗ್ರಿಗೆ ತಲುಪಿದಾಗ, ‘ಹೀಟ್‌ವೇವ್’ (ಉಷ್ಣಗಾಳಿ) ಎಂದು ಘೋಷಿಸಲಾಗುತ್ತದೆ, ಆದರೆ ದಕ್ಷಿಣ ಏಷ್ಯಾದಲ್ಲಿ ಇದನ್ನು ಅತ್ಯಂತ ಆಹ್ಲಾದಕರ ಹವಾಮಾನ ಎಂದು ಪರಿಗಣಿಸಲಾಗುತ್ತದೆ. ಯುರೋಪ್‌ ನಲ್ಲಿ ಕೇವಲ ಶೇ. 20 ರಷ್ಟು ಮನೆಗಳಲ್ಲಿ ಮಾತ್ರ ಹವಾನಿಯಂತ್ರಣ ಯಂತ್ರವನ್ನು ಅಳವಡಿಸಲಾಗಿದೆ. ಅಲ್ಲಿನ ಜನರು ಇಲ್ಲಿಯವರೆಗೆ ಫ್ಯಾನ್ ಅಥವಾ ಕಿಟಕಿ-ಬಾಗಿಲುಗಳಿಂದ ಸಿಗುವ ನೈಸರ್ಗಿಕ ಗಾಳಿಯನ್ನೇ ಅವಲಂಬಿಸಿದ್ದರು; ಆದರೆ ಹವಾಮಾನ ಬದಲಾವಣೆಯು ಈಗ ಎಲ್ಲವನ್ನೂ ಬದಲಾಯಿಸಿಬಿಟ್ಟಿದೆ.