ನಾವು ಹಿಂದೂ ಧರ್ಮದ ಮೇಲಿನ ದ್ವೇಷದ ವಿರುದ್ಧ ದೃಢವಾಗಿ ನಿಲ್ಲಬೇಕು !

ವಾಷಿಂಗ್ಟನ್ (ಅಮೆರಿಕ) – ನಾವು ‘ಹಿಂದೂಫೋಬಿಯಾ’ದ (ಹಿಂದೂ ಧರ್ಮದ ಮೇಲಿನ ದ್ವೇಷ) ವಿರುದ್ಧ ದೃಢವಾಗಿ ನಿಲ್ಲಬೇಕು. ಹಿಂದೂ ಧರ್ಮದ ಮೇಲಿನ ದ್ವೇಷವನ್ನು ಖಂಡಿಸುವ ನಿರ್ಣಯವನ್ನು ಅಂಗೀಕರಿಸಿದ ಅಮೆರಿಕದ ಮೊದಲ ರಾಜ್ಯವಾಗಿ ನನ್ನ ಜಾರ್ಜಿಯಾ ಹೊರಹೊಮ್ಮಿದೆ ಎಂದು ಅಮೆರಿಕದ ಸಂಸದರಾದ ಸ್ಯಾನಫೋರ್ಡ್ ಬಿಷಪ್ ರವರು ಹೇಳಿದ್ದಾರೆ. ವಾಷಿಂಗ್ಟನ್ ಡಿ.ಸಿ.ಯಲ್ಲಿರುವ ಅಮೆರಿಕದ ಸಂಸತ್ತಿನ ಆವರಣದಲ್ಲಿ ಆಯೋಜಿಸಲಾಗಿದ್ದ ವಿಶೇಷ ಕಾರ್ಯಕ್ರಮವೊಂದರಲ್ಲಿ ಮತ್ತು ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮದ ಖಾತೆಗಳ ಮೂಲಕ ಸ್ಯಾನಫೋರ್ಡ್ ಬಿಷಪ್ ರವರು ಈ ಹೇಳಿಕೆ ನೀಡಿದ್ದಾರೆ.

ಜಾರ್ಜಿಯಾ ರಾಜ್ಯವು ಈ ನಿರ್ಣಯವನ್ನು ಏಪ್ರಿಲ್ 1, 2023 ರಂದೇ ಅಂಗೀಕರಿಸಿದೆ. ಪ್ರಸ್ತುತ ಅಮೆರಿಕದಲ್ಲಿ ‘ಹಿಂದೂ ಪರಂಪರೆ ಮಾಸ’ದ ಅಂಗವಾಗಿ ವಿಶೇಷ ಜಾಗತಿಕ ಪರಿಷತ್ತನ್ನು ಆಯೋಜಿಸಲಾಗಿತ್ತು. ಈ ಕಾರ್ಯಕ್ರಮದಲ್ಲಿ ಅಮೆರಿಕದ ಪ್ರಗತಿಗೆ ಅಲ್ಲಿನ ಹಿಂದೂ ಸಮುದಾಯ ನೀಡಿದ ಕೊಡುಗೆಯನ್ನು ಗೌರವಿಸಲಾಯಿತು. ಆ ಸಂದರ್ಭದಲ್ಲಿ ಸಂಸದ ಸ್ಯಾನಫೋರ್ಡ್ ರವರು ಮಾತನಾಡುತ್ತಿದ್ದರು.

ಕಳೆದ ಕೆಲವು ತಿಂಗಳುಗಳಲ್ಲಿ ಅಮೆರಿಕದ ಕೆಲವು ರಾಜ್ಯಗಳಲ್ಲಿ ಹಿಂದೂ ದೇವಾಲಯಗಳ ಮೇಲೆ ನಡೆದ ದಾಳಿಗಳು ಮತ್ತು ಹೆಚ್ಚುತ್ತಿರುವ ಹಿಂದೂ ದ್ವೇಷದ ಘಟನೆಗಳ ಹಿನ್ನೆಲೆಯಲ್ಲಿ ಸ್ಯಾನಫೋರ್ಡ್ ರವರು ಮಾತನಾಡುತ್ತಿದ್ದರು.