ಅಮೆರಿಕಾದಿಂದ ಕದನ ವಿರಾಮದ ಅವಧಿ ವಿಸ್ತರಣೆ!

ವಾಷಿಂಗ್ಟನ್ (ಅಮೆರಿಕಾ) – ಇರಾನ್ ವಿರುದ್ಧದ ಕದನ ವಿರಾಮದ ಅವಧಿಯನ್ನು ವಿಸ್ತರಿಸುವುದಾಗಿ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಏಪ್ರಿಲ್ 22 ರಂದು ಕದನ ವಿರಾಮದ ಅವಧಿ ಪೂರ್ಣಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಅವರು ಈ ಘೋಷಣೆ ಮಾಡಿದ್ದಾರೆ. ಇರಾನ್ ಸರಕಾರ ಸಂಪೂರ್ಣವಾಗಿ ಕುಸಿದಿದೆ ಎಂದು ಅವರು ಹೇಳಿದರು. ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಮತ್ತು ಪ್ರಧಾನಿ ಶಹಬಾಜ್ ಷರೀಫ್ ಅವರ ಮನವಿಯ ಮೇರೆಗೆ ಅಮೆರಿಕಾ ಇರಾನ್ ಮೇಲೆ ದಾಳಿ ಮಾಡದಿರಲು ನಿರ್ಧರಿಸಿದೆ. ಇರಾನ್ ನಾಯಕರು ಮತ್ತು ಪ್ರತಿನಿಧಿಗಳು ಕೆಲವು ದೃಢವಾದ ಪ್ರಸ್ತಾಪಗಳೊಂದಿಗೆ ಸಭೆಗೆ ಬರುವವರೆಗೆ ದಾಳಿ ಮಾಡದಿರಲು ಅಮೆರಿಕಾ ತೀರ್ಮಾನಿಸಿದೆ.

ಟ್ರಂಪ್ ಅವರ ನಿರ್ಧಾರವು ಮತ್ತೆ ದಾಳಿ ಮಾಡಲು ಕಾಲಹರಣ ಮಾಡುವ ತಂತ್ರ! – ಇರಾನ್

ಮತ್ತೊಂದೆಡೆ, ಇರಾನ್ ಸಂಸತ್ತಿನ ಸ್ಪೀಕರ್ ಅವರ ಹಿರಿಯ ಸಲಹೆಗಾರರಾದ ಮಹ್ದಿ ಮೊಹಮ್ಮದಿ ಅವರು ಟ್ರಂಪ್ ಅವರ ಕದನ ವಿರಾಮ ವಿಸ್ತರಿಸುವ ನಿರ್ಧಾರವನ್ನು ತಿರಸ್ಕರಿಸಿದ್ದಾರೆ. ಟ್ರಂಪ್ ಅವರು ವಿಸ್ತರಿಸಿದ ಕದನ ವಿರಾಮ ನಮಗೆ ಅರ್ಥಹೀನ ಎಂದು ಅವರು ಹೇಳಿದರು. ಸೋತವರು ಷರತ್ತುಗಳನ್ನು ವಿಧಿಸಬಾರದು. ಹಾರ್ಮುಜ್ ಜಲಸಂಧಿಯಲ್ಲಿ ಮುಂದುವರಿದಿರುವ ದಿಗ್ಬಂಧನವು ಬಾಂಬ್ ದಾಳಿಗಿಂತ ಭಿನ್ನವಾಗಿಲ್ಲ. ಇದರ ವಿರುದ್ಧ ಸೇನಾ ಕಾರ್ಯಾಚರಣೆ ನಡೆಸಬಹುದು. ಟ್ರಂಪ್ ಅವರ ನಿರ್ಧಾರವು ಮತ್ತೆ ದಾಳಿ ಮಾಡಲು ಕಾಲಹರಣ ಮಾಡುವ ತಂತ್ರವಾಗಿದೆ. ಈಗ ಇರಾನ್ ನೇತೃತ್ವ ವಹಿಸುವ ಸಮಯ ಬಂದಿದೆ.

ಟ್ರಂಪ್ ಅವರ ಘೋಷಣೆಯಾದ ಸ್ವಲ್ಪ ಹೊತ್ತಿನಲ್ಲೇ ಹಾರ್ಮುಜ್‌ನಲ್ಲಿ ಮನಬಂದಂತೆ ಗುಂಡಿನ ದಾಳಿ

ಇರಾನ್ ಬೆಳಿಗ್ಗೆ 7.55 ಕ್ಕೆ ಹಾರ್ಮುಜ್ ಜಲಸಂಧಿಯಲ್ಲಿ ಹಡಗಿನ ಮೇಲೆ ಗುಂಡು ಹಾರಿಸಿದೆ. ಟ್ರಂಪ್ ಕದನ ವಿರಾಮ ವಿಸ್ತರಿಸುವ ಘೋಷಣೆ ಮಾಡಿದ ಕೆಲವೇ ಗಂಟೆಗಳಲ್ಲಿ ಈ ಗುಂಡಿನ ದಾಳಿ ನಡೆದಿದೆ. ಇರಾನ್ ಸೇನೆಯು ಕಂಟೈನರ್ ಹಡಗಿನ ಮೇಲೆ ಗುಂಡಿನ ದಾಳಿ ನಡೆಸಿದೆ. ಗುಂಡು ಹಾರಿಸುವ ಮೊದಲು ಯಾವುದೇ ಎಚ್ಚರಿಕೆ ನೀಡಿರಲಿಲ್ಲ. ಈ ಗುಂಡಿನ ದಾಳಿಯಲ್ಲಿ ಯಾವುದೇ ಪ್ರಾಣಹಾನಿಯಾದ ಬಗ್ಗೆ ವರದಿಯಾಗಿಲ್ಲ.

ಇರಾನ್‌ಗೆ ಪ್ರತಿದಿನ 4,100 ಕೋಟಿ ರೂಪಾಯಿಗಳ ನಷ್ಟ

ಯುದ್ಧದಿಂದಾಗಿ ಇರಾನ್‌ನ ಇಂಧನ ರಫ್ತು ಮತ್ತು ಹಾರ್ಮುಜ್ ಜಲಸಂಧಿಯಲ್ಲಿನ ವ್ಯಾಪಾರದ ಮೇಲಾದ ಪರಿಣಾಮದಿಂದ ಇರಾನ್ ಪ್ರತಿದಿನ 4,100 ಕೋಟಿ ರೂಪಾಯಿಗಳ ನಷ್ಟವನ್ನು ಅನುಭವಿಸುತ್ತಿದೆ. ಹೀಗಿದ್ದರೂ, ಇರಾನ್ ಅಮೆರಿಕಾದೊಂದಿಗಿನ ಶಾಂತಿ ಮಾತುಕತೆಯ ಬಗ್ಗೆ ಇನ್ನೂ ಸಕಾರಾತ್ಮಕ ಹೆಜ್ಜೆ ಇಟ್ಟಿಲ್ಲ.

ಇರಾನ್ ಮಾತುಕತೆಗೆ ಏಕೆ ಹಿಂದೇಟು ಹಾಕುತ್ತಿದೆ?

ಇರಾನ್‌ನ ರಾಜತಾಂತ್ರಿಕತೆಯ ಮೇಲೆ ಪ್ರಸ್ತುತ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ ಎಂಬ ಮಿಲಿಟರಿ ಸಂಘಟನೆಯ ದೊಡ್ಡ ಪ್ರಭಾವವಿದೆ. ಈ ಸಂಘಟನೆಯು ಅಮೆರಿಕಾದ ಷರತ್ತುಗಳಿಗೆ ತಲೆಬಾಗುವುದನ್ನು ವಿರೋಧಿಸುತ್ತಿದೆ. ಅಮೆರಿಕಾವು ಇರಾನ್‌ನ ಪರಮಾಣು ಶಸ್ತ್ರಾಸ್ತ್ರ ಕಾರ್ಯಕ್ರಮದ ಮೇಲೆ ಕಠಿಣ ನಿರ್ಬಂಧಗಳನ್ನು ಹೇರಿದೆ ಮತ್ತು ಪರಮಾಣು ಶಸ್ತ್ರಾಸ್ತ್ರಗಳ ತಯಾರಿಕಾ ಉಪಕರಣಗಳನ್ನು ಒಪ್ಪಿಸುವ ಷರತ್ತು ವಿಧಿಸಿದೆ. ಇದು ಇರಾನ್‌ಗೆ ಸ್ವೀಕಾರಾರ್ಹವಲ್ಲ. ಹಾರ್ಮುಜ್ ಜಲಸಂಧಿಯ ಮೇಲೆ ನಿಯಂತ್ರಣ ಸಾಧಿಸುವ ಮೂಲಕ ಅಮೆರಿಕಾವನ್ನು ಮಾತುಕತೆಯಲ್ಲಿ ಹಿಂದಕ್ಕೆ ತಳ್ಳಬಹುದು ಎಂದು ಇರಾನ್ ಭಾವಿಸಿದೆ.