‘ಬ್ರಿಕ್ಸ್’ ಜಾಗತಿಕ ಆರ್ಥಿಕತೆಯ ಹೊಸ ಮಹಾಶಕ್ತಿ ! – ವ್ಲಾಡಿಮಿರ್ ಪುಟಿನ್

ಮಾಸ್ಕೋ (ರಷ್ಯಾ) – ಅಮೆರಿಕದ ಏಕಸ್ವಾಮ್ಯವನ್ನು ತಿರಸ್ಕರಿಸಿ ಜಗತ್ತು ಈಗ ಬಹುಧ್ರುವೀಯವಾಗಿದೆ. ಇದಕ್ಕೆ ಒಂದು ಜೀವಂತ ಉದಾಹರಣೆ ಎಂದರೆ ‘ಬ್ರಿಕ್ಸ್’ ಸಂಘಟನೆ. ಇದರ ಮೇಲೆ ಬೆಳಕು ಚೆಲ್ಲುತ್ತಾ ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು, ಕಳೆದ 5 ವರ್ಷಗಳಲ್ಲಿ ಜಾಗತಿಕ ಒಟ್ಟು ದೇಶೀಯ ಉತ್ಪನ್ನದ ಸುಮಾರು ಅರ್ಧದಷ್ಟು (ಶೇಕಡಾ 49) ಪಾಲು ‘ಬ್ರಿಕ್ಸ್’ ದೇಶಗಳದ್ದಾಗಿದೆ ಎಂದು ಹೇಳಿದರು. ಉದಯೋನ್ಮುಖ ಮಾರುಕಟ್ಟೆಗಳು ಈಗ ಜಾಗತಿಕ ಮಟ್ಟದಲ್ಲಿ ತಮ್ಮನ್ನು ಪ್ರಮುಖ ಆರ್ಥಿಕ ಶಕ್ತಿಯಾಗಿ ಸ್ಥಾಪಿಸಿಕೊಳ್ಳುತ್ತಿವೆ ಎಂಬುದನ್ನು ಈ ಅಂಕಿಅಂಶಗಳು ತೋರಿಸುತ್ತವೆ. ಪುಟಿನ್ ಅವರು 29 ನೇ ‘ಸೇಂಟ್ ಪೀಟರ್ಸ್ಬರ್ಗ್ ಇಂಟರ್ನ್ಯಾಷನಲ್ ಎಕನಾಮಿಕ್ ಫೋರಮ್’ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡುತ್ತಿದ್ದರು.

ಪುಟಿನ್ ಮಂಡಿಸಿದ 5 ಪ್ರಮುಖ ಸೂತ್ರಗಳು !

1. ‘ಬ್ರಿಕ್ಸ್’ ಸ್ಥಾಪನೆಯಾದಾಗಿನಿಂದ ಜಾಗತಿಕ ಸರಕು ವ್ಯಾಪಾರದಲ್ಲಿ ಅದರ ಪಾಲು ದ್ವಿಗುಣಗೊಂಡಿದೆ. ಸದಸ್ಯ ರಾಷ್ಟ್ರಗಳ ನಡುವಿನ ಪರಸ್ಪರ ವ್ಯಾಪಾರವು 1 ಟ್ರಿಲಿಯನ್ ಡಾಲರ್‌ಗಳ ಗಡಿಯನ್ನು ದಾಟಿದೆ.

2. ಬ್ರಿಕ್ಸ್ ದೇಶಗಳು ಈಗ ಕೇವಲ ಸಾಂಪ್ರದಾಯಿಕ ವ್ಯಾಪಾರ ಅಥವಾ ಸರಕುಗಳ ರಫ್ತಿಗೆ ಮಾತ್ರ ಸೀಮಿತವಾಗಿಲ್ಲ. ಜಾಗತಿಕ ಉನ್ನತ-ತಂತ್ರಜ್ಞಾನದ ರಫ್ತಿನಲ್ಲಿ ಅವುಗಳ ಪಾಲು ಮೂರನೇ ಒಂದಕ್ಕಿಂತ ಹೆಚ್ಚಾಗಿದೆ.

3. ಜಾಗತಿಕ ಸಾಫ್ಟ್‌ವೇರ್ ಉದ್ಯಮದಲ್ಲಿ ಭಾರತವು ಅತ್ಯಂತ ಬಲವಾದ ಸ್ಥಾನವನ್ನು ಹೊಂದಿದೆ.

4. ಕೃತಕ ಬುದ್ಧಿಮತ್ತೆ ಸಂಶೋಧನಾ ಕ್ಷೇತ್ರದಲ್ಲಿ ಚೀನಾ ಜಾಗತಿಕ ಮಟ್ಟದಲ್ಲಿ ಮುಂಚೂಣಿಯಲ್ಲಿದೆ.

5. ರಷ್ಯಾ ಡಿಜಿಟಲ್ ಪ್ಲಾಟ್‌ಫಾರ್ಮ್, ಹಣಕಾಸು ತಂತ್ರಜ್ಞಾನ ಮತ್ತು ಪರಮಾಣು ಶಕ್ತಿ ಕ್ಷೇತ್ರದಲ್ಲಿ ಗಮನಾರ್ಹ ಪ್ರಗತಿ ಸಾಧಿಸುತ್ತಿದೆ.

‘ಬಹುಧ್ರುವೀಯ ಜಾಗತಿಕ ವ್ಯವಸ್ಥೆ’ಯನ್ನು ಸ್ಥಾಪಿಸಲು ಚೀನಾ ಮತ್ತು ರಷ್ಯಾ ಬದ್ಧ ! – ಚೀನಾ

ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಚೀನಾದ ಉಪಾಧ್ಯಕ್ಷ ಹಾನ್ ಝೆಂಗ್ ಅವರು ಜಾಗತಿಕ ಆಡಳಿತದ ನ್ಯಾಯಸಮ್ಮತ ವ್ಯವಸ್ಥೆಯ ಅಗತ್ಯವನ್ನು ಒತ್ತಿ ಹೇಳಿದರು. ಸಾರ್ವಭೌಮ ಸಮಾನತೆ, ಅಂತರರಾಷ್ಟ್ರೀಯ ಕಾನೂನು ಮತ್ತು ನಿಜವಾದ ಅರ್ಥದಲ್ಲಿ ಬಹುಪಕ್ಷೀಯ ಸಹಕಾರದ ಆಧಾರದ ಮೇಲೆ ‘ಬಹುಧ್ರುವೀಯ ಜಾಗತಿಕ ವ್ಯವಸ್ಥೆ’ಯನ್ನು ಸ್ಥಾಪಿಸಲು ಚೀನಾ ಮತ್ತು ರಷ್ಯಾ ಬದ್ಧವಾಗಿವೆ ಎಂದು ಅವರು ಹೇಳಿದರು.