ಬಾಕಿ ಉಳಿದ ಮೊಬೈಲ್ ಡೇಟಾ ಅನ್ನು ಮರುದಿನ ಬಳಸಲು ಸಾಧ್ಯವಾಗದಿರುವುದು ಗ್ರಾಹಕರಿಗೆ ಮಾಡುತ್ತಿರುವ ಅನ್ಯಾಯ!

ರಾಜ್ಯಸಭೆ: ‘ಆಪ್’ ಸಂಸದ ರಾಘವ್ ಚಡ್ಡಾ ಅವರಿಂದ ಮೊಬೈಲ್ ಡೇಟಾ ಬಗ್ಗೆ ವಿಷಯ ಪ್ರಸ್ತಾಪ

ನವದೆಹಲಿ – ಪ್ರತಿದಿನ ನಿರ್ದಿಷ್ಟ ‘ಮೊಬೈಲ್ ಡೇಟಾ’ ಒದಗಿಸುವ ರೀಚಾರ್ಜ್ ಪ್ಲಾನ್‌ಗಳಲ್ಲಿ, ಬಳಸದೇ ಹಾಗೇ ಉಳಿದ ಡೇಟಾ ಮಧ್ಯರಾತ್ರಿಯೇ ಮುಕ್ತಾಯಗೊಳ್ಳುವ ಪದ್ಧತಿಯು ಗ್ರಾಹಕರಿಗೆ ಮಾಡುವ ಅನ್ಯಾಯವಾಗಿದೆ. ಗ್ರಾಹಕರು ಯಾವ ಡೇಟಾಕ್ಕಾಗಿ ಹಣ ಪಾವತಿಸುತ್ತಾರೋ, ಅದನ್ನು ಬಳಸದಿದ್ದರೂ ಅದು ಹೇಗೆ ಖಾಲಿಯಾಗುತ್ತದೆ? ಇದು ಕೇವಲ ತಾಂತ್ರಿಕ ವಿಷಯವಲ್ಲ, ಬದಲಿಗೆ ಕಂಪನಿಗಳ ಪೂರ್ವನಿರ್ಧರಿತ ನೀತಿಯಾಗಿದೆ. ಇದರಿಂದ ಗ್ರಾಹಕರು ಅನಗತ್ಯ ನಷ್ಟ ಅನುಭವಿಸಬೇಕಾಗುತ್ತಿದೆ ಎಂದು ರಾಜ್ಯಸಭೆಯ ಆಮ್ ಆದ್ಮಿ ಪಕ್ಷದ ಸಂಸದ ರಾಘವ್ ಚಡ್ಡಾ ಟೀಕಿಸಿದ್ದಾರೆ.

‘ಡಿಜಿಟಲ್ ಇಂಡಿಯಾ’ ನಿರ್ಮಾಣದ ಪ್ರಕ್ರಿಯೆಯಲ್ಲಿ ‘ಇಂಟರ್ನೆಟ್ ಡೇಟಾ’ ಒಂದು ಮೂಲಭೂತ ಅವಶ್ಯಕತೆ!

ರಾಘವ್ ಚಡ್ಡಾ ಅವರು ಮಾತು ಮುಂದುವರಿಸುತ್ತಾ, “ಪ್ರಸ್ತುತ ಹೆಚ್ಚಿನ ಟೆಲಿಕಾಂ ಕಂಪನಿಗಳು ಗ್ರಾಹಕರಿಗೆ ಪ್ರತಿದಿನ 1.5 GB, 2 GB ಅಥವಾ 3 GB ಡೇಟಾವನ್ನು ನೀಡುತ್ತವೆ. ಈ ಡೇಟಾ ಪ್ರತಿ 24 ಗಂಟೆಗಳಿಗೊಮ್ಮೆ ರಿಸೆಟ್ ಆಗುತ್ತದೆ. ಆದರೆ ಒಬ್ಬ ಬಳಕೆದಾರ ನಿಗದಿತ ಮಿತಿಗಿಂತ ಕಡಿಮೆ ಡೇಟಾ ಬಳಸಿದರೆ, ಬಾಕಿ ಉಳಿದ ಡೇಟಾ ಸಂಪೂರ್ಣವಾಗಿ ವ್ಯರ್ಥವಾಗುತ್ತದೆ. ಉದಾಹರಣೆಗೆ, ಗ್ರಾಹಕರಿಗೆ 2 GB ಡೇಟಾ ಸಿಕ್ಕಾಗ ಕೇವಲ 1.5 GB ಮಾತ್ರ ಬಳಸಿದರೆ, ಉಳಿದ 0.5 GB ಡೇಟಾವನ್ನು ಮರುದಿನ ಬಳಸಲು ಸಾಧ್ಯವಾಗುವುದಿಲ್ಲ. ಇದಕ್ಕೆ ಪ್ರತಿಯಾಗಿ ಹಣವನ್ನು ಮರಳಿ ನೀಡುವ ಅಥವಾ ಮರುದಿನ ಬಳಸಲು ಅವಕಾಶ ನೀಡುವ ಯಾವುದೇ ವ್ಯವಸ್ಥೆಯಿಲ್ಲ. ‘ಡಿಜಿಟಲ್ ಇಂಡಿಯಾ’ ನಿರ್ಮಾಣದ ಪ್ರಕ್ರಿಯೆಯಲ್ಲಿ ಇಂಟರ್ನೆಟ್ ಡೇಟಾ ಮೂಲಭೂತ ಅವಶ್ಯಕತೆಯಾಗಿದೆ. ಇಂತಹ ಸಂದರ್ಭದಲ್ಲಿ ಗ್ರಾಹಕರು ಹಣ ನೀಡಿ ಪಡೆದ ಡೇಟಾ ‘ಮಾಯವಾಗುವುದು’ ಸರಿಯಲ್ಲ,” ಎಂಬ ರಾಘವ್ ಅವರು ಅಭಿಪ್ರಾಯ ವ್ಯಕ್ತಪಡಿಸಿದರು.