ಅಮೆರಿಕಾದ ಸುಂಕ ಸಮರವನ್ನು ಭಾರತ ಮತ್ತು ಚೀನಾವು ಜಂಟಿಯಾಗಿ ಎದುರಿಸಬೇಕು ! – ಚೀನಾದ ರಾಯಭಾರಿ Chinese Ambassador Statement

ನವದೆಹಲಿ – ಭಾರತದಲ್ಲಿನ ಚೀನಾದ ರಾಯಭಾರಿ ಶೂ ಫೆಹೊಂಗ್ ಅವರು, ಟ್ರಂಪ್ ಆಡಳಿತವು ಭಾರತದ ಮೇಲೆ ವಿಧಿಸಿರುವ ಶೇ. 50ರಷ್ಟು ಆಮದು ಸುಂಕವನ್ನು ಟೀಕಿಸುತ್ತಾ, ಅದು ‘ಅನ್ಯಾಯ ಹಾಗೂ ಅನಗತ್ಯ’ ಮತ್ತು ಈ ಸವಾಲನ್ನು ಎದುರಿಸಲು ಭಾರತ ಮತ್ತು ಚೀನಾ ಜಂಟಿಯಾಗಿ ಆರ್ಥಿಕ ಸಹಕಾರವನ್ನು ಹೆಚ್ಚಿಸಬೇಕು ಎಂದು ಅವರು ಹೇಳಿದರು. ಅಮೆರಿಕಾವು ಆಮದು ಸುಂಕವನ್ನು ಅಸ್ತ್ರವನ್ನಾಗಿ ಬಳಸುತ್ತಿದೆ. ಭಾರತ ಮತ್ತು ಚೀನಾ ಇವೆರಡೂ ದೊಡ್ಡ ಉದಯೋನ್ಮುಖ ಆರ್ಥಿಕತೆಗಳಾಗಿವೆ. ನಾವು ಈ ಪರಿಸ್ಥಿತಿಯನ್ನು ಒಟ್ಟಾಗಿ ಎದುರಿಸಬೇಕು ಎಂದು ಫೆಹೊಂಗ್ ಹೇಳಿದರು.

1. ಶೂ ಫೆಹೊಂಗ್ ಅವರು ಮಾತನಾಡಿ, ಗಡಿ ವಿಷಯಗಳ ಬಗ್ಗೆ ಭಾರತ ಮತ್ತು ಚೀನಾ ನಡುವೆ ಪ್ರಮುಖ ಒಮ್ಮತಕ್ಕೆ ಬರಲಾಗಿದೆ. ಆಗಸ್ಟ್ 31ರಂದು ಶಾಂಘೈ ಸಹಕಾರ ಸಂಘಟನೆಯ ಶೃಂಗಸಭೆಯ ಸಂದರ್ಭದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಮತ್ತು ಚೀನಾದ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ನಡುವಿನ ಭೇಟಿಯಲ್ಲಿ, ಇಬ್ಬರು  ನಾಯಕರೂ ಪರಸ್ಪರ ಸಹಕಾರವನ್ನು ಹೆಚ್ಚಿಸಲು ಒತ್ತು ನೀಡಿದ್ದಾರೆ.

2. ಫೆಹೊಂಗ್ ಮಾತು ಮುಂದುವರೆಸಿ, ಭಾರತ ಮತ್ತು ಚೀನಾ ಇಬ್ಬರೂ ಭಯೋತ್ಪಾದನೆಯಿಂದ ಬಳಲುತ್ತಿವೆ. ಎರಡೂ ದೇಶಗಳು ‘ಎಸ್‌.ಸಿ.ಒ’., ‘ಬ್ರಿಕ್ಸ್’ ನಂತಹ ಬಹುಪಕ್ಷೀಯ ವೇದಿಕೆಗಳ ಮೂಲಕ ಭಯೋತ್ಪಾದನಾ-ವಿರೋಧಿ ಪ್ರಯತ್ನಗಳಲ್ಲಿ ಸಹಕರಿಸುತ್ತಿವೆ ಎಂದು ಹೇಳಿದ್ದಾರೆ.