ಸಮೀರ್ ಮುಲ್ಲಾನಿಗೆ ಆತನ ಸಹೋದರಿ ತೈಸಿಮ್ ಸಂತ್ರಸ್ತೆಯನ್ನು ಪರಿಚಯಿಸಿದ್ದಳು!

ಹುಬ್ಬಳ್ಳಿ – ಇಲ್ಲಿ ಸಮೀರ್ ಮುಲ್ಲಾ ಎಂಬ ಲವ್ ಜಿಹಾದಿ ಹಿಂದೂ ಯುವತಿಯನ್ನು ಪ್ರೀತಿಯ ಬಲೆಯಲ್ಲಿ ಸಿಲುಕಿಸಿ ಆಕೆಯ ಮೇಲೆ ದೌರ್ಜನ್ಯವೆಸಗಿರುವ ಘಟನೆ ಬೆಳಕಿಗೆ ಬಂದ ನಂತರ, ಜಿಮ್ ಟ್ರೈನರ್ ಸಮೀರ್‌ನ ಮನೆಗೆ ನುಗ್ಗಿದ ಹಿಂದುತ್ವವಾದಿ ಸಂಘಟನೆಗಳ ಕಾರ್ಯಕರ್ತರು ಆತನನ್ನು ಹಳೆ ಹುಬ್ಬಳ್ಳಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಈ ಪ್ರಕರಣದಲ್ಲಿ ಸಿಲುಕಿರುವ ಸಂತ್ರಸ್ತೆಯೂ ತನ್ನ ವಿಡಿಯೋವನ್ನು ಪ್ರಸಾರ ಮಾಡಿ ತನ್ನ ಮೇಲಾದ ದೌರ್ಜನ್ಯದ ಬಗ್ಗೆ ಮಾಹಿತಿ ನೀಡಿದ್ದಾಳೆ. ‘ಸಮೀರ್‌ನ ಸಹೋದರಿ ತೈಸಿಮ್ ನನ್ನೊಂದಿಗೆ ಒಡನಾಟ ಬೆಳೆಸಿ ಸಮೀರ್‌ನನ್ನು ನನಗೆ ಪರಿಚಯಿಸಿದ್ದಳು’ ಎಂದು ಆಕೆ ಹೇಳಿದ್ದಾಳೆ.

ಸಮೀರ್ ನಗರದ ವಿಜಯನಗರ ಬಡಾವಣೆಯ ನಿವಾಸಿಯಾಗಿದ್ದು, ಆತನ ಸಹೋದರಿ ತೈಸಿಮ್ ಮೂಲಕ ಆತನಿಗೆ ಸಂತ್ರಸ್ತೆಯ ಪರಿಚಯವಾಗಿತ್ತು. ಆ ನಂತರ ಆತ ಆಕೆಯನ್ನು ತನ್ನ ಬಲೆಗೆ ಕೆಡವಿದ್ದನು. ಒಮ್ಮೆ ಆಕೆಯನ್ನು ಮನೆಗೆ ಕರೆಸಿ ಅಮಲಿನ ಔಷಧ ಕುಡಿಸಿ ಆಕೆಯ ಮೇಲೆ ಅತ್ಯಾಚಾರವೆಸಗಿದ್ದಾನೆ. ಸಮೀರ್‌ನ ಮೊಬೈಲ್ ಫೋನ್‌ನಲ್ಲಿ ಹಿಂದೂ ಯುವತಿಯರ ಫೋಟೋಗಳು, ಗರ್ಭನಿರೋಧಕ ಮಾತ್ರೆಗಳ ಫೋಟೋಗಳು ಮುಂತಾದ ಅನುಮಾನಾಸ್ಪದ ವಿಚಾರಗಳು ಪತ್ತೆಯಾಗಿವೆ ಎಂದು ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ.