ಇರಾನ್ ನಾಯಕತ್ವವನ್ನು ನಾವು ಕ್ಷಣ ಮಾತ್ರದಲ್ಲಿ ಮುಗಿಸಬಹುದು!

ವಾಷಿಂಗ್ಟನ್ (ಅಮೆರಿಕ) – ನಾವು ನಿರ್ಧರಿಸಿದರೆ, ಇರಾನ್‌ ನ ಇನ್ನುಳಿದ ಇಡೀ ನಾಯಕತ್ವವನ್ನು ಒಂದೇ ಕ್ಷಣದಲ್ಲಿ ಅಂತ್ಯಗೊಳಿಸಬಹುದೆಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಚ್ಚರಿಸಿದ್ದಾರೆ. ಇರಾನ್‌ ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಅಂತ್ಯಸಂಸ್ಕಾರದ ಹಿನ್ನೆಲೆಯಲ್ಲಿ ‘ಆಕ್ಸಿಯೋಸ್’ಗೆ ನೀಡಿದ ಸಂದರ್ಶನದಲ್ಲಿ ಅವರು ಮಾತನಾಡುತ್ತಿದ್ದರು.

ಆದಾಗ್ಯೂ, ನಮಗೆ ಇರಾನ್ ಸರಕಾರದೊಂದಿಗೆ ಮಾತುಕತೆಗಳನ್ನು ಮುಂದುವರಿಸಬೇಕಾಗಿರುವುದರಿಂದ ನಾವು ಹಾಗೆ ಮಾಡುವುದಿಲ್ಲ; ಏಕೆಂದರೆ ಅವರೆಲ್ಲರೂ ಒಂದೇ ಸ್ಥಳದಲ್ಲಿದ್ದಾರೆ, ನಾವು ಅವರನ್ನು ಮುಗಿಸಿಬಿಟ್ಟರೆ ಯಾರೊಂದಿಗೆ ಚರ್ಚೆ ಮಾಡುವುದು?, ಎಂದು ಟ್ರಂಪ್ ವ್ಯಂಗ್ಯವಾಗಿ ಪ್ರಶ್ನಿಸಿದರು.

ಟ್ರಂಪ್ ಮುಂದುವರಿದು, ‘‘ಜನರು ಖಮೇನಿ ಅವರನ್ನು ದ್ವೇಷಿಸುತ್ತಾರೆ ಎಂದು ನಾನು ಭಾವಿಸಿದ್ದೆ. ನಾಗರಿಕರು ಸುರಿಸುತ್ತಿರುವ ಕಣ್ಣೀರು ನಿಜವೋ ಅಥವಾ ನಕಲಿಯೋ?, ಎಂಬ ಬಗ್ಗೆ ನನಗೆ ಸಂಶಯವಿದೆ’’ ಎಂದರು.

ಅಮೆರಿಕದ ಬಳಿ ಸಂಸ್ಕೃತಿಯೂ ಇಲ್ಲ, ಇತಿಹಾಸ ಮತ್ತು ಗೌರವವೂ ಇಲ್ಲ! – ಇರಾನ್ ಪ್ರತ್ಯುತ್ತರ

ಟ್ರಂಪ್ ಅವರ ಈ ಹೇಳಿಕೆಗೆ ಅರ್ಮೇನಿಯಾದಲ್ಲಿರುವ ಇರಾನ್ ರಾಯಭಾರ ಕಚೇರಿಯು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತ್ಯುತ್ತರ ನೀಡಿದ್ದು, ‘ನಿಮ್ಮ ಬಳಿ ಸಂಸ್ಕೃತಿಯೂ ಇಲ್ಲ, ಇತಿಹಾಸವೂ ಇಲ್ಲ ಮತ್ತು ಗೌರವವೂ ಇಲ್ಲ’, ಎಂದು ಟೀಕಿಸಿದೆ. ಇನ್ನು ಇರಾನ್‌ ನ ಸೇನಾ ಅಧಿಕಾರಿಗಳು, ‘ನಮ್ಮ ಮೇಲೆ ದಾಳಿಯಾದರೆ ಅದಕ್ಕೆ ತಕ್ಷಣ ಮತ್ತು ಕಠಿಣ ಪ್ರತ್ಯುತ್ತರ ನೀಡಲಾಗುವುದು’, ಎಂದು ಸ್ಪಷ್ಟಪಡಿಸಿದ್ದಾರೆ. ಇರಾನ್ ವಿದೇಶಾಂಗ ಸಚಿವರಾದ ಅಬ್ಬಾಸ್ ಅರಾಘಚಿ ಕೂಡ ಪ್ರತಿಕ್ರಿಯೆ ನೀಡಿದ್ದು ‘ಇರಾನ್ ನಾಯಕತ್ವವನ್ನು ಗುರಿಯಾಗಿಸುವ ಪ್ರಯತ್ನ ಸಹಿಸುವುದಿಲ್ಲ’, ಎಂದು ಎಚ್ಚರಿಸಿದ್ದಾರೆ.

ಅಲಿ ಖಮೇನಿ ಅವರ ಅಂತ್ಯಸಂಸ್ಕಾರದ ಮೆರವಣಿಗೆ ಆರಂಭ

ಅಲಿ ಖಮೇನಿ ಅವರ ಅಂತ್ಯಸಂಸ್ಕಾರದ ಮೆರವಣಿಗೆಯು ಜುಲೈ ೩ ರಿಂದ ಟೆಹರಾನ್‌ ನಲ್ಲಿ ಆರಂಭವಾಗಿದ್ದು, ಜುಲೈ ೯ ರಂದು ಅವರ ಜನ್ಮಸ್ಥಳವಾದ ಮಶ್ಹದ್‌ ನಲ್ಲಿ ಅಂತ್ಯವಿಧಿ ನೆರವೇರಲಿದೆ. ಜುಲೈ ೩ ರಿಂದ ಜುಲೈ ೯ ರ ಅವಧಿಯಲ್ಲಿ ಇರಾನ್‌ ನಲ್ಲಿ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ.