ಪಾಕಿಸ್ತಾನವನ್ನು ಶ್ಲಾಘಿಸಿದ ಅಮೆರಿಕದ ಉಪಾಧ್ಯಕ್ಷರ ವಿರುದ್ಧ ಅವರದ್ದೇ ಪಕ್ಷದ ಸಂಸದರು ಆಕ್ರೋಶ!

ವಾಷಿಂಗ್ಟನ್ (ಅಮೆರಿಕ) – ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರು ಸ್ವಿಟ್ಜರ್‌ ಲ್ಯಾಂಡ್‌ ನಲ್ಲಿ ಪಾಕಿಸ್ತಾನವನ್ನು ಕೊಂಡಾಡಿದ್ದರು. ಇದರಿಂದಾಗಿ ಆಡಳಿತಾರೂಢ ರಿಪಬ್ಲಿಕನ್ ಪಕ್ಷದ ರಿಕ್ ಸ್ಕಾಟ್ ಮತ್ತು ಟಿಮ್ ಶೀಹಿ ಎಂಬ ಇಬ್ಬರು ಸಂಸದರು ಅವರ ವಿರುದ್ಧ ಅತ್ಯಂತ ತೀಕ್ಷ್ಣವಾದ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ‘ವ್ಯಾನ್ಸ್ ಯಾರನ್ನು ಶ್ಲಾಘಿಸುತ್ತಿದ್ದಾರೋ, ಆ ಪಾಕಿಸ್ತಾನ ಮತ್ತು ಕತಾರ್ ಭಯೋತ್ಪಾದಕರಿಗೆ ಆಶ್ರಯ ನೀಡಿವೆ. ಈ ಎರಡೂ ದೇಶಗಳು ಇರಾನ್‌ ನ ಭಯೋತ್ಪಾದಕ ಕಾರ್ಯಾಚರಣೆಯನ್ನು ಉತ್ತೇಜಿಸುವುದರಲ್ಲಿ ಹೆಚ್ಚಿನ ಆಸಕ್ತಿ ತೋರಿಸುತ್ತಿವೆ’ ಎಂದು ಅವರು ಹೇಳಿದ್ದಾರೆ.

ಪಾಕಿಸ್ತಾನವು ದೀರ್ಘಕಾಲದಿಂದ ಭಯೋತ್ಪಾದಕರಿಗೆ ಆಶ್ರಯ ನೀಡುತ್ತಿದೆ! – ಸಂಸದ ರಿಕ್ ಸ್ಕಾಟ್

ಫ್ಲೋರಿಡಾದ ಸಂಸದ ರಿಕ್ ಸ್ಕಾಟ್ ಅವರು ‘ಎಕ್ಸ್’ನಲ್ಲಿ, ‘ಈಗ ನಮ್ಮ ನಿಜವಾದ ಸ್ನೇಹಿತರು ಯಾರು ಎಂಬುದು ಪ್ರತಿಯೊಬ್ಬರಿಗೂ ಸ್ಪಷ್ಟವಾಗಬೇಕು. ಪಾಕಿಸ್ತಾನ ಮತ್ತು ಕತಾರ್ ದೀರ್ಘಕಾಲದಿಂದ ಭಯೋತ್ಪಾದಕರಿಗೆ ಆಶ್ರಯ ನೀಡುತ್ತಾ ಬಂದಿವೆ. ಪ್ರಸ್ತುತ ಈ ಎರಡೂ ದೇಶಗಳು ಶಾಂತಿ ಸ್ಥಾಪಿಸುವ ಬದಲು, ಇರಾನ್‌ ನ ಹಲವು ದಶಕಗಳಷ್ಟು ಹಳೆಯದಾದ ಭಯೋತ್ಪಾದಕ ಕಾರ್ಯಾಚರಣೆಗೆ ಬೆಂಬಲ ನೀಡುವುದರಲ್ಲಿ ಹೆಚ್ಚು ನಿರತವಾಗಿರುವಂತೆ ಕಾಣುತ್ತಿವೆ.

ಇರಾನ್ ಜೊತೆ ಯಾವುದೇ ಒಪ್ಪಂದವಾಗಬಹುದು; ಆದರೆ ಒಂದು ವಿಷಯ ಖಚಿತ, ಇರಾನ್ ಎಂದಿಗೂ ಅಣುಬಾಂಬ್ ತಯಾರಿಸುವ ಸ್ಥಿತಿಯಲ್ಲಿ ಇರಬಾರದು ಎಂದು ಸ್ಕಾಟ್ ಮುಂದುವರಿದು ಹೇಳಿದ್ದಾರೆ.

ಪಾಕಿಸ್ತಾನವು ಐ.ಎಸ್.ಐ. ಮೂಲಕ ಅಮೆರಿಕದ ವಿರುದ್ಧದ ಬಂಡುಕೋರರಿಗೆ ಹಣ ಒದಗಿಸುತ್ತದೆ! – ಸಂಸದ ಟಿಮ್ ಶೀಹಿ

ಮೊಂಟಾನಾದ ಸಂಸದ ಟಿಮ್ ಶೀಹಿ ಅವರು ‘ಫಾಕ್ಸ್ ನ್ಯೂಸ್’ಗೆ ನೀಡಿದ ಸಂದರ್ಶನದಲ್ಲಿ, ಪಾಕಿಸ್ತಾನವು ಒಸಾಮಾ ಬಿನ್ ಲಾಡೆನ್‌ ನನ್ನು 10 ವರ್ಷಗಳ ಕಾಲ ಬಚ್ಚಿಟ್ಟಿತ್ತು ಎಂದು ಆರೋಪಿಸಿದ್ದಾರೆ. ಶೀಹಿ ಮಾತನಾಡಿ, ಒಂದು ವೇಳೆ ಪಾಕಿಸ್ತಾನ ಮತ್ತು ಕತಾರ್ ಚರ್ಚೆಗಾಗಿ ಒಟ್ಟಿಗೆ ಬಂದಿದ್ದರೆ, ಸಂಯುಕ್ತ ಅರಬ್ ಎಮಿರೇಟ್ಸ್, ಇಸ್ರೇಲ್ ಮತ್ತು ಸೌದಿ ಅರೇಬಿಯಾ ಕೂಡ ಇದರಲ್ಲಿ ಸೇರಿಸಿಕೊಳ್ಳಬೇಕಿತ್ತು ಎಂದಿದ್ದಾರೆ. ಅವರು ಈ ಮೂರೂ ದೇಶಗಳನ್ನು ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ನಿಜವಾದ ಸ್ನೇಹಿತರು ಮತ್ತು ಸಹವರ್ತಿಗಳು ಎಂದು ಪರಿಗಣಿಸಿದರು. ಕತಾರ್ ದಶಕಗಳಿಂದ ಭಯೋತ್ಪಾದಕ ಸಂಸ್ಥೆಗಳಿಗೆ ಧನಸಹಾಯ ಮಾಡುತ್ತಿದೆ ಎಂದು ಶೀಹಿ ಹೇಳಿದರು. ಇನ್ನೊಂದೆಡೆ, ಪಾಕಿಸ್ತಾನವು ಐ.ಎಸ್.ಐ. ಮೂಲಕ ಅಮೆರಿಕದ ವಿರುದ್ಧದ ಬಂಡುಕೋರರಿಗೆ ಹಣವನ್ನು ಪೂರೈಸುತ್ತಿದೆ. ಇಂತಹ ಪರಿಸ್ಥಿತಿಯಲ್ಲಿ ಅವರನ್ನು ನಿಷ್ಪಕ್ಷಪಾತ ಮಧ್ಯಸ್ಥಗಾರರು ಎಂದು ಪರಿಗಣಿಸುವುದು ಸಂಪೂರ್ಣವಾಗಿ ತಪ್ಪು ಎಂದು ಅವರು ಹೇಳಿದ್ದಾರೆ.

ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಏನು ಹೇಳಿದ್ದರು?

ವ್ಯಾನ್ಸ್ ಅವರು, ‘ನಾನು ಪಾಕಿಸ್ತಾನವನ್ನು ಪ್ರೀತಿಸುತ್ತೇನೆ.’ ಹಾಗೆಯೇ ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಆಸಿಮ್ ಮುನೀರ್ ಅವರ ಬಗ್ಗೆ ಮಾತನಾಡುತ್ತಾ, ‘ಮುನೀರ್ ಅವರು ಇಸ್ಲಾಮಾಬಾದ್‌ನಲ್ಲಿ ನನ್ನನ್ನು ಸ್ವಾಗತಿಸಿದ್ದರು. ನಾನು ಅನೇಕ ಬಾರಿ ತಮಾಷೆ ಮಾಡುತ್ತಿರುತ್ತೇನೆ ನನ್ನ ಜೀವನದಲ್ಲಿ ಇಬ್ಬರು ಅತ್ಯಂತ ಪ್ರಮುಖ ವ್ಯಕ್ತಿಗಳಿದ್ದಾರೆ, ಒಬ್ಬರು ಭಾರತೀಯರು ಮತ್ತು ಇನ್ನೊಬ್ಬರು ಪಾಕಿಸ್ತಾನಿ. ಭಾರತೀಯರು ನನ್ನ ಪತ್ನಿ ಮತ್ತು ಪಾಕಿಸ್ತಾನಿ ಫೀಲ್ಡ್ ಮಾರ್ಷಲ್ ಮುನೀರ್ ಆಗಿದ್ದಾರೆ’ ಎಂದು ಹೇಳಿದ್ದರು. ಕಳೆದ 3 ತಿಂಗಳುಗಳಲ್ಲಿ ತಾವು ಬೇರೆಯವರಿಗಿಂತ ಮುನೀರ್ ಅವರೊಂದಿಗೆ ಹೆಚ್ಚು ಸಂವಾದ ನಡೆಸಿದ್ದಾಗಿಯೂ ವ್ಯಾನ್ಸ್ ತಿಳಿಸಿದ್ದರು.