‘ಪಾಕಿಸ್ತಾನವೆಂದರೆ ಕತಾರ್ ಅಲ್ಲ ಎಂಬುದನ್ನು ಇಸ್ರೇಲ್ ನೆನಪಿನಲ್ಲಿಡಬೇಕಂತೆ!’

ತೆಹರಾನ್‌ನಲ್ಲಿ (ಇರಾನ್) ಪಾಕಿಸ್ತಾನ ರಾಯಭಾರ ಕಚೇರಿಯ ಸಮೀಪ ನಡೆದ ದಾಳಿಯ ನಂತರ ಇಸ್ರೇಲ್‌ಗೆ ಪಾಕಿಸ್ತಾನದ ಹುರುಳಿಲ್ಲದ ಬೆದರಿಕೆ

ಇಸ್ಲಾಮಾಬಾದ್ (ಪಾಕಿಸ್ತಾನ) – ಇಸ್ರೇಲ್ ಸೇನೆಯು ಮಾರ್ಚ್ ೨೭ರಂದು ಇರಾನ್ ರಾಜಧಾನಿ ತೆಹರಾನ್‌ನಲ್ಲಿ ದೊಡ್ಡ ಮಟ್ಟದ ದಾಳಿಗಳನ್ನು ನಡೆಸಿದೆ. ಈ ದಾಳಿಗಳ ಪರಿಣಾಮವು ತೆಹರಾನ್‌ನಲ್ಲಿರುವ ಪಾಕಿಸ್ತಾನಿ ರಾಯಭಾರ ಕಚೇರಿಯ ಸಮೀಪವಿರುವ ಕಟ್ಟಡಗಳ ಮೇಲೆಯೂ ಉಂಟಾಗಿದೆ. ಈ ಘಟನೆಯ ನಂತರ ಪಾಕಿಸ್ತಾನ ಸರಕಾರಕ್ಕೆ ಸಂಬಂಧಿಸಿದ ‘ಪಾಕಿಸ್ತಾನ್ ಸ್ಟ್ರಾಟೆಜಿಕ್ ಫೋರಮ್’, ‘ಪಾಕಿಸ್ತಾನವೆಂದರೆ ಕತಾರ್ ಅಲ್ಲ ಎಂಬುದನ್ನು ಇಸ್ರೇಲ್ ಗಮನದಲ್ಲಿ ಇಟ್ಟುಕೊಳ್ಳಬೇಕು. ವಿಶ್ವದ ಯಾವುದೇ ಮೂಲೆಯಲ್ಲಿ ನಮ್ಮ ರಾಜತಾಂತ್ರಿಕ ಅಧಿಕಾರಿಗಳಿಗೆ ತೊಂದರೆಯಾದರೆ ತಕ್ಕ ಪ್ರತ್ಯುತ್ತರ ನೀಡಲಾಗುವುದು’ ಎಂದು ಎಚ್ಚರಿಕೆ ನೀಡಿದೆ. ವಿಶೇಷವೆಂದರೆ, ಈ ದಾಳಿಗಳಲ್ಲಿ ಪಾಕಿಸ್ತಾನಿ ರಾಯಭಾರ ಕಚೇರಿ ಅಥವಾ ಅಲ್ಲಿನ ಸಿಬ್ಬಂದಿಗೆ ಯಾವುದೇ ಹಾನಿಯಾಗಿಲ್ಲ.

ಪಾಕಿಸ್ತಾನದ ವಿದೇಶಾಂಗ ಸಚಿವ ಇಶಾಕ್ ಡಾರ್ ಮಾತನಾಡಿ, ಅಮೆರಿಕ ಮತ್ತು ಇರಾನ್ ನಡುವಿನ ಪರೋಕ್ಷ ಮಾತುಕತೆಗಳು ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ನಡೆಯುತ್ತಿವೆ. ಅಮೆರಿಕ ನೀಡಿರುವ ೧೫ ಅಂಶಗಳ ಪ್ರಸ್ತಾವನೆಯು ಪ್ರಸ್ತುತ ಇರಾನ್‌ನ ಪರಿಶೀಲನೆಯಲ್ಲಿದೆ ಎಂದು ಹೇಳಿದ್ದಾರೆ.