ಸನಾತನ ಪ್ರಭಾತ > Post Type > ವಾರ್ತೆಗಳು > ಅಂತಾರಾಷ್ಟ್ರೀಯ > ನಾವು ಹಮಾಸ್, ಹಿಜ್ಬುಲ್ಲಾ ಮತ್ತು ಎಲ್ಲಾ ಇತರ ಶತ್ರುಗಳನ್ನು ಮಟ್ಟ ಹಾಕಿದ್ದೇವೆ!

ನಾವು ಹಮಾಸ್, ಹಿಜ್ಬುಲ್ಲಾ ಮತ್ತು ಎಲ್ಲಾ ಇತರ ಶತ್ರುಗಳನ್ನು ಮಟ್ಟ ಹಾಕಿದ್ದೇವೆ!

  • ವಿಶ್ವಸಂಸ್ಥೆಯ ಸಭೆ; ಇಸ್ರೇಲ್ ಪ್ರಧಾನಿ ನೆತನ್ಯಾಹೂ ಅವರ ಮಾಹಿತಿ

  • ಹಲವು ದೇಶಗಳ ರಾಯಭಾರಿಗಳಿಂದ ಭಾಷಣ ಬಹಿಷ್ಕಾರ!

ವಾಷಿಂಗ್ಟನ್ (ಅಮೆರಿಕ) – ಕಳೆದ ಒಂದು ವರ್ಷದಲ್ಲಿ ಪರಿಸ್ಥಿತಿ ಬದಲಾಗಿದೆ. ಇಸ್ರೇಲ್ ತನ್ನ ಎಲ್ಲಾ ಶತ್ರುಗಳನ್ನು ನಾಶಮಾಡಿದೆ. ನಾವು ಯೆಮೆನ್‌ನಲ್ಲಿರುವ ಹೂತಿ, ಗಾಜಾದಲ್ಲಿರುವ ಹಮಾಸ್, ಲೆಬನಾನ್‌ನಲ್ಲಿರುವ ಹಿಜ್ಬುಲ್ಲಾ, ಸಿರಿಯಾದಲ್ಲಿರುವ ಅಸಾದ್ ಮತ್ತು ಎಲ್ಲಕ್ಕಿಂತ ಮುಖ್ಯವಾಗಿ ಇರಾನ್‌ನ ಅಣು ಕಾರ್ಯಕ್ರಮವನ್ನು ನಾಶ ಮಾಡಿದ್ದೇವೆ ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹೂ ಅವರು ವಿಶ್ವಸಂಸ್ಥೆಯ ಸಭೆಯಲ್ಲಿ ಮಾಹಿತಿ ನೀಡಿದರು.

ನೆತನ್ಯಾಹೂ ಅವರ ಭಾಷಣ ಪ್ರಾರಂಭವಾಗುತ್ತಿದ್ದಂತೆ, ಅನೇಕ ದೇಶಗಳ ರಾಯಭಾರಿಗಳು ಭಾಷಣವನ್ನು ಬಹಿಷ್ಕರಿಸಿ ಸಭಾಂಗಣದಿಂದ ಹೊರನಡೆದರು. ಆದರೂ ನೆತನ್ಯಾಹೂ ಅವರು ತಮ್ಮ ಭಾಷಣವನ್ನು ಮುಂದುವರಿಸಿದರು.

ಇರಾನ್‌ನ ಅಣು ಕಾರ್ಯಕ್ರಮಗಳ ಉದ್ದೇಶ ಅಮೆರಿಕವನ್ನು ಬೆದರಿಸುವುದು! – ನೆತನ್ಯಾಹೂ

ಇರಾನ್‌ನ ಅಣು ಕಾರ್ಯಕ್ರಮವು ಕೇವಲ ಇಸ್ರೇಲ್ ಅನ್ನು ನಾಶಮಾಡಲು ಮಾತ್ರವಲ್ಲ, ಅಮೆರಿಕವನ್ನು ಬೆದರಿಸಲು ಮತ್ತು ಪ್ರಪಂಚದ ದೇಶಗಳ ಮೇಲೆ ಒತ್ತಡ ಹೇರುವುದು ಕೂಡ ಅದರ ಉದ್ದೇಶವಾಗಿದೆ ಎಂದು ನೆತನ್ಯಾಹೂ ಈ ಸಂದರ್ಭದಲ್ಲಿ ಹೇಳಿದರು. ‘ಈ ಹಿಂದೆ ನಾನು ವಿಶ್ವಸಂಸ್ಥೆಯ ಮುಂದೆ ನಿಂತಾಗ, ಇರಾನ್ ತನ್ನ ಅಣು ಮತ್ತು ಕ್ಷಿಪಣಿ ಕಾರ್ಯಕ್ರಮಗಳನ್ನು ವೇಗವಾಗಿ ಹೆಚ್ಚಿಸುತ್ತಿತ್ತು. ಅದರ ‘ಪ್ರಾಕ್ಸಿಗಳು’ (ಪ್ರತಿನಿಧಿಗಳು) ಆಗಿದ್ದ ಹಮಾಸ್ ಮತ್ತು ಹಿಜ್ಬುಲ್ಲಾ ನಿರಂತರವಾಗಿ ಇಸ್ರೇಲ್ ಅನ್ನು ಗುರಿ ಮಾಡುತ್ತಿದ್ದವು; ಆದರೆ ಈಗ ಇಸ್ರೇಲ್ ಈ ಅಪಾಯಗಳನ್ನು ದೂರ ಮಾಡಿದೆ’ ಎಂದು ಅವರು ಹೇಳಿದರು.

ಯುರೋಪಿಯನ್ ದೇಶಗಳ ವಾಯುಮಾರ್ಗವನ್ನು ಬಳಸದ ಇಸ್ರೇಲ್; ಬಂಧನವನ್ನು ತಪ್ಪಿಸಿಕೊಂಡ ನೆತನ್ಯಾಹೂ !

ಯುದ್ಧವನ್ನು ಪ್ರಚೋದಿಸುವುದು ಮತ್ತು ಉಪವಾಸವನ್ನು ಯುದ್ಧದ ಅಸ್ತ್ರವಾಗಿ ಬಳಸಿದ ಆರೋಪದ ಮೇಲೆ ಅಂತರರಾಷ್ಟ್ರೀಯ ಕ್ರಿಮಿನಲ್ ನ್ಯಾಯಾಲಯವು ನೆತನ್ಯಾಹೂ ಅವರ ವಿರುದ್ಧ ಬಂಧನ ವಾರಂಟ್ ಹೊರಡಿಸಿದೆ. ಈ ಕಾರಣದಿಂದಾಗಿ, ನೆತನ್ಯಾಹೂ ಅವರು ಫ್ರಾನ್ಸ್, ಸ್ಪೇನ್, ಪೋರ್ಚುಗಲ್, ಐರ್ಲೆಂಡ್ ಮತ್ತು ಯುನೈಟೆಡ್ ಕಿಂಗ್‌ಡಮ್ ಸೇರಿದಂತೆ ಅಂತರರಾಷ್ಟ್ರೀಯ ನ್ಯಾಯಾಲಯದ ನಿಯಮಗಳನ್ನು ಪಾಲಿಸುವ ಯುರೋಪಿಯನ್ ದೇಶಗಳ ವಾಯುಮಾರ್ಗವನ್ನು ಬಳಸುವುದನ್ನು ತಪ್ಪಿಸಿದರು. ಈ ಕಾರಣದಿಂದಾಗಿ, ಅಮೆರಿಕವನ್ನು ತಲುಪಲು ಅವರಿಗೆ ೬೦೦ ಕಿ.ಮೀ. ಹೆಚ್ಚು ದೂರ ಕ್ರಮಿಸಬೇಕಾಯಿತು.

ಆದಾಗ್ಯೂ, ಇಸ್ರೇಲಿ ಸರಕಾರವು ಈ ಮಾರ್ಗವನ್ನು ಆಯ್ಕೆ ಮಾಡಲು ಯಾವುದೇ ಅಧಿಕೃತ ಕಾರಣವನ್ನು ನೀಡಲಿಲ್ಲ; ಆದರೆ ಈ ರೀತಿಯ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಮಾಧ್ಯಮಗಳು ಹೇಳಿವೆ.

 

ಸಂಪಾದಕೀಯ ನಿಲುವು

ಶತ್ರುವನ್ನು ನಾಶಮಾಡಲು ಗೆಲ್ಲುವ ಮನೋಭಾವ ಹೊಂದಿರುವ ನೆತನ್ಯಾಹೂ ಮತ್ತು ಅವರ ಇಸ್ರೇಲ್ ರಾಷ್ಟ್ರವು ‘ಜಿಹಾದಿ ಭಯೋತ್ಪಾದನೆಯನ್ನು ಹೇಗೆ ನಿರ್ಮೂಲನೆ ಮಾಡಬೇಕು’ ಎಂಬುದಕ್ಕೆ ವರ್ತಮಾನದ ಆದರ್ಶವಾಗಿದೆ. ಭಾರತವು ಇಸ್ರೇಲ್ ನ ಈ ನೀತಿಯನ್ನು ಅಳವಡಿಸಿಕೊಳ್ಳಬೇಕು!

ಸಂಬಂಧಿತ ಲೇಖನಗಳು