ಹಿಂದೂ ಜನಜಾಗೃತಿ ಸಮಿತಿಯ ಬೇಡಿಕೆ; ‘ಹಿಂದೂ ಭಯೋತ್ಪಾದನೆ’ಯ ಷಡ್ಯಂತ್ರ ರೂಪಿಸಿದವರಿಗೆ ಕಠಿಣ ಶಿಕ್ಷೆಯಾಗಲೇಬೇಕು! – ಶ್ರೀ. ರಮೇಶ ಶಿಂದೆ

ಮುಂಬಯಿ – ಮಾಲೇಗಾಂವ್ ಬಾಂಬ್ ಸ್ಫೋಟ ಪ್ರಕರಣದಲ್ಲಿ ರಾಷ್ಟ್ರೀಯ ತನಿಖಾ ಸಂಸ್ಥೆಯ ನ್ಯಾಯಾಲಯವು ಎಲ್ಲಾ ಆರೋಪಿಗಳನ್ನು ನಿರ್ದೋಷಿಗಳೆಂದು ಬಿಡುಗಡೆಗೊಳಿಸಿದೆ, ಇದರಿಂದಾಗಿ ‘ಹಿಂದೂ ಭಯೋತ್ಪಾದನೆ’ ಅಥವಾ ‘ಭಗವಾ ಭಯೋತ್ಪಾದನೆ’ ಎಂಬ ಹೆಸರಿನಲ್ಲಿ ರೂಪಿಸಲಾಗಿದ್ದ ಅಸಹ್ಯಕರ ಕಾಂಗ್ರೆಸ್ ಷಡ್ಯಂತ್ರವು ಅಂತಿಮವಾಗಿ ಬಹಿರಂಗಗೊಂಡಿದೆ. ಕೇವಲ ಹಿಂದೂಗಳಾಗಿದ್ದ ಕಾರಣ ರಾಷ್ಟ್ರನಿಷ್ಠ ಸಾಧ್ವಿ ಪ್ರಜ್ಞಾಸಿಂಗ್ ಠಾಕೂರ್, ಕರ್ನಲ್ ಪುರೋಹಿತ್, ಮೇಜರ್ ಉಪಾಧ್ಯಾಯ, ಸುಧಾಕರ್ ಚತುರ್ವೇದಿ, ಸಮೀರ್ ಕುಲಕರ್ಣಿ ಮತ್ತು ಅಜಯ್ ರಾಹಿರಕರ್ ಇವರಂತಹ ಅನೇಕ ದೇಶಪ್ರೇಮಿ ವ್ಯಕ್ತಿಗಳನ್ನು ಅನಾವಶ್ಯಕವಾಗಿ ವರ್ಷಗಟ್ಟಲೆ ಜೈಲಿನಲ್ಲಿರಿಸಲಾಗಿತ್ತು. ಅವರನ್ನು ಅಮಾನವೀಯವಾಗಿ ಮಾನಸಿಕ ಮತ್ತು ದೈಹಿಕವಾಗಿ ಹಿಂಸಿಸಲಾಯಿತು. ಇದು ಕೇವಲ ಅವರ ವಿರುದ್ಧ ನಡೆದ ಅನ್ಯಾಯವಲ್ಲ, ಬದಲಿಗೆ ಇಡೀ ಹಿಂದೂ ಸಮಾಜವನ್ನು ಅಪಖ್ಯಾತಿಗೊಳಿಸುವ ದೊಡ್ಡ ವಿಷಕಾರಿ ಪಿತೂರಿಯಾಗಿತ್ತು. ಆದ್ದರಿಂದ, ಈ ಪ್ರಕರಣವನ್ನು ಈಗ ಮುಕ್ತಾಯಗೊಳಿಸಲು ಸಾಧ್ಯವಿಲ್ಲ; ಹಿಂದೂಗಳನ್ನು ಭಯೋತ್ಪಾದಕರೆಂದು ಬಿಂಬಿಸುವ ಷಡ್ಯಂತ್ರ ರೂಪಿಸಿದವರಿಗೆ ಕಠಿಣ ಶಿಕ್ಷೆಯಾಗಲೇಬೇಕು ಎಂದು ಹಿಂದೂ ಜನಜಾಗೃತಿ ಸಮಿತಿಯ ರಾಷ್ಟ್ರೀಯ ವಕ್ತಾರ ಶ್ರೀ ರಮೇಶ್ ಶಿಂದೆ ಒತ್ತಾಯಿಸಿದ್ದಾರೆ.

ಶ್ರೀ ಶಿಂದೆ ಅವರು ಮುಂದೆ ಮಾತನಾಡಿ,

1. ಮಾಲೇಗಾಂವ್ ಪ್ರಕರಣದಲ್ಲಿ ‘ಹಿಂದೂ ಭಯೋತ್ಪಾದನೆ’ ಎಂಬ ಪದವನ್ನು ಬಳಸಿದ ಆಗಿನ ಕೇಂದ್ರ ಗೃಹ ಸಚಿವ ಸುಶೀಲ್ ಕುಮಾರ್ ಶಿಂದೆ ಅವರು ನಂತರ ಅದು ತಪ್ಪೆಂದು ಬಹಿರಂಗವಾಗಿ ಒಪ್ಪಿಕೊಂಡರು; ಆದರೆ ಅವರು ಯಾರ ಸೂಚನೆಯ ಮೇರೆಗೆ ಆ ಪದವನ್ನು ಬಳಸಿದರು? ಹಿಂದೂಗಳನ್ನು ಅಪಖ್ಯಾತಿಗೊಳಿಸುವ ಹಿಂದೆ ಯಾರ ಷಡ್ಯಂತ್ರವಿತ್ತು? ಆ ಸೂತ್ರಧಾರರ ವಿರುದ್ಧವೂ ಕ್ರಮ ಕೈಗೊಳ್ಳಬೇಕು.

2. ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು ಮಧ್ಯದಲ್ಲಿ “ಈ ದೇಶದಲ್ಲಿ ಹಿಂದೂ ಭಯೋತ್ಪಾದನೆಯು ಪಾಕಿಸ್ತಾನದ ಸೇನೆಯ ಇಸ್ಲಾಮಿಕ್ ಭಯೋತ್ಪಾದನೆಗಿಂತ ದೊಡ್ಡ ಸಮಸ್ಯೆಯಾಗಿದೆ” ಎಂದು ಅಮೇರಿಕಾದ ರಾಯಭಾರಿಯ ಮುಂದೆ ಹೇಳಿಕೆ ನೀಡಿದ್ದು, ‘ವಿಕಿಲೀಕ್ಸ್ ಕೇಬಲ್’ (ಅಮೇರಿಕಾದ ಗೌಪ್ಯ ದಾಖಲೆಗಳ ಮೂಲಕ) ಮೂಲಕ ಬಹಿರಂಗಗೊಂಡಿತ್ತು. ಹಿಂದೂ ಸಮಾಜದ ಮೇಲೆ ಭಯೋತ್ಪಾದನೆಯ ಸುಳ್ಳು ಮೊಹರು ಹಾಕಿದವರು, ರಾಷ್ಟ್ರನಿಷ್ಠ ವ್ಯಕ್ತಿಗಳನ್ನು ಇದರಲ್ಲಿ ಸಿಲುಕಿಸಿದವರು ಮತ್ತು ತನಿಖೆಯ ಹೆಸರಿನಲ್ಲಿ ಅನ್ಯಾಯ ಮಾಡಿದ ಎಲ್ಲಾ ದೋಷಿಗಳನ್ನು ಪತ್ತೆ ಹಚ್ಚಿ ಅವರಿಗೆ ಕಠಿಣ ಶಿಕ್ಷೆ ನೀಡುವುದೇ ನ್ಯಾಯವಾಗಿದೆ.