ಚೀನಾದಲ್ಲಿ ವಿಚ್ಛೇದನ ಪ್ರಕರಣಗಳಲ್ಲಿ ದಾಖಲೆ ಮಟ್ಟದ ಏರಿಕೆ! – China Rise In Divorce

ಬೀಜಿಂಗ್ – ಚೀನಾದಲ್ಲಿ ವಿಚ್ಛೇದನ ಪ್ರಕರಣಗಳ ಸಂಖ್ಯೆಯಲ್ಲಿ ದಾಖಲೆ ಮಟ್ಟದ ಏರಿಕೆ ಕಂಡುಬಂದಿದೆ. ಒಟ್ಟು ವಿಚ್ಛೇದನ ಘಟನೆಗಳ ಪೈಕಿ ಶೇ. ೭೦ ರಷ್ಟು ಪ್ರಕರಣಗಳಲ್ಲಿ ಮಹಿಳೆಯರೇ ವಿಚ್ಛೇದನಕ್ಕಾಗಿ ಬೇಡಿಕೆಯಿಟ್ಟಿದ್ದಾರೆ. ವಿಚ್ಛೇದನದ ಈ ಹೆಚ್ಚುತ್ತಿರುವ ಪ್ರವೃತ್ತಿಯ ಹಿಂದೆ ಮಹಿಳೆಯರ ಆರ್ಥಿಕ ಸ್ವಾತಂತ್ರ್ಯ ಮತ್ತು ಸಾಮಾಜಿಕ ಸ್ವೀಕೃತಿಯಲ್ಲಿನ ಹೆಚ್ಚಳವು ಮುಖ್ಯ ಕಾರಣಗಳಾಗಿವೆ ಎಂದು ಸಮಾಜಶಾಸ್ತ್ರಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

೧. ನಗರಗಳಲ್ಲಿ ವಾಸಿಸುವ ಆಧುನಿಕ ಮಹಿಳೆಯರು ಈಗ ಸಮಾಜದ ಒತ್ತಡದಲ್ಲಿ ಜೀವನ ನಡೆಸುವ ಬದಲು, ಸಂಬಂಧದಿಂದ ಹೊರಬರಲು ವಿಚ್ಛೇದನದ ಆಯ್ಕೆಯನ್ನು ಆರಿಸಿಕೊಳ್ಳುತ್ತಿದ್ದಾರೆ.

೨. ಈ ಕುರಿತಾದ ಒಂದು ಅಂಕಿಅಂಶದ ಪ್ರಕಾರ, ೨೦೨೫ ರಲ್ಲಿ ೨೭ ಲಕ್ಷಕ್ಕೂ ಹೆಚ್ಚು ವಿಚ್ಛೇದನಗಳು ದಾಖಲಾಗಿವೆ. ಇದು ೨೦೨೧ ಕ್ಕೆ ಹೋಲಿಸಿದರೆ ಶೇ. ೨೮ ರಷ್ಟು ಅಧಿಕವಾಗಿದೆ.

೩. ೧೯೮೦ ರ ನಂತರ ಚೀನಾದಲ್ಲಿ ವಿವಾಹ ದರದಲ್ಲಿ ಐತಿಹಾಸಿಕ ಕುಸಿತ ಉಂಟಾಗಿದೆ. ಅವಿವಾಹಿತರಾಗಿ ಉಳಿಯುವುದು ಹೊಸ ಪ್ರತಿಷ್ಠೆಯ ಸಂಕೇತವಾಗಿ ಬದಲಾಗುತ್ತಿದೆ. ಆರ್ಥಿಕ ಮಂದಗತಿ ಮತ್ತು ಕೌಟುಂಬಿಕ ರಚನೆಯಲ್ಲಿನ ಬದಲಾವಣೆಗಳು ಈ ಪ್ರವೃತ್ತಿಗೆ ಮತ್ತಷ್ಟು ವೇಗ ನೀಡಿವೆ.

೪. ಈ ಬದಲಾವಣೆಯು ಚೀನೀ ಸಮಾಜದಲ್ಲಿ ಸಾಂಪ್ರದಾಯಿಕ ಕುಟುಂಬ ಪದ್ಧತಿಯ ಅಂತ್ಯದತ್ತ ಸಾಗುತ್ತಿರುವುದನ್ನು ಸೂಚಿಸುತ್ತದೆ. ಈಗ ಚೀನೀ ಸ್ತ್ರೀಯರು ತಮ್ಮದೇ ಆದ ಪ್ರತ್ಯೇಕ ಗುರುತು ಮತ್ತು ಆತ್ಮಗೌರವಕ್ಕಾಗಿ ವಿಚ್ಛೇದನವನ್ನು ಹೊಸ ಸಾಮಾಜಿಕ ಹಕ್ಕಿನಂತೆ ನೋಡುತ್ತಿದ್ದಾರೆ.

೫. ಚೀನಾ ಸರಕಾರವು ೨೦೨೧ ರಲ್ಲಿ ೩೦ ದಿನಗಳ ‘ಕೂಲಿಂಗ್-ಆಫ್ ಪಿರಿಯಡ್’ ಎಂಬ ಹೊಸ ನಿಯಮವನ್ನು ಜಾರಿಗೆ ತಂದಿತು. ಅಂದರೆ ವಿಚ್ಛೇದನ ನೋಂದಣಿಗೆ ಮೊದಲು ೩೦ ದಿನಗಳ ಕಡ್ಡಾಯ ಚಿಂತನಾ ಸಮಯವನ್ನು ನಿಗದಿಪಡಿಸಲಾಯಿತು. ಇದರಿಂದಾಗಿ ಆರಂಭದಲ್ಲಿ ವಿಚ್ಛೇದನಗಳ ಪ್ರಮಾಣ ಕಡಿಮೆಯಾಯಿತು; ಆದರೆ ನಂತರ ಅದು ಮತ್ತೆ ಏರಿಕೆಯಾಯಿತು.

೬. ಶಾಂಘೈನಲ್ಲಿನ ಕೌಟುಂಬಿಕ ಕಾನೂನು ನ್ಯಾಯವಾದಿ ಗುಯಿ ಫಾಂಗ್‌ ಫಾಂಗ್ ಅವರು ಹೇಳುವಂತೆ, ‘ಹಿಂದೆ ಸ್ತ್ರೀಯರು ವಿಚ್ಛೇದನಕ್ಕಾಗಿ ಸಾಮಾನ್ಯವಾಗಿ ದೊಡ್ಡ ಅನ್ಯಾಯಗಳನ್ನು ಉಲ್ಲೇಖಿಸುತ್ತಿದ್ದರು. ಉದಾಹರಣೆಗೆ – ಕೌಟುಂಬಿಕ ದೌರ್ಜನ್ಯ, ವಿವಾಹೇತರ ಸಂಬಂಧ ಅಥವಾ ಜೂಜಿನಂತಹ ಚಟಗಳು ಇತ್ಯಾದಿ. ಆದರೆ ಈಗ ಸ್ತ್ರೀಯರು ದಾಂಪತ್ಯದ ಗುಣಮಟ್ಟ ಉತ್ತಮವಾಗಿಲ್ಲ ಅಥವಾ ನಮ್ಮ ಮೌಲ್ಯಗಳು ಹೊಂದಾಣಿಕೆಯಾಗುತ್ತಿಲ್ಲ ಎಂಬ ಕಾರಣಗಳನ್ನು ನೀಡಿ ವಿಚ್ಛೇದನ ಕೇಳುತ್ತಿದ್ದಾರೆ.’