ನಮ್ಮ ಸೈನಿಕರ ಮೈ ಮುಟ್ಟಿದರೂ ಯುದ್ಧ ಭುಗಿಲೇಳುವುದು!

ವಾಷಿಂಗ್ಟನ್ (ಅಮೆರಿಕ) – ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮ ಒಪ್ಪಂದ ಅಂತಿಮ ಹಂತದಲ್ಲಿದೆ ಎಂದು ಹೇಳುತ್ತಿದ್ದ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಈಗ ಮತ್ತೆ ಇರಾನ್ ಗೆ ಬೆದರಿಕೆ ಹಾಕಿದ್ದಾರೆ. ಇದರಿಂದಾಗಿ ‘ಸ್ವತಃ ಟ್ರಂಪ್ ಅವರಿಗೇ ಈ ಯುದ್ಧವನ್ನು ನಿಲ್ಲಿಸಲು ಇಷ್ಟವಿಲ್ಲ’, ಎಂದು ಹೇಳಲಾಗುತ್ತಿದೆ. ಒಂದು ವೇಳೆ ಇರಾನ್ ಅಮೆರಿಕದ ಸೈನಿಕರನ್ನು ಗುರಿಯಾಗಿಸಿದರೆ, ಮತ್ತೆ ಯುದ್ಧ ಪ್ರಾರಂಭಿಸಲು ಒಂದು ದೃಢ ಮತ್ತು ಬಲವಾದ ಕಾರಣವಾಗುತ್ತದೆ ಎಂದು ಟ್ರಂಪ್ ಹೇಳಿದ್ದಾರೆ. ಇರಾನ್ ಹತ್ತಿರ ಈಗ ನೌಕಾಪಡೆಯೂ ಇಲ್ಲ, ವಾಯುಪಡೆಯೂ ಇಲ್ಲ. ಅಮೆರಿಕ ಇರಾನ್ ನ ನಾಯಕತ್ವವನ್ನು ಸಂಪೂರ್ಣವಾಗಿ ಧ್ವಂಸಗೊಳಿಸಿದೆ ಎಂಬ ತಮ್ಮ ಎಂದಿನ ಪ್ರಕಟಣೆಯನ್ನೂ ಟ್ರಂಪ್ ಪುನರುಚ್ಚರಿಸಿದರು. ಮುಂದುವರಿದು ಮಾತನಾಡಿದ ಟ್ರಂಪ್, ಇರಾನ್ ಯುದ್ಧದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ ಎಂಬ ಸುದ್ದಿಗಳು ಸುಳ್ಳು. ಅವರ ಬಳಿ 159 ನೌಕೆಗಳಿದ್ದವು. ಅವುಗಳೆಲ್ಲ ಇಂದು ಸಮುದ್ರದ ಆಳದಲ್ಲಿ ಭಗ್ನಾವಶೇಷಗಳಾಗಿ ಬಿದ್ದಿವೆ. ನಾವು ಅವುಗಳ ಛಾಯಾಚಿತ್ರಗಳನ್ನೂ ತೆಗೆದಿದ್ದೇವೆ ಎಂದು ಅಮೆರಿಕದ ಅಧ್ಯಕ್ಷರು ಹೇಳಿದರು.

ಟ್ರಂಪ್ ವಿರುದ್ಧ ಅಮೆರಿಕದ ಸಂಸತ್ತಿನಲ್ಲಿ ಪ್ರಸ್ತಾಪ ಅಂಗೀಕಾರ!

ಇದೇ ಸಂದರ್ಭದಲ್ಲಿ ಅಮೆರಿಕದ ಸಂಸತ್ತು (‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’) ಟ್ರಂಪ್ ವಿರುದ್ಧ ಪ್ರಸ್ತಾಪವೊಂದನ್ನು ಅಂಗೀಕರಿಸಿದೆ. ಇರಾನ್ ವಿರುದ್ಧ ಯುದ್ಧ ಘೋಷಿಸುವ ಟ್ರಂಪ್ ಅವರ ಅಧಿಕಾರವನ್ನು ಸೀಮಿತಗೊಳಿಸುವುದು ಮತ್ತು ಮಿಲಿಟರಿ ಕಾರ್ಯಾಚರಣೆಯನ್ನು ನಿಲ್ಲಿಸಲು ಅವರಿಗೆ ಒತ್ತಾಯಿಸುವುದು ಈ ಪ್ರಸ್ತಾಪದಲ್ಲಿವೆ. ವಿಶೇಷವೆಂದರೆ, ‘ಡೆಮೋಕ್ರಾಟ್ಸ್’ ಮಂಡಿಸಿದ ಈ ಪ್ರಸ್ತಾಪಕ್ಕೆ ಟ್ರಂಪ್ ಅವರ ‘ರಿಪಬ್ಲಿಕನ್ ಪಕ್ಷ’ದ 4 ಸಂಸದರು ಕೂಡ ಬೆಂಬಲ ನೀಡಿದ್ದಾರೆ. ಸಂಸತ್ತಿನ ಈ ಕ್ರಮವನ್ನು ಟ್ರಂಪ್ ‘ಒಂದು ನಿರರ್ಥಕ ಮತದಾನ’ ಎಂದು ಕಠಿಣ ಶಬ್ದಗಳಲ್ಲಿ ಖಂಡಿಸಿದ್ದಾರೆ. ವಿರೋಧಿಗಳ ಮೇಲೆ ವಾಗ್ದಾಳಿ ನಡೆಸಿದ ಟ್ರಂಪ್, ಡೆಮೋಕ್ರಾಟ್ಸ್ ‘ಟ್ರಂಪ್ ಡಿರೇಂಜ್ಮೆಂಟ್ ಸಿಂಡ್ರೋಮ್’ (ಟ್ರಂಪ್ ವಿರೋಧದ ಹುಚ್ಚು) ಎಂಬ ಮಾನಸಿಕ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಎಂದರು. ದೇಶ ಪ್ರಗತಿಯಾಗುತ್ತಿರುವುದನ್ನು ನೋಡುವ ಬದಲು, ಅವರಿಗೆ ಕೇವಲ ಟ್ರಂಪ್ ಸೋಲುವುದನ್ನು ನೋಡಬೇಕಾಗಿದೆ ಎಂದು ಟೀಕಿಸಿದರು.

ಸಂಸತ್ತಿನ ಈ ನಿರ್ಧಾರವು ಟ್ರಂಪ್ ಅವರ ಯುದ್ಧ ನೀತಿಗಳ ವಿರುದ್ಧ ಕಾಂಗ್ರೆಸ್ ನೀಡಿದ ಮೊದಲ ಯಶಸ್ವಿ ಸವಾಲು ಎಂದು ಪರಿಗಣಿಸಲಾಗಿದೆ. ಆದಾಗ್ಯೂ, ಈ ಪ್ರಸ್ತಾಪವನ್ನು ಈಗ ‘ಸೆನೆಟ್’ಗೆ ಕಳುಹಿಸಲಾಗುತ್ತದೆಯಾದರೂ, ಅಂತಿಮ ನಿರ್ಧಾರ ತೆಗೆದುಕೊಳ್ಳಲು ಟ್ರಂಪ್ ಇನ್ನೂ “ವೀಟೋ” ಅಧಿಕಾರವನ್ನು ಹೊಂದಿದ್ದಾರೆ.