ಭಾರತೀಯರ ವಿರುದ್ಧ ಜನಾಂಗೀಯ ನಿಂದನೆ ಮಾಡುವವರು ಅಮೆರಿಕದ ಪ್ರತಿನಿಧಿಗಳಲ್ಲ, ಪ್ರತಿಯೊಂದು ದೇಶದಲ್ಲೂ ಕೆಲವು ಮೂರ್ಖ ಜನರಿರುತ್ತಾರೆ !

ನವ ದೆಹಲಿ – ಅಮೆರಿಕದ ವಿದೇಶಾಂಗ ಸಚಿವ ಮಾರ್ಕೊ ರುಬಿಯೋ ಅವರು ಅಮೆರಿಕದಲ್ಲಿ ಭಾರತೀಯರ ವಿರುದ್ಧ ನಡೆಯುತ್ತಿರುವ ಜನಾಂಗೀಯ ನಿಂದನೆ ಮತ್ತು ತಾರತಮ್ಯದ ಕುರಿತು ಪತ್ರಿಕಾಗೋಷ್ಠಿಯಲ್ಲಿ ಕೇಳಿದ ಪ್ರಶ್ನೆಗೆ ಉತ್ತರಿಸಿದರು. ಇಂತಹ ಹೇಳಿಕೆಗಳು ಸಂಪೂರ್ಣ ಅಮೆರಿಕನ್ ಸಮಾಜವನ್ನು ಪ್ರತಿನಿಧಿಸುವುದಿಲ್ಲ ಎಂದು ಅವರು ಹೇಳಿದರು. ಪ್ರತಿಯೊಂದು ದೇಶದಲ್ಲೂ ಆನ್‌ ಲೈನ್‌ ನಲ್ಲಿ ಅಥವಾ ಸಾರ್ವಜನಿಕ ಸ್ಥಳಗಳಲ್ಲಿ ಆಕ್ಷೇಪಾರ್ಹ ವಿಷಯಗಳನ್ನು ಮಾತನಾಡುವ ಕೆಲವು ಮೂರ್ಖ ಜನರಿರುತ್ತಾರೆ; ಆದರೆ ಇದರಿಂದ ಯಾವುದೇ ದೇಶದ ನೈಜ ಗುರುತು ನಿರ್ಧಾರವಾಗುವುದಿಲ್ಲ ಎಂದು ಹೇಳಿದರು. ಭಾರತದ ವಿದೇಶಾಂಗ ಸಚಿವ ಡಾ. ಎಸ್. ಜೈಶಂಕರ್ ಅವರೊಂದಿಗೆ ಜಂಟಿ ಪತ್ರಿಕಾಗೋಷ್ಠಿಯನ್ನು ಹಮ್ಮಿಕೊಳ್ಳಲಾಗಿತ್ತು.

ಪಾಕಿಸ್ತಾನದಲ್ಲಿ ಸಕ್ರಿಯವಾಗಿರುವ ಭಯೋತ್ಪಾದಕ ಸಂಘಟನೆಗಳು ಭಾರತವನ್ನು ಗುರಿಯಾಗಿಸುತ್ತಿರುವುದರಿಂದ ಪಾಕ್ ಕುರಿತಾದ ಭಾರತದ ಕಳವಳ ನ್ಯಾಯಸಮ್ಮತವಾಗಿದೆ !

ಪಾಕಿಸ್ತಾನದ ಕುರಿತು ಭಾರತಕ್ಕಿರುವ ಕಳವಳಗಳು ಸಂಪೂರ್ಣವಾಗಿ ನ್ಯಾಯಸಮ್ಮತವಾಗಿವೆ; ಏಕೆಂದರೆ ಪಾಕಿಸ್ತಾನದ ನೆಲದಲ್ಲಿ ಸಕ್ರಿಯವಾಗಿರುವ ಭಯೋತ್ಪಾದಕ ಸಂಘಟನೆಗಳು ದೀರ್ಘಕಾಲದಿಂದ ಭಾರತವನ್ನು ಗುರಿಯಾಗಿಸುತ್ತಿವೆ ಎಂದು ರುಬಿಯೋ ಒಪ್ಪಿಕೊಂಡರು. ಅವರು ಮುಂದುವರಿದು, ಅಮೆರಿಕ-ಇರಾನ್ ಯುದ್ಧದಲ್ಲಿ ಪಾಕಿಸ್ತಾನದ ಮಧ್ಯಸ್ಥಿಕೆ ಅಥವಾ ಸಹಭಾಗಿತ್ವದ ಪಾತ್ರದ ಬಗ್ಗೆ ಭಾರತದ ಕಡೆಯಿಂದ ಯಾವುದೇ ಆಕ್ಷೇಪಣೆ ಅಥವಾ ದೂರು ಬಂದಿಲ್ಲ ಎಂದು ಹೇಳಿದರು. ಭಾರತ ಮತ್ತು ಪಾಕಿಸ್ತಾನದ ನಡುವಿನ ವಿಷಯಗಳು ವಿಭಿನ್ನ ಸ್ವರೂಪದ್ದಾಗಿವೆ ಹಾಗೂ ಇರಾನ್ ಸಂಬಂಧಿತ ಪ್ರಕರಣಗಳಲ್ಲಿ ಪಾಕಿಸ್ತಾನದ ಪಾತ್ರವು ಚರ್ಚೆಯ ಭಾಗವಾಗಿಲ್ಲ ಎಂದು ಹೇಳಿದರು.