ರಾಜಸ್ಥಾನದ ಪ್ರಸಿದ್ಧ ಉದ್ಯಮಿ ಮತ್ತು ಪ್ರಖರ ಹಿಂದುತ್ವನಿಷ್ಠ ತಾರಾಚಂದ್ ಗೋಯಲ್ ಅವರಿಂದ ಗೋವಾದ ಸನಾತನ ಆಶ್ರಮಕ್ಕೆ ಸೌಜನ್ಯದ ಭೇಟಿ!

ರಾಮನಾಥಿ (ಗೋವಾ) – ರಾಜಸ್ಥಾನ ರಾಜ್ಯದ ಕೋಟಾದ ಪ್ರಸಿದ್ಧ ಉದ್ಯಮಿ ಮತ್ತು ಪ್ರಖರ ಹಿಂದುತ್ವನಿಷ್ಠ ಶ್ರೀ. ತಾರಾಚಂದ್ ಗೋಯಲ್ ಅವರು ಇತ್ತೀಚೆಗೆ ಇಲ್ಲಿನ ಸನಾತನ ಆಶ್ರಮಕ್ಕೆ ಸೌಜನ್ಯದ ಭೇಟಿ ನೀಡಿದರು. ಈ ಸಂದರ್ಭದಲ್ಲಿ ಅವರೊಂದಿಗೆ ಅವರ ಸ್ನೇಹಿತರಾದ ಹರಿಯಾಣದ ಪಂಚಕುಲದ ಶ್ರೀ ರಮಾಕಾಂತ್ ಹಾಗೂ ಉತ್ತರಾಖಂಡದ ಡೆಹ್ರಾಡೂನ್‌ನ ಶ್ರೀ. ಕೈಲಾಶ್ ಮೈಲಾನಾ ಉಪಸ್ಥಿತರಿದ್ದರು. ಹಿಂದೂ ಜನಜಾಗೃತಿ ಸಮಿತಿಯ ರಾಜಸ್ಥಾನ ಮತ್ತು ಮಧ್ಯಪ್ರದೇಶ ರಾಜ್ಯ ಸಮನ್ವಯಕಾರರಾದ ಶ್ರೀ. ಆನಂದ್ ಜಖೋಟಿಯಾ ಹಾಗೂ ‘ಸನಾತನ ಪ್ರಭಾತ್’ನ ಉಪಸಂಪಾದಕರಾದ ಶ್ರೀ. ವಿಕ್ರಮ ಡೋಂಗ್ರೆ ಅವರು ಆಶ್ರಮದಲ್ಲಿ ನಡೆಯುತ್ತಿರುವ ರಾಷ್ಟ್ರ ಮತ್ತು ಧರ್ಮ ಪ್ರಸಾರದ ಕಾರ್ಯದ ಬಗ್ಗೆ ವಿವರವಾದ ಮಾಹಿತಿ ನೀಡಿದರು.

ಮೂವರೂ ಅತ್ಯಂತ ಶ್ರದ್ಧೆ ಮತ್ತು ಕುತೂಹಲದಿಂದ ಎಲ್ಲವನ್ನೂ ತಿಳಿದುಕೊಂಡರು. ಅಧ್ಯಾತ್ಮ, ಆಧ್ಯಾತ್ಮಿಕ ಸಂಶೋಧನೆ, ಸ್ವಭಾವದೋಷ ಮತ್ತು ಅಹಂ ನಿರ್ಮೂಲನಾ ಪ್ರಕ್ರಿಯೆಯ ಅಡಿಯಲ್ಲಿ ತಪ್ಪುಗಳನ್ನು ಬರೆಯುವ ಫಲಕ ಹಾಗೂ ಹಿಂದೂ ಸಂಘಟನೆಯ ಕಾರ್ಯ ಮುಂತಾದ ವಿಷಯಗಳು ಅವರಿಗೆ ತುಂಬಾ ಇಷ್ಟವಾದವು.

ತಪ್ಪುಗಳನ್ನು ಬರೆಯುವ ಫಲಕವನ್ನು ನೋಡಿದ ನಂತರ, ಕರ್ಮಯೋಗಿ ಮತ್ತು ಜ್ಞಾನಯೋಗಿಯಾಗಿರುವ ಶ್ರೀ. ಗೋಯಲ್ ಅವರು, ತಮ್ಮ ಜೀವನದ ವಿವಿಧ ಸಂದರ್ಭಗಳನ್ನು ಆಧ್ಯಾತ್ಮಿಕ ದೃಷ್ಟಿಕೋನದಿಂದ ಹೇಗೆ ನೋಡಲು ಪ್ರಯತ್ನಿಸುತ್ತಾರೆ ಎಂಬ ಬಗ್ಗೆ ತಮ್ಮ ಅನುಭವಗಳನ್ನು ಹಂಚಿಕೊಂಡರು. ಶ್ರೀ. ರಮಾಕಾಂತ್ ಅವರು ಹರಿಯಾಣದ ಪಂಚಕುಲದಲ್ಲಿ 1,550 ಹಸುಗಳಿರುವ ಗೋಶಾಲೆಯನ್ನು ನಡೆಸುತ್ತಿದ್ದಾರೆ. ಅಲ್ಲಿ ಅವರು ಅನಾರೋಗ್ಯ ಪೀಡಿತ ಅಥವಾ ಗಾಯಗೊಂಡ ಹಸುಗಳ ಆರೈಕೆ ಮಾಡುತ್ತಾರೆ. ಶ್ರೀ. ಮೈಲಾನಾ ಅವರು ಡೆಹ್ರಾಡೂನ್‌ನ ಉದ್ಯಮಿಯಾಗಿದ್ದಾರೆ.

ಈ ಸಂದರ್ಭದಲ್ಲಿ ಸನಾತನದ ಸಂತ ಪೂ. ಪೃಥ್ವಿರಾಜ್ ಹಜಾರೆ ಅವರು ಅತಿಥಿಗಳನ್ನು ಸತ್ಕರಿಸಿದರು.

ದೇಶವನ್ನು ಆಧ್ಯಾತ್ಮಿಕ ಮಟ್ಟದಲ್ಲಿ ಮುನ್ನಡೆಸುವ, ಯಾರೂ ಮಾಡದ ಕೆಲಸವನ್ನು ಸನಾತನ ಸಂಸ್ಥೆಯು ಮಾಡುತ್ತಿದೆ! – ತಾರಾಚಂದ್ ಗೋಯಲ್

ಈ ಸಂದರ್ಭದಲ್ಲಿ ಮಾತನಾಡಿದ ಶ್ರೀ. ಗೋಯಲ್ ಅವರು, “ಸಂಘವು (ಆರ್‌ಎಸ್‌ಎಸ್) ಹಿಂದೂ ಸಂಘಟನೆಗಾಗಿ ಕೆಲಸ ಮಾಡುತ್ತಿದೆ. ಇನ್ನೊಂದೆಡೆ ಸಮಾಜಕ್ಕೆ ಉತ್ತಮ ಆಹಾರ ಸಿಗಲೆಂದು ನಾವು ಸಾವಯವ ಕೃಷಿಗೆ ಅಗತ್ಯವಿರುವ ಆರ್ಥಿಕ ಮಟ್ಟದಲ್ಲಿ ಪ್ರಯತ್ನಿಸುತ್ತಿದ್ದೇವೆ. ಆದರೆ ನೀವು ದೇಶವನ್ನು ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಮಟ್ಟದಲ್ಲಿ ಮುನ್ನಡೆಸುತ್ತಿದ್ದೀರಿ. ಅತ್ಯಂತ ಅವಶ್ಯಕವಾದ ಮತ್ತು ಯಾರೂ ಮಾಡದ ಈ ಕಾರ್ಯವನ್ನು ನೀವು ಮಾಡುತ್ತಿದ್ದೀರಿ,” ಎಂದು ಹೇಳಿದರು.