‘ವಿಶು’ ಹಬ್ಬದ ಶುಭಾಶಯದ ಫಲಕದಲ್ಲಿ ಶ್ರೀಕೃಷ್ಣನ ಎದುರಿಗೆ ‘ಚಿಕನ್ ಮಂದಿ’ ತಟ್ಟೆ ತೋರಿಸಿದ ಪ್ರಸಂಗ : ರೆಸ್ಟೋರೆಂಟ್‌ ನ ಮುಸ್ಲಿಂ ಮಾಲೀಕನ ಬಂಧನ!

(‘ವಿಶು’ ಹಬ್ಬ ಎಂದರೆ ಮಲಯಾಳಿ ಬಾಂಧವರ ಹೊಸ ವರ್ಷ) (ಚಿಕನ್ ಮಂದಿ ಎಂದರೆ ರಸಭರಿತ ಕೋಳಿ ಮಾಂಸ ಮತ್ತು ಅನ್ನದ ಮಿಶ್ರಣ)

(ಈ ಮೇಲೆ ಪ್ರಕಟಿಸಿರುವ ಚಿತ್ರ ಯಾರ ಧಾರ್ಮಿಕ ಭಾವನೆಗಳಿಗೆ ನೋವನ್ನು ತರುವುದಾಗಿರದೇ ನೈಜ ಸ್ಥಿತಿ ತಿಳಿಸುಉವದಾಗಿದೆ – ಸಂಪಾದಕರು)

ಕೊಚ್ಚಿ (ಕೇರಳ) – ಕೇರಳದ ಆಲಪ್ಪುಳ ಜಿಲ್ಲೆಯ ಚೇರ್ತಲಾದಲ್ಲಿ ‘ವಿಶು’ ಹಬ್ಬದ ಶುಭಾಶಯ ಕೋರುವ ಫಲಕದಲ್ಲಿ ಶ್ರೀಕೃಷ್ಣನ ಚಿತ್ರದ ಮುಂದೆ ‘ಚಿಕನ್ ಮಂದಿ’ಯ (ರಸಭರಿತ ಕೋಳಿ ಮಾಂಸ ಮತ್ತು ಅನ್ನದ ಮಿಶ್ರಣ) ತಟ್ಟೆಯನ್ನು ತೋರಿಸಿದ ಆರೋಪದ ಮೇಲೆ ಪೊಲೀಸರು ರೆಸ್ಟೋರೆಂಟ್‌ ನ ಮುಸ್ಲಿಂ ಮಾಲೀಕನನ್ನು ಬಂಧಿಸಿದ್ದಾರೆ. ಮಲಯಾಳಿ ಬಾಂಧವರ ಹೊಸ ವರ್ಷವಾದ ‘ವಿಶು’ ನಿಮಿತ್ತ ಚೇರ್ತಲಾದ ಮನೋರಮಾ ಚೌಕದ ಬಳಿ ಇರುವ ‘ಮೆಹರ್ ಮಂದಿ ಅಂಡ್ ಗ್ರಿಲ್ಸ್’ ಎಂಬ ರೆಸ್ಟೋರೆಂಟ್ ಹೆಸರಿನಲ್ಲಿ ಸಾಮಾಜಿಕ ಮಾಧ್ಯಮಗಳಲ್ಲಿ ಒಂದು ಫಲಕವನ್ನು ಪ್ರಸಾರ ಮಾಡಲಾಗಿತ್ತು. ಈ ಫಲಕದಲ್ಲಿ ಶ್ರೀಕೃಷ್ಣನ ಚಿತ್ರದ ಮುಂದೆ ಚಿಕನ್ ಮತ್ತು ಮಂದಿ (ಅನ್ನ) ಇರುವ ತಟ್ಟೆಯನ್ನು ತೋರಿಸಲಾಗಿತ್ತು. ಈ ಚಿತ್ರದಿಂದ ಹಿಂದೂಗಳ ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯಾಗಿದೆ ಎಂದು ಆರೋಪಿಸಿ ಹಿಂದೂ ಸಂಘಟನೆಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದವು. ನ್ಯಾಯವಾದಿ ಎಂ.ವಿ. ಬಿಜು ಅವರು ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೂರು ದಾಖಲಿಸಿದ್ದರು. ಈ ದೂರಿನ ಆಧಾರದ ಮೇಲೆ ಪೊಲೀಸರು ರೆಸ್ಟೋರೆಂಟ್ ಮಾಲೀಕ ಅರ್ಷದ್ ವಿರುದ್ಧ ಮೊಕದ್ದಮೆ ದಾಖಲಿಸಿ ಆತನನ್ನು ಬಂಧಿಸಿದ್ದಾರೆ. ವಿಶ್ವ ಹಿಂದೂ ಪರಿಷತ್ ರೆಸ್ಟೋರೆಂಟ್ ಹೊರಗೆ ಪ್ರತಿಭಟನೆ ನಡೆಸುವುದಾಗಿ ಘೋಷಿಸಿದೆ.

ಈ ವಿಷಯದ ಕುರಿತು ವಿವಾದ ಹೆಚ್ಚಾದ ನಂತರ ರೆಸ್ಟೋರೆಂಟ್‌ ನ ವ್ಯವಸ್ಥಾಪಕ ಪಾಲುದಾರ ಶಮೀಮ್ ಇನ್‌ ಸ್ಟಾಗ್ರಾಮ್‌ ನಲ್ಲಿ ಬೇಷರತ್ ಕ್ಷಮೆಯಾಚಿಸಿದ್ದಾರೆ. ಕೇರಳದ ಪ್ರಖ್ಯಾತ ಮುಸ್ಲಿಂ ಮುಖಂಡ ಉಸ್ತಾದ್ ಅನ್ಸಾರಿ ಸುಹ್ರಿ ಅವರು ಫೇಸ್‌ಬುಕ್ ವಿಡಿಯೋ ಮೂಲಕ ಈ ಘಟನೆಯನ್ನು ಖಂಡಿಸಿದ್ದಾರೆ. ‘ನೀವು ವಿಶು ಹಬ್ಬದ ಶುಭಾಶಯಗಳನ್ನು ತಿಳಿಸಲೇಬೇಕು ಎಂದೇನಿಲ್ಲ; ಆದರೆ ಶುಭಾಶಯಗಳ ಹೆಸರಿನಲ್ಲಿ ಕೋಮು ದ್ವೇಷವನ್ನು ಹರಡಬೇಡಿ. ಇಂತಹ ಕೃತ್ಯಗಳಿಂದ ಸಮಾಜದಲ್ಲಿ ಅಶಾಂತಿ ನಿರ್ಮಾಣವಾಗುತ್ತದೆ. ಕೆಲವು ತಪ್ಪುಗಳು ಮನುಷ್ಯನಿಗೆ ಜೀವಕ್ಕೆ ಎರವಾಗಬಹುದು,’ ಎಂದು ಅವರು ಎಚ್ಚರಿಸಿದ್ದಾರೆ.