ವೃದ್ಧನ ಕೊಲೆ ಪ್ರಕರಣ: ಕುಖ್ಯಾತ ಗೂಂಡಾ ಸಾಧಿಕ್ ಕಾಲಿಯಾನ್ ಸೋದರಳಿಯ ಸೇರಿ ಇಬ್ಬರ ಬಂಧನ!

ಮುಂಬಯಿ – ೧೯೯೯ರ ಎನ್‌ ಕೌಂಟರ್‌ ನಲ್ಲಿ ಹತನಾದ ಕುಖ್ಯಾತ ಗೂಂಡಾ ಸಾಧಿಕ್ ಕಾಲಿಯಾ ಸೋದರಳಿಯ ಸಾಧಿಕ್ ಜವಾರ್ (೨೯ ವರ್ಷ), ‘ನನ್ನ ಚಿಕ್ಕಪ್ಪನನ್ನು ಪೊಲೀಸರು ಕೊಂದರು, ಅದರಲ್ಲಿ ಇಕ್ಬಾಲ್ ಇಬ್ರಾಹಿಂ ಸೇಲಿಯಾ (೭೮ ವರ್ಷ) ಎಂಬುವವರ ಕೈವಾಡವಿತ್ತು’ ಎಂಬ ಕೋಪವನ್ನು ಮನಸ್ಸಿನಲ್ಲಿಟ್ಟುಕೊಂಡಿದ್ದನು. ಇದರ ಸೇಡಿಗಾಗಿ ಸಾಧಿಕ್ ಜವಾರ್, ಇಕ್ಬಾಲ್ ಇಬ್ರಾಹಿಂ ಸೇಲಿಯಾ ಎಂಬ ವೃದ್ಧನನ್ನು ಹತ್ಯೆ ಮಾಡಿದ್ದಾನೆ. ಪೊಲೀಸರು ಸಾದಿಕ್ ಜವಾರ್ ಮತ್ತು ಆತನ ಸಹಚರ ನೌಶಾದ್ ಮಿಥಾನಿ (೨೨ ವರ್ಷ) ಎಂಬುವವರನ್ನು ನಾಗಪುರದಲ್ಲಿ ಬಂಧಿಸಿದ್ದಾರೆ.

೧. ಇಕ್ಬಾಲ್ ಇಬ್ರಾಹಿಂ ಸೇಲಿಯಾ ಅವರು ತಮ್ಮ ಮನೆಯಲ್ಲಿ ಒಬ್ಬರೇ ಇದ್ದರು. ಕುಟುಂಬದ ಇತರ ಸದಸ್ಯರು ಹೊರಗಡೆ ಹೋಗಿರುವುದನ್ನು ಗಮನಿಸಿ ಅವಕಾಶ ಪಡೆದ ಇಬ್ಬರು ಯುವಕರು ಮನೆಯೊಳಗೆ ನುಗ್ಗಿದರು. ಹರಿತವಾದ ಆಯುಧದಿಂದ ಸೇಲಿಯಾ ಅವರ ಮೇಲೆ ಮನಬಂದಂತೆ ಇರಿದರು. ಇದರಿಂದ ಸೇಲಿಯಾ ಅವರು ಸ್ಥಳದಲ್ಲೇ ಸಾವನ್ನಪ್ಪಿದರು. ಕೊಲೆಯ ನಂತರ ಆರೋಪಿಗಳು ಪರಾರಿಯಾದರು.

೨. ಇಕ್ಬಾಲ್ ಸೇಲಿಯಾ ಅವರು ಪೊಲೀಸರ ಮಾಹಿತಿದಾರರಾಗಿದ್ದರು ಎಂಬುದು ಸಾದಿಕ್ ಜವಾರ್ ನ ದೃಢ ನಂಬಿಕೆಯಾಗಿತ್ತು. ಅವರ ಮಾಹಿತಿಯಿಂದಲೇ ೧೯೯೯ರಲ್ಲಿ ಸಾದಿಕ್ ಕಾಲಿಯಾ ಘರ್ಷಣೆಯಲ್ಲಿ ಹತನಾಗಿದ್ದನು. ಹಲವು ವರ್ಷಗಳಿಂದ ಈ ಸೇಡನ್ನು ಮನಸ್ಸಿನಲ್ಲಿಟ್ಟುಕೊಂಡಿದ್ದ ಜವಾರ್, ಸೇಲಿಯಾ ಅವರನ್ನು ಕೊಲ್ಲಲು ಸಂಚು ರೂಪಿಸಿದ್ದನು.

೩. ಸಾದಿಕ್ ಕಾಲಿಯಾ ೯೦ರ ದಶಕದಲ್ಲಿ ಮುಂಬಯಿಯ ಕಾಲಾಚೌಕಿ ಪ್ರದೇಶದ ಪಾದಚಾರಿ ಮಾರ್ಗದಲ್ಲಿ ಬೂಟುಗಳನ್ನು ಮಾರಾಟ ಮಾಡುವ ಕೆಲಸ ಮಾಡುತ್ತಿದ್ದನು. ಸುಲಿಗೆಯ ವಿವಾದದಿಂದ ಆತ ಚೋಟಾ ಶಕೀಲ್ ಗ್ಯಾಂಗ್‌ ನ ಸಂಪರ್ಕಕ್ಕೆ ಬಂದನು ಮತ್ತು ಅಪರಾಧ ಜಗತ್ತಿನಲ್ಲಿ ಸಕ್ರಿಯನಾದನು. ನವೆಂಬರ್ ೧೯೯೯ರಲ್ಲಿ ಒಂದು ದೊಡ್ಡ ಅಪರಾಧ ಮಾಡಲು ಸಿದ್ಧತೆಯಲ್ಲಿದ್ದಾಗ ಪೊಲೀಸರು ಆತನನ್ನು ಘರ್ಷಣೆಯಲ್ಲಿ ಹೊಡೆದುರುಳಿಸಿದ್ದರು.