SANATAN PRABHAT EXCLUSIVE : ಮಹಾರಾಷ್ಟ್ರ: 3-14 ವರ್ಷಗಳಿಂದ ಆಡಿಟ್ ವರದಿ ಸಲ್ಲಿಸದ 125 ಸರಕಾರಿ ಸಂಸ್ಥೆಗಳು

ಶ್ರೀ ಪ್ರೀತಮ್ ನಾಚಣಕರ್, ವಿಶೇಷ ಪ್ರತಿನಿಧಿ, ದೈನಿಕ ‘ಸನಾತನ ಪ್ರಭಾತ’

ಮುಂಬಯಿ, ಫೆಬ್ರವರಿ 25 (ವಾರ್ತೆ) – ವಿವಿಧ ಸಾಮಾಜಿಕ ವರ್ಗಗಳ ಕಲ್ಯಾಣಕ್ಕಾಗಿ ಸರಕಾರವು ವಿವಿಧ ನಿಗಮಗಳು, ಪ್ರಾಧಿಕಾರಗಳು ಇತ್ಯಾದಿಗಳನ್ನು ಸ್ಥಾಪಿಸಿದೆ. ಈ ಸರಕಾರಿ ಸಂಸ್ಥೆಗಳನ್ನು ಸರಕಾರಕ್ಕೆ ಆರ್ಥಿಕ ಲಾಭ ತಂದುಕೊಡುವ ದೃಷ್ಟಿಯಿಂದಲ್ಲ, ಬದಲಿಗೆ ಸಮಾಜದ ಹಿತದೃಷ್ಟಿಯಿಂದ ‘ಸೇವಾರ್ಥ’ವಾಗಿ ನಡೆಸಲಾಗುತ್ತಿದೆ. ಆದರೆ ಈ ‘ಸೇವಾರ್ಥ’ದ ಹೆಸರಿನಲ್ಲಿ ಸಂಸ್ಥೆಗಳ ಆರ್ಥಿಕ ದುರವಸ್ಥೆಯನ್ನು ಸಹಿಸಿಕೊಳ್ಳಲಾಗುತ್ತಿದೆ. ಡಿಸೆಂಬರ್ 14, 2025 ರವರೆಗೆ ರಾಜ್ಯದ ನಿಗಮಗಳು, ಮಂಡಳಿಗಳು, ಪ್ರಾಧಿಕಾರಗಳು, ಆಯೋಗಗಳು, ಸಂಸ್ಥೆಗಳು ಮತ್ತು ವಿಶ್ವವಿದ್ಯಾಲಯಗಳ ಒಟ್ಟು 768 ವಾರ್ಷಿಕ ವರದಿಗಳು ಬಾಕಿ ಉಳಿದಿವೆ. ಇವುಗಳಲ್ಲಿ ವಾರ್ಷಿಕ ಲೆಕ್ಕಪರಿಶೋಧನೆ (Audit) ಮತ್ತು ಕಾರ್ಯವೈಖರಿ ವರದಿಗಳು ಸೇರಿವೆ. ಇದರಲ್ಲಿ ಒಂದು ಅಥವಾ ಎರಡು ವರ್ಷ ವರದಿ ವಿಳಂಬವಾಗುವುದನ್ನು ಅರ್ಥಮಾಡಿಕೊಳ್ಳಬಹುದು; ಆದರೆ ಕೆಲವು ಸಂಸ್ಥೆಗಳ ವರದಿಗಳು ಬರೋಬ್ಬರಿ 14 ವರ್ಷಗಳಿಂದ ಬಾಕಿ ಇರುವುದು ಅತ್ಯಂತ ಕರುಣಾಜನಕ ಸ್ಥಿತಿಯಾಗಿದೆ. ಒಟ್ಟಾರೆಯಾಗಿ ಈ ಪ್ರಕರಣವು ಆಡಳಿತಾತ್ಮಕ ಶಿಸ್ತನ್ನು ಗಾಳಿಗೆ ತೂರಿದಂತಿದ್ದು, ಶಾಸನಸಭೆಗೂ ಮಾಡಿರುವ ಅವಮಾನವಾಗಿದೆ. ‘ಸನಾತನ ಪ್ರಭಾತ’ದ ವಿಶೇಷ ಪ್ರತಿನಿಧಿ ಶ್ರೀ. ಪ್ರೀತಮ್ ನಾಚಣಕರ್ ಅವರಿಗೆ ವಿಧಾನಮಂಡಲದಿಂದ ಮಾಹಿತಿ ಹಕ್ಕು ಕಾಯ್ದೆಯಡಿ ಈ ಮಾಹಿತಿ ಲಭ್ಯವಾಗಿದೆ. ಸರಕಾರ ಈ ಬಗ್ಗೆ ಗಂಭೀರವಾಗಿ ಗಮನ ಹರಿಸುವುದು ಅಗತ್ಯವಾಗಿದೆ.

ಸರಕಾರಿ ಮತ್ತು ಅರೆ-ಸರಕಾರಿ ನಿಗಮಗಳು ಪ್ರತಿ ವರ್ಷ ಸರಕಾರಕ್ಕೆ ಲೆಕ್ಕಪತ್ರಗಳನ್ನು ಸಲ್ಲಿಸುವುದು ಅತ್ಯಗತ್ಯ. ಆರ್ಥಿಕ ಶಿಸ್ತನ್ನು ಕಾಪಾಡಲು ಮತ್ತು ಅವ್ಯವಹಾರಗಳನ್ನು ತಡೆಯಲು ಈ ಸಂಸ್ಥೆಗಳು ಪ್ರತಿ ವರ್ಷ ವಾರ್ಷಿಕ ವರದಿಯನ್ನು ವಿಧಾನಮಂಡಲದಲ್ಲಿ ಮಂಡಿಸುವುದು ಕಡ್ಡಾಯವಾಗಿದೆ. ಆದರೆ ವಾರ್ಷಿಕ ವರದಿಯನ್ನು ಸಲ್ಲಿಸಲು ವಿಧಾನಮಂಡಲ ಸಚಿವಾಲಯದಿಂದ ಪದೇ ಪದೇ ಪತ್ರವ್ಯವಹಾರ ನಡೆಸಿದರೂ ಈ ಸಂಸ್ಥೆಗಳು ಅದನ್ನು ಗಣನೆಗೆ ತೆಗೆದುಕೊಳ್ಳುತ್ತಿಲ್ಲ. 3 ರಿಂದ 14 ವರ್ಷಗಳವರೆಗೆ ವರದಿ ಬಾಕಿ ಇರಿಸಿಕೊಂಡಿರುವ ಸಂಸ್ಥೆಗಳ ಸಂಖ್ಯೆ ಬರೋಬ್ಬರಿ 125 ಆಗಿದೆ. ಇದರಲ್ಲಿ ವಿಶ್ವವಿದ್ಯಾಲಯಗಳೂ ಸೇರಿವೆ.

ಅತಿ ಹೆಚ್ಚು ವಾರ್ಷಿಕ ವರದಿ ಬಾಕಿ ಇರುವ ಸಂಸ್ಥೆಗಳು!

ವರ್ಷವಾರು ಬಾಕಿ ಇರುವ ವರದಿಗಳ ವರ್ಗೀಕರಣ!

ವಿಳಂಬದ ಕಾರಣಗಳು ಕೇವಲ ಒಂದು ಔಪಚಾರಿಕತೆ!

ಬಾಕಿ ಇರುವ ವರದಿಗಳನ್ನು ವಿಧಾನಮಂಡಲದಲ್ಲಿ ಮಂಡಿಸುವಾಗ ಅದರ ಜೊತೆಗೆ ವಿಳಂಬಕ್ಕೆ ಕಾರಣಗಳನ್ನೂ ನೀಡಬೇಕು ಎಂಬ ನಿಯಮವಿದೆ. ಆದರೆ ಪ್ರಾಯೋಗಿಕವಾಗಿ ವಿಳಂಬದ ಕಾರಣ ನೀಡುವುದು ಕೇವಲ ಒಂದು ಪ್ರಕ್ರಿಯೆಯಾಗಿ ಉಳಿದಿದೆ. ವಿಳಂಬಕ್ಕೆ ನಿಖರವಾದ ಕಾರಣಗಳನ್ನು ನೀಡುವ ಬದಲು, ಬಹುತೇಕ ಸಂಸ್ಥೆಗಳು ಪ್ರಕ್ರಿಯೆಯ ಕಾಲಾನುಕ್ರಮವನ್ನು (Timeline) ನೀಡುತ್ತವೆ; ಆದರೆ ವಿಳಂಬದ ಘನವಾದ ಕಾರಣಗಳು, ಲೋಪದೋಷಗಳು ಮತ್ತು ಅವುಗಳಿಗೆ ಪರಿಹಾರ ಕ್ರಮಗಳನ್ನು ಪ್ರಸ್ತುತಪಡಿಸುವುದಿಲ್ಲ. ಆದ್ದರಿಂದ ವಿಳಂಬದ ಕಾರಣಗಳು ಕೇವಲ ಕಾಗದದ ಮೇಲಿನ ಕೆಲಸವಾಗಿದೆ.

ಈ ಬಗ್ಗೆ ವಿಧಾನಮಂಡಲ ಸಚಿವಾಲಯದ ಸಂಬಂಧಿತ ವಿಭಾಗದ ಅಧಿಕಾರಿಯೊಬ್ಬರು ಮಾತನಾಡಿ, “ನಿಗಮಗಳಿಗೆ ಲೆಕ್ಕಪರಿಶೋಧನೆಗಾಗಿ ‘ಸರಕಾರಿ ಲೆಕ್ಕಿಗರು’ (Government Auditors) ಲಭ್ಯವಾಗುತ್ತಿಲ್ಲ” ಎಂದು ತಿಳಿಸಿದ್ದಾರೆ. (ಇದಕ್ಕಿಂತ ಆಕ್ರೋಶಕಾರಿ ಅಥವಾ ಆಘಾತಕಾರಿ ಕಾರಣ ಬೇರೆ ಯಾವುದು ಇರಲು ಸಾಧ್ಯ? ಸರ್ಕಾರಿ ಸಂಸ್ಥೆಗಳಿಗೆ ಲೆಕ್ಕಪತ್ರ ಮಾಡಿಕೊಡಲು ಯಾರೂ ಸಿಗುತ್ತಿಲ್ಲ ಎಂಬ ಕಾರಣಕ್ಕೆ 14 ವರ್ಷಗಳ ಕಾಲ ವರದಿಯನ್ನೇ ಸಿದ್ಧಪಡಿಸಬಾರದೇ? ಇಂತಹ ಬೇಜವಾಬ್ದಾರಿ ಉತ್ತರಗಳನ್ನು ನೀಡುವ ಸರ್ಕಾರಿ ಸಂಸ್ಥೆಗಳ ಅಧಿಕಾರಿಗಳನ್ನು ಈಗಲೇ ಸೇವೆಯಿಂದ ವಜಾಗೊಳಿಸಬೇಕು! – ಸಂಪಾದಕರು)

ಒಟ್ಟಾರೆ ಆಡಳಿತಾತ್ಮಕ ಮತ್ತು ವಿಧಾನಮಂಡಲದ ಕಾರ್ಯಕಲಾಪಗಳ ದೃಷ್ಟಿಯಿಂದ ಈ ಪ್ರಕರಣವು ಅತ್ಯಂತ ಗಂಭೀರವಾಗಿದೆ. ಈ ವಿಷಯದ ಬಗ್ಗೆ ನಿಜವಾಗಿ ಜನಪ್ರತಿನಿಧಿಗಳು ಸದನದಲ್ಲಿ ಧ್ವನಿ ಎತ್ತಬೇಕಿತ್ತು; ಆದರೆ ಹಾಗೆ ಆಗುತ್ತಿಲ್ಲ. ಇದರಿಂದಾಗಿ ‘ಸೇವಾರ್ಥ’ದ ಹೆಸರಿನಲ್ಲಿ ಸರಕಾರಿ ನಿಗಮ, ಮಂಡಳಿ ಮತ್ತು ಪ್ರಾಧಿಕಾರಗಳ ಅಸ್ತವ್ಯಸ್ತ ಆಡಳಿತ ಹೆಚ್ಚಾಗುತ್ತಿದೆ.

ವಿಧಾನಮಂಡಲದ ಕಾರ್ಯದರ್ಶಿ ಜಿತೇಂದ್ರ ಭೋಳೆ ಅವರ ಪ್ರತಿಕ್ರಿಯೆ!

ಆಯಾ ಸಂಸ್ಥೆಯ ನಿಯಮಗಳ ಪ್ರಕಾರ ವರದಿಗಳನ್ನು ಸದನದಲ್ಲಿ ಮಂಡಿಸಲಾಗುತ್ತದೆ. ಹಿಂದೆ ವರದಿಗಳನ್ನು ಮಂಡಿಸಲು ಹೆಚ್ಚಿನ ವಿಳಂಬವಾಗುತ್ತಿತ್ತು. ಅದಕ್ಕೆ ಹೋಲಿಸಿದರೆ ಈಗ ಬದಲಾವಣೆಯಾಗಿದೆ ಎಂದು ವರದಿಗಳನ್ನು ಮಂಡಿಸುವಲ್ಲಿ ಆಗುತ್ತಿರುವ ವಿಳಂಬದ ಬಗ್ಗೆ ವಿಧಾನಮಂಡಲದ ಕಾರ್ಯದರ್ಶಿ ಜಿತೇಂದ್ರ ಭೋಳೆ ಅವರು ‘ಸನಾತನ ಪ್ರಭಾತ’ ದ ಜೊತೆ ಮಾತನಾಡುತ್ತಾ ತಮ್ಮ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.